Read Oshindonga-Ombiimbeli Ondjapuki NUMERI 33 Bible Online

NUMERI 33 - Oshindonga-Ombiimbeli Ondjapuki bible

NUMERI 33

¹Ndjika ondjila yAaisraeli sho ya tembuka muEgipiti oongundu noongundu mewiliko lyaMoses naAaron.

²Moses okwa nyola omadhina gomahala mpoka ya yungu oontanda palombwelo lyOmuwa.

³Aaisraeli oya thigi po Egipiti etimulongo netitano lyomwedhi gwotango gwomumvo, esiku lya landula Opaasa. Oya thigi po oshilando Rameses megameno lyOmuwa montaneho yAayegipiti,

⁴manga taa fumvike aatango mboka ya dhipagwa kOmuwa. Omuwa okwi iholola mpaka kutya oye omunankondoawike e vule ookalunga yaEgipiti.

⁵Aaisraeli oya zi muRameses e taa yungu oontanda muSukkot.

⁶Okuza mpoka oya ka yunga oontanda muEtam kooha dhombuga.

⁷Okuza kuEtam oya shuna kuPi Hahirot kuuzilo waBaal Zefon noya yungu oontanda popepi naMigdol.

⁸Oya zi puPi Hahirot e taa tokola Efuta etiligane e taa yi mombuga Etam. Sho ye ende omasiku gatatu, oye ya kuMara noya yungu oontanda.

⁹Okuza kuMara oya yi kuElim noya yungile ko oontanda dhawo, oshoka nkoka okwa li omithima omulongo nambali dhi na omeya, nomilunga omilongo heyali.

¹⁰Oya zi po puElim e taa ka yunga oontanda mooha dhEkololo lyaSues.

¹¹Oya zi pEfuta lyomanenge noya ka yunga oontanda mombuga Sin.

¹²Oya zi mombuga Sin e taa ka yunga oontanda kuDofka.

¹³Oya zi kuDofka noya ka yunga oontanda muAlush.

¹⁴Oya zi kuAlush noya ka yunga oontanda muRefidim, nkoka ya li yaa na omeya gokunwa.

¹⁵Okuza kuRefidim sigo okondundu Hor oya yungu oontanda pomahala taga landula: ombuga Sinai, Kibrot Taava (nenge “Oombila dhomwamwa”), Hazerot, Ritma, Rimmon Perez, Libna, Rissa, Kehalata, ondundu Shefer, Harada, Makkelot, Tahat, Tera, Mitka, Hashmona, Moserot, Bene Jaakan, Hor Haggidgad, Jotbata, Abrona, Eziongeber, ombuga Zin (kokutya Kadesh) nondundu Hor kooha dhoshilongo Edom.

³⁸Omuyambi Aaron okwa londo kondundu Hor, ngaashi Omuwa a popi, e ta sile ko momumvo omutimilongone okuza mpoka Aaisraeli sho ya tembuka muEgipiti; osha li momwedhi omutitano esiku lyotango lyomwedhi.

³⁹Aaron sho a sile kondundu, okwa li e na omimvo 123.

⁴⁰Omukwaniilwa Omukaanani gwaArad, ngoka a li muumbugantu woshilongo Kaanan, okwa kundana kutya Aaisraeli oya thiki.

⁴¹Okuza kondundu Hor sigo okolushandja lwaMoab Aaisraeli oya yungile oontanda pomahala taga landula: Zalmona, Punon, Obot, Iye Abarim moshilongo Moab, Dibon-Gad, Almon Diblataim, ondundu Abarim popepi nondundu Nebo nomolushandja lwaMoab kuuzilo waJordan ontega naJeriko.

⁴⁹Pomulonga Jordan oontanda dhawo odha li pokati kaBet Jeshimot naAbel Shittim molushandja lwaAkasia.

⁵⁰Omuwa okwa lombwele Moses molushandja lwaMoab pomulonga Jordan ontega naJeriko e ta ti:

⁵¹“Lombwela Aaisraeli u tye kuyo: Ngele tamu tokola Jordan mu ye kuKaanan,

⁵²tidhii mo aakwashilongo ayehe nokuteyagula po iimenka yawo ayihe ya hongwa memanya nenge ya hambulwa mosheela. Hanagulii po omitumbo dhawo adhihe dhiinonoma yuupagani.

⁵³Kwatii po oshilongo ne mu kale mo, oshoka otandi shi mu pe.

⁵⁴Topoleni evi pamazimo nopamaludhi geni mokuumba iihogololitho. Oludhi olunene nalu pewe oshitopolwa oshinene, noludhi olushona oshitopolwa oshishona.

⁵⁵Ihe ngele itamu tidha mo aakalimo yomoshilongo, mboka taa ka hupila mo, otaa ningi ya fa omakwega momeho geni noongona moombati dheni notaye mu kondjitha moshilongo.

⁵⁶Ngele itamu ya tidha mo, otandi ke mu hanagula, ngaashi nda dhiladhilile oku ya hanagula po.”