Read Oshindonga-Ombiimbeli Ondjapuki MARKUS 11 Bible Online

MARKUS 11 - Oshindonga-Ombiimbeli Ondjapuki bible

MARKUS 11

¹Ano sho ye ya popepi naJerusalem, opuBetfage naBetania, oya thiki kOndundu yooholivi. Jesus okwa tetekelitha yaali yomaalongwa ye

²e ta ti kuyo: “Indeni komukunda ngwiyaka gu li komeho geni. Ngele mwa thiki ko, otamu ka mona ontana yokasino ya pandekwa, ndjoka inaayi kayilwa nando onale komuntu. Yi pandukululeni mo ne mu yi ete nkuka.

³Ngele oku na ngoka te mu pula: ‘Otamu ningi shike?’ Mu lombweleni kutya Omuwa okwe yi pumbwa. Ye ote yi galula mbala.”

⁴Oyo ya yi noya mono ontana yokasino ya pandekelwa pondje muuyanda posheelo shegumbo e taye yi pandukulula mo.

⁵Ihe aantu yamwe mboka ya li ya thikama mpoka, oye ya pula ya ti: “Otamu ningi shike, otamu pandukulula ontana?”

⁶Oyo ya yamukula, ngaashi ya lombwelwa kuJesus, mbeyaka noye ya etha, ya ye.

⁷Oyo ye eta ontana yokasino kuJesus noya yala oonguwo dhawo pombunda yayo, Jesus e ta kuutumba ko.

⁸Ihe oyendji oya yala oonguwo mondjila, yakwawo ishewe oya tete iitayi yiihwa iitalala noye yi yaleke mondjila.

⁹Aantu mboka ya kwata komeho naamboka ya landula mo, oyi igidha ya ti: “Hosianna, Kalunga ne mu laleke nuuyamba ngoka te ya medhina lyOmuwa!

¹⁰Kalunga na laleke nuuyamba okuya kwoshilongo shatate David! Hosianna, Omukombandambanda!”

¹¹Jesus sho a thiki kuJerusalem, okwa yi motempeli nokwa tala, ayihe nkene ya tya. Ihe shoka etango olya adhika lya toka, okwa yi naalongwa ye omulongo nayaali kuBetania.

¹²Mesiku lya landula, sho ya li taa zi kuBetania, Jesus okwa li a sa ondjala.

¹³Okwa mono omukwiyu gu li kokule, gwa ziza nawa. Okwa yi kugwo, a tale, ngele ta mono mo oonkwiyu. Sho a yi ko, ina mona mo sha, omafo ageke, oshoka ethimbo lyoonkwiyu olya li inaali thika.

¹⁴Jesus okwa ti kugwo: “Mukwiyu ngoye, kaku na we ngoka ta li iiyimati yoye sigo aluhe.” Aalongwa nayo wo oye dhi uvu.

¹⁵Sho ye ya muJerusalem, Jesus okwa yi motempeli nokwa tameke okutidha mo aantu mboka ya li taa landa notaa landitha motempeli. Okwa tilehi iitaafula yaapingakanithi yiimaliwa niipundi yaahalithi yoonguti;

¹⁶ye ina pitika nando omuntu a humbata sha, a pitile motempeli.

¹⁷Okwe ya longo nokwa ti: “Inaku nyolwa nani: ‘Ongulu yandje oyi na okwiithanwa ongulu yegalikano yiigwana ayihe,’ ihe ne omwe yi ninga ombogo yaayugi.”

¹⁸Aayambi aakuluntu naalongimpango sho ye shi uvu, oya kongo ompito, ya dhipage Jesus. Ihe oya li ye mu tila, oshoka aantu ayehe oya kuminwa elongo lye.

¹⁹Sho kwa ningi ongulohi, Jesus naalongwa ye oya zi mo moshilando.

²⁰Ongula onene sho ya piti po, oya mono omukwiyu gwa sa sigo okomidhi.

²¹Petrus okwa dhimbulukwa oshiningwanima shoka nokwa ti kuJesus: “Tala, Muhongi, omukwiyu ngoka wa thingi, ogwa sa.”

²²Jesus okwa yamukula e ta ti kuyo: “Ngame otandi mu lombwele: Ngele omwi itaala Kalunga,

²³otamu vulu okulombwela ondundu ndjika: ‘Itumba po mpaka, u iyundulile mefuta.’ Ngele kamu na omalimbililo mune yene, ihe omwi itaala kutya shoka tamu ti, otashi ka ningwa, nena otamu shi ningilwa.

²⁴Onkee ano tandi mu lombwele: Shaa shoka tamu shi indile nokugalikana, itaaleni kutya omwe shi pewa, notamu ke shi pewa.

²⁵Nongele mwa thikama e tamu galikana, dhiminii po kehe tuu ngoka e mu ninga nayi, opo Ho yeni yomegulu wo a dhime po omayono geni.

²⁶[Ihe ngele ihamu dhimine po yakweni, nena naHo yeni yomegulu ita dhimi po omayono geni.”]

²⁷Oyo ya galukile kuJerusalem. Ano manga Jesus a li te ende motempeli, aayambi aakuluntu, nosho wo aalongimpango naakuluntu oye ya kuye

²⁸noye mu pula: “Okoonkondo dhalye ho longo ngeyi? Olye e ku pa epitikilo lyokuninga iinima ya tya ngeyi?”

²⁹Jesus okwe ya yamukula a ti: “Nangame wo otandi mu pula epulo limwe. Ngele otamu li yamukula, nena nangame wo otandi mu lombwele kutya okoonkondo dhalye tandi longo.

³⁰Lombwelii ndje! Okushasha kwaJohannes okwa zi peni; okuKalunga nenge omaantu?”

³¹Oya tameke okupatathana: “Natu tyeni ngiini? Ngele otwa yamukula: ‘OmuKalunga,’ ota ka tya: ‘Omolwashike ano inaamu itaala Johannes?’

³²Ihe ngele tatu ti: ‘Omaantu,’ nena otu na okutila aantu, oshoka aantu ayehe oya tala Johannes oye omuhunganeki.”

³³Oya yamukula Jesus ya ti: “Katu shi wo.” Nena Jesus okwa ti kuyo: “Ano nangame wo itandi mu lombwele, okoonkondo dhalye tandi longo ngeyika.”