Read Oshindonga-Ombiimbeli Ondjapuki NUMERI 27 Bible Online

NUMERI 27 - Oshindonga-Ombiimbeli Ondjapuki bible

NUMERI 27

¹Mahla, Noa, Hogla, Milka naTirza oya li aakadhona aana yaZelofhad yaHefer yaGilead yaMakir gaManasse gaJosef

²Oya yi noya thikama koshipala shaMoses nomuyambi Eleasar naawiliki negongalo alihe posheelo shetsalihangano e taa ti:

³“Tate okwa sile mombuga ye ina thiga po aamati. Ka li nando mokati kaalanduli yaKora, mboka ya tsu ondumbo nOmuwa; okwa sile uulunde we mwene.

⁴Molwashoka ka li e na aanona aamati, edhina lye otali kana mo muIsrael. Tu pa oshitendelwa shevi mokati kaamwayina yatate!”

⁵Moses okwa tula oshinima shawo koshipala shOmuwa.

⁶Omuwa okwa lombwele Moses a ti:

⁷“Shoka sha pulwa kaana yaZelofhad, oshi li mondjila, ya pa oshitendelwa mokati kaamwayina yahe. Ya pa oshitendelwa shahe.

⁸Lombwela Aaisraeli kutya ngele oku na omuntu ta si ye ke na aanona aamati, omwana omukadhona na thigulule eliko lye.

⁹Ngele ke na omwana omukadhona, aamwayina naye mu thigulule.

¹⁰Ngele ke na aamwayina, oohegona naye mu thigulule.

¹¹Ngele ke na aamwayina nenge oohegona, nena omukwawo ngoka e mu li popepi, ne mu thigulule, opo eliko li ninge lye. Aaisraeli oye na okugwanitha eutho ndika Omuwa a lombwele Moses.”

¹²Omuwa okwa lombwele Moses a ti: “Londa kondundu Abarim u tale evi ndyoka tandi li pe Aaisraeli.

¹³Shampa tuu we li tala, oto si, ngaashika omumwanyoko Aaron a si,

¹⁴oshoka ne amuhe yaali omwa tsile ondumbo noshipango shandje mombuga Zin. Egongalo alihe sho lya ngungutulile ndje pomeya gaMeriba, omwa tindi okwiinekela oonkondo dhandje oondjapuki montaneho yalyo.” (Meriba olwo oluthithiya puKadesh mombuga Zin.)

¹⁵Moses okwa lombwele Omuwa e ta ti:

¹⁶“Omuwa Kalunga, ongoye othithiya yomwenyo aguhe, langeka po omulumentu ngoka ta wilike aantu mbaka

¹⁷note ya kwatele komeho molugodhi, opo egongalo lyoye lyaa kale lya fa oonzi dhaa na omusita.”

¹⁸Omuwa okwa lombwele Moses e ta ti: “Kutha Josua yaNun, omulumentu ependa, u mu tenteke iikaha yoye komutse.

¹⁹Mu thikameka montaneho yomuyambi Eleasar negongalo alihe, nomontaneho yawo oto mu langeke a ninge omulanduli gwoye.

²⁰Mu pa oonkondo dhoye, opo egongalo alihe lyaIsrael li vulike kuye.

²¹Na thikame koshipala shomuyambi Eleasar, ngoka ta koneke ehalo lyandje mokulongitha Urim naTummim. Pahedhi ndjika Eleasar ota wilike Josua negongalo alihe lyaIsrael miinima yawo ayihe.”

²²Moses okwa ningi, ngaashi Omuwa e mu lombwele. Okwa thikameke Josua montaneho yomuyambi Eleasar negongalo alihe.

²³Moses okwa tenteke iikaha ye komutse gwaJosua, ngaashi Omuwa e mu lombwele e te mu langeke a ninge omulanduli gwe.