Read Oshindonga-Ombiimbeli Ondjapuki NUMERI 34 Bible Online

NUMERI 34 - Oshindonga-Ombiimbeli Ondjapuki bible

NUMERI 34

¹Omuwa okwa lombwele Moses a ti:

²“Lombwela Aaisraeli to ti: ‘Ngele tamu ka ya mevi Kaanan, oshilongo shoka tandi shi mu pe, oongamba otadhi ka kala, ngaashi tashi landula mpaka:

³Ongamba yokuumbugantu otayi ka taandela ya za kombuga Zin ya lambalala ongamba yaEdom. Otayi tameke muuzilo kohulo yokuumbugantu wEfuta lya sa.

⁴Okuza ketaulilo lyondundu Akrabbim, otayi goyokele lwokuumbugantu, tayi pitilile Zin sigo okuKadesh Barnea. Okuza nkoka otayi goyokele lwokuuningininombangalantu sigo okuHazar Addar nokuAzmon.

⁵Nkoka tayi goyokele lwokokamulonga pongamba yaEgipiti nokuhulila mEfuta lyopokati.’ ”

⁶Ongamba yokuuninginino oyo Efuta lyopokati.

⁷Ongamba yokuumbangalantu otayi landula ompola ya za kEfuta lyopokati sigo okondundu Hor,

⁸nokuza hoka oyu uka ketaulilo lyaHamat. Otayi tsikile sigo okuZedad

⁹nokuSifron notayi hulile puHazar Enan.

¹⁰Ongamba yokuuzilo otayi landula ompola ya za kuHazar Enan sigo okuSafam.

¹¹Otayi tsikile yu uka kuumbugantu kuRibla, kuuzilo waAin, nokoondundu komunkulo gwokuuzilo gwefuta lyaGalilea.

¹²Okuza nkoka ongamba otayi lambalala omulonga Jordan sigo Efuta lya sa. Ndhika odho oongamba ne dhevi lyeni.

¹³Moses okwa lombwele Aaisraeli a ti: “Ndika olyo evi ndyoka tamu ka taamba moku li umbila iihogololitho, evi ndyoka Omuwa e li gandja komazimo omugoyi netata.

¹⁴Omazimo gaReuben naGad netatazimo lyaManasse oga taamba nale oshitendelwa shago sha topolelwa omaludhi gago,

¹⁵kuuzilo waJordan ontega naJeriko.”

¹⁶Omuwa okwa lombwele Moses a ti:

¹⁷“Omuyambi Eleasar naJosua yaNun oyo taa ka tendela aantu evi.

¹⁸Kutha wo mezimo kehe omuwiliki gumwe, opo e ya kwathe mokutenda evi.”

¹⁹Omuwa okwa hogolola aalumentu mboka: [Ezimo] — [Omuwiliki] Juda — Kaleb kaJefunne Simeon — Shemuel yaAmmihud Benjamin — Elidad lyaKislon Dan — Bukki yaJogli Manasse — Hanniel yaEfod Efraim — Kemuel kaShiftan Sebulon — Elisafan lyaParnak Issaskar — Paltiel yaAsan Aser — Ahihud yaShelomi Naftali — Pedahel yaAmmihud

²⁹Mbaka oyo aalumentu mboka Omuwa e ya pe oshilonga shokutendela Aaisraeli evi lyaKaanan.