Read Oshindonga-Ombiimbeli Ondjapuki NUMERI 23 Bible Online

NUMERI 23 - Oshindonga-Ombiimbeli Ondjapuki bible

NUMERI 23

¹Bileam okwa lombwele Balak a ti: “Tungila ndje mpaka iiyambelo iheyali ngoye u etele ndje oongombe heyali noonzi oondumentu heyali.”

²Balak okwa ningi, ngaashi a lombwelwa, oye naBileam noya yamba ongombe nonzi ondumentu poshiyambelo kehe.

³Opo ihe Bileam okwa ti kuBalak: “Kala mpaka pefikilondjambo lyoye, manga tandi ka tala, pamwe Omuwa ta tsakaneke ndje. Otandi ya ndi ku lombwele, ngele okwi ihololele ndje.” Okwa londo koshikulundundu shimwe,

⁴naKalunga okwe mu tsakaneke. Bileam okwa ti kuye: “Onda tungu iiyambelo iheyali nonda yambele ongombe nonzi ondumentu koshiyambelo kehe.”

⁵Omuwa okwa lombwele Bileam shoka e na oku shi popya e te mu tumu kuBalak, opo e mu lombwele elaka lye.

⁶Okwa shuna e ta adha Balak a thikama pefikilondjambo e li pamwe naawiliki yaMoab.

⁷Bileam okwa totomona ehunganeko lye e ta ti: “Balak okwi ile ndje muAram, omukwaniilwa gwaMoab okoondundu dhokuuzilo, a ti: ‘Ila, u lile ndje Jakob muumpulile; ila, u tikilile ndje Israel.’

⁸Otandi mu li ngiini, Kalunga sho ite mu li? Otandi mu tikile ngiini, Omuwa sho ite mu tikile?

⁹Opombanda mpaka nde mu tala, okiikulundundu tandi mu ligamene. Tala, oshigwana shi iyoololelwa sho itaashi yalulilwa maantu yalwe.

¹⁰Olye ta vulu okuyalula oluvalo lwaJakob, nenge okuyeleka omwaalu gwaIsrael? Nandi se eso lyaayuuki, ndi tokoke ndi na ombili, ngaashi aantu yaKalunga!”

¹¹Balak okwa ti kuBileam: “Owa ningi ndje ngiini? Onde ku ithana, u ye u lile ndje aatondi yandje muumpulile, ihe owe ya laleke nuuyamba.”

¹²Bileam okwa yamukula a ti: “Otandi popi ashike shoka Omuwa ta lombwele ndje, ndi shi popye.”

¹³Balak okwa lombwele Bileam a ti: “Ila, tu ye kehala lilwe nkoka to vulu okutala ombinga onkwawo yAaisraeli, ngoye u ya lile ndje muumpulile.”

¹⁴Okwe mu fala kelundu lyaZofim kondungu yondundu Pisga. Okwa tungile ko iiyambelo iheyali e ta yambele ongombe nonzi ondumentu koshiyambelo kehe.

¹⁵Bileam okwa ti kuBalak: “Kala mpaka pefikilondjambo lyoye, manga tandi ka tsakaneka Kalunga hwiyaka.”

¹⁶Omuwa okwa tsakaneke Bileam e te mu lombwele shoka e na okupopya, nokwe mu shunitha kuBalak, e mu faalele elaka.

¹⁷Okwa shuna e ta adha Balak a thikama pefikilondjambo lye, pamwe naawiliki yaMoab. Balak okwa pula shoka Omuwa a ti,

¹⁸naBileam okwa totomona ehunganeko lye a ti: “Thikama, Balak, u pulakene! Omuna gwaZippor, pulakena ndje!

¹⁹Kalunga hamuntu a popye iifundja, Ye hamuna gwomuntu i idhiladhilulule. A uvaneke sha ye kee shi gwanithe; a popye sha ye kee shi ninge.

²⁰Onda nongekwa okuyambeka, nongele Kalunga a yambeke, ite vulu oku shi galula.

²¹Omuntu ka mono omukundu muJakob nenge okundhindhilika oshiponga muIsrael. Omuwa, Kalunga kawo, oku li puyo, nesimano lyomukwaniilwa tali ligolelwa mokati kawo.

²²Kalunga okwe ya tembudha muEgipiti; oku ya lile po a fa ooniga dhonyati.

²³Kaku na uumpulile tau li Jakob, kaku na uulodhi tau logo Israel. Ngashingeyi aantu taa popi Jakob naIsrael taa ti: ‘Tala shoka Kalunga a ningi!’

²⁴Oshigwana shaIsrael osha thikama sha fa onkoshi onyali. Ongaashi onime otashi iyelutha po, itashi ka lala, manga inaashi lya shoka she shi yugu, manga inaashi nwa ombinzi yoshihakanwa shasho she shi dhipaga.”

²⁵Nena Balak okwa ti kuBileam: “Owa tindi okuthinga Aaisraeli, ihe ino ya laleka wo nuuyamba!”

²⁶Bileam okwa yamukula a ti: “Inandi ku lombwela nani kutya otandi ningi ashike shoka Omuwa ta lombwele ndje?”

²⁷Balak okwa ti: “Ila, tu ye ndi ku fale kehala lilwe. Pamwe Kalunga ota ka pitika, u ya lile ndje muumpulile nkoka.”

²⁸Okwa fala Bileam kondungu yondundu Peor, ndjoka ya tumbalala mombuga.

²⁹Bileam okwe mu lombwele e ta ti: “Tungila ndje iiyambelo iheyali mpaka e to etele ndje oongombe heyali noonzi oondumentu heyali.”

³⁰Balak okwa ningi, ngaashi a lombwelwa, e ta yambele ongombe nonzi ondumentu koshiyambelo kehe.