Read Oshindonga-Ombiimbeli Ondjapuki NAHUM 2 Bible Online

NAHUM 2 - Oshindonga-Ombiimbeli Ondjapuki bible

NAHUM 2

¹Ninive, oto ka ponokelwa! Ehanagulo olye ku adha! Indeni komahala gokwiipopila! Langeleni ondjila! Ilongekidhileni olugodhi!

²(Omuwa okwa hala okugalula esimano lyaIsrael, ngaashi lya li nale, manga aatondi ye inaaye li mu yuga.)

³Aakwiita aatondi oya humbata iikandekitho iitiligane noya zala omizalo dha fa ombinzi. Otaa ilongekidhile eponokelo! Omatembakwiita gawo otaga geta ga fa omulilo! Uukambe wawo tau nuka omalondo!

⁴Omatembakwiita otaga mbolokota momapandaanda, otaga kolokota momahalandjandja goshilando. Otaga adhima ngomalaka gomulilo notage ende ga fa olwaadhi.

⁵Aambala otaa hiywa ya gongale; otaa tantala, sho taa endelele yu uka komeho. Aaponokeli otaa matukile kekuma e taa yelutha oshikandekitho okushiga oshikumunithi shekuma.

⁶Omiyelo dhopomulonga dha mwakuka; uuwa wa shoshomekwa kuumbanda.

⁷Omunyekadhi ota kwatwa omupika; aadhike ye taa lili ya fa oonguti notayi ikwata pontulo koluhodhi.

⁸Aantu otaa gwaya mo muNinive ongomeya taga panuka mondama. Otaku igidhwa: “Kankameni! Thikameni!” Ihe kape na ngoka ta galuka.

⁹Yugeni oshisiliveli! Hakaneni oshingoli! Oshilando oshu udha omaliko!

¹⁰Ninive otashi hanagulwa po, tashi thigwa po, tashi mbugalekwa! Omitima otadhi kukuta kuumbanda; oongolo otadhi tifauka, oonkondo dha kana; iipala otayi pembe.

¹¹Oshilando oshi li peni ngashingeyi, shoka sha li sha fa ekololo lyoonime, ehala mpoka oonime oongundjuka dha paluthilwa, mpoka oondumentunime noonyalinime dha wapa okweenda nuunimegona wadho wu na okukala megameno?

¹²Onime oya dhipaga oshihakanwa shayo noye shi topolele oonkwawo nuunimegona wayo; oyu udhitha ekololo lyayo nonyama ya tudhwagulwa.

¹³Omuwa Omupangelinkondoawike ota ti: “Ngame onda ningi omutondi gweni! Omatembakwiita geni otandi ga fike po! Aakwiita yeni otaa ka dhipagelwa miita, notandi kutha po shaa shoka mwe shi kutha yalwe. Oonkondo dheni itadhi ku uvika we muuyuni.”