Read Oshindonga-Ombiimbeli Ondjapuki MARKUS 1 Bible Online

MARKUS 1 - Oshindonga-Ombiimbeli Ondjapuki bible

MARKUS 1

¹Elaka etoye tali popi Jesus Kristus, Omuna gwaKalunga, otali tameke naanaa,

²ngaashi kwa nyolwa membo lyomuhunganeki Jesaja: “Onkee ano otandi tumu omutumwa gwandje, e ku tetekele, opo e ku opalekele ondjila.

³Ewi lyanakwiigidha mombuga tali ti: ‘Longekidhileni Omuwa ondjila, yelekanitheni omapola ge!’ ”

⁴Johannes Omushashi okwa holoka mombuga noku uvitha kutya aantu nayi itedhulule e taa shashwa, Kalunga nota dhimi po oondjo dhawo.

⁵Kehe gumwe muJudea nomoshilando shaJerusalem okwe ya kuJohannes, oye okwe ya shashele momulonga gwaJordan, sho ya hempulula oondjo dhawo.

⁶Johannes okwa li a zala onguwo yiifufu yongamelo nepaya lyoshipa mombunda ye. Iikulya ye oya li oombahu nomagadhi goonyushi.

⁷Ye okwa uvitha ta ti: “Ngoka te ya konima yandje, oku vule ndje oonkondo. Ngame inandi gwana okunyongama, ndi dhitule omiya dhoongaku dhe.

⁸Ngame otandi mu shasha nomeya, ihe ye ote mu shasha nOmbepo Ondjapuki.”

⁹Pomasiku ngeyaka Jesus okwa zi kuNasaret shomuGalilea nokwa shashwa kuJohannes momulonga gwaJordan.

¹⁰Opo tuu mpoka Jesus sho a zi momeya, okwa mono egulu lye eguluka, nOmbepo ya fa onguti oye mu lambele.

¹¹Megulu nomwa zi ewi lya ti: “ongoye Omumwandje omuholike, onde ku hokwa.”

¹²Mbalambala Ombepo oya fala Jesus kombuga.

¹³Okwa menekele mombuga omasiku omilongo ne, a makelwa kuSatana nokwa kala mokati kiilikama; naayengeli oye ya e taye mu yakula.

¹⁴Johannes sho e edhililwa mondholongo, Jesus okwa yi kuGalilea nokuuvitha elaka ndika etoye lya zi kuKalunga

¹⁵a ti: “Ethimbo lya thiki, Oshilongo shaKalunga she ya popepi. Itedhululeni, mu itaale elaka etoye.”

¹⁶Manga Jesus a li ta kunkula nefuta lyaGalilea, okwa mono ko aamwayinathana, Simon naAndreas. Oya adhika taa umbile iiyulitho yawo mefuta, oshoka oya li aayuli yoohi.

¹⁷Jesus okwa ti kuyo: “Landulii ndje, ngame notandi mu ningi aayuli yaantu.”

¹⁸Mbalambala oye etha iiyulitho yawo e taye mu landula.

¹⁹Sho a humu ko ishewe kashona, okwa mono ko aana yaSebedeus, Jakob naJohannes. Oya li mowato taa andeke iiyulitho yawo.

²⁰Jesus okwe ya ithana, ye mu landule, noya thigi po he Sebedeus mowato pamwe naamati yiilonga e taye mu landula.

²¹Oyo ye ya moshilando shaKapernaum. Mesiku lyEsabati Jesus okwa yi mosinagoga nokwa tameke okulonga aantu.

²²Aantu oya kuminwa elongo lye, oshoka olya li li na oonkondo, hangaashi ndyoka lyaalongimpango.

²³Mosinagoga ndjoka omwa li mu na omulumentu e na ombepo ya nyata. Oye a popi mokule:

²⁴“Jesus Omunasareti, owe tu halela shike? Owe ya u tu yone po? Ondi ku shi kutya ongoye omuyapuki gwaKalunga.”

²⁵Jesus okwa ganda ombepo ya nyata a ti: “Mwena thilu, u ze mo muye!”

²⁶Ombepo ya nyata oye mu mbungambunga noonkondo noyi igidha newi enene e tayi zi mo muye.

²⁷Aantu ayehe oya kumwa noya tameke okupulathana taa ti: “Oshike shino? Elongo epe li na oonkondo? Oye ta ganda oombepo dha nyata, notadhi vulika kuye.”

²⁸Mbalambala oshiningwanima shika osha taandele muGalilea ashihe.

²⁹Ano sho ya zi mo mosinagoga, oya yi maandjawo yaSimon naAndreas pamwe naJakob naJohannes.

³⁰Ihe yinamweno yaSimon okwa li ta alukwa olwiidhi. Oyo ye mu popi nziya kuJesus.

³¹Jesus okwe ya nokwe mu kwata koshikaha e te mu kuutumbike. Olwiidhi olwe mu etha nokwa tameke oku ya yakula.

³²Pethimbo lyongulohi, etango lya ningina, aantu oye eta kuJesus aavu ayehe naanampwidhuli ayehe.

³³Aantu ayehe yomoshilando oya gongalele posheelo shegumbo.

³⁴Jesus okwa aludha ayehe mboka ya li ye na omavu gi ili nogi ili nokwa tidha mo oompwidhuli adhihe. Oompwidhuli ine dhi pitika, dhi popye, oshoka odha li dhi mu shi kutya oye olye.

³⁵Ongulangula manga inaaku sha, Jesus okwa penduka nokwa yi muuwike, a galikane.

³⁶Simon nosho wo mboka ya li pamwe naye, oya yi, ye ke mu konge.

³⁷Sho ye mu mono, oya ti: “Ayehe otaye ku kongo.”

³⁸Jesus okwe ya yamukula a ti: “Tu yeni momikunda dhopuushiinda, opo ndi uvithile mo wo, oshoka osho tuu shika nde shi endela.”

³⁹Onkee okwe ende muGalilea ashihe nokwa uvitha moosinagoga dhawo e ta tidha mo oompwidhuli.

⁴⁰Omulumentu omunashilundu okwe ya kuJesus, okwa tsu oongolo nokwe mu hehela a ti: “Ngele owa hala okwaaludha ndje, oto shi vulu.”

⁴¹Jesus okwe mu uvitile olukeno, okwa ganeke oshikaha she nokwe mu gumu e ta ti: “Onda hala, yela!”

⁴²Mbalambala oshilundu oshe mu etha nokwa yele.

⁴³Jesus okwe mu kumagidha noonkondo nokwe mu laleke mbala

⁴⁴e ta ti kuye: “Pulakena! Ino shi popya nando okulye, inda owala, u ki iyulike komuyambi, ngoye u gandje omagano gealuko ngoka gu uthwa kuMoses, opo ge ya ningile onzapo kutya owa aluka.”

⁴⁵Ihe omunashilundu sho a yi pondje, okwa tameke okuuvitha nokuhokolola oshinima shika akuhe. Onkee Jesus ina vula we okweenda puuyelele miilando, okwa yi komahala gaa na aantu. Nando ongawo, aantu yokoombinga adhihe oye ya kuye.