Read Oshindonga-Ombiimbeli Ondjapuki MARKUS 3 Bible Online

MARKUS 3 - Oshindonga-Ombiimbeli Ondjapuki bible

MARKUS 3

¹Jesus okwa yi ishewe mosinagoga, moka mwa li mu na omulumentu e na oshikaha sha lemana.

²Aantu mboka ya li mo, oya langele Jesus, ye mu tale, ngele ote mu aludha mEsabati, opo ya wape oku mu tamaneka.

³Jesus okwa lombwele omulumentu ngoka e na oshikaha sha lemana a ti: “Hedha huka montaneho.”

⁴Opo okwe ya pula a ti “Oshike sha pitikwa okuningwa mEsabati, okulonga uuwanawa nenge okulonga uuwinayi, okuhupitha omwenyo gwomuntu nenge oku gu yona po?” Ihe oyo ya mwena owala.

⁵Jesus okwe ya tala noshipala sha lula ye a nika oluhodhi omolwokwaavulika kwawo. Nena okwa lombwele omulumentu ngoka a ti: “Utha oshikaha shoye.” Oye okwe shi utha, osho nosha aluka.

⁶Aafarisayi oya zi mo mosinagoga noya gongala nziya, ya kundathane naamboka ya gama kombinga yaHerodes, opo ya dhipage Jesus.

⁷Jesus okwa yi naalongwa ye komunkulo gwefuta lyaGalilea. Aantu oyendji oye mu landulile ko, ya zi muGalilea, kuJudea,

⁸Jerusalem, Idumea nahandiyaka yaJordan nosho wo popepi naTiro naSidon. Aantu oyendji ye thike mpoka oye ya kuJesus, oshoka oyu uvu shoka a li ta longo.

⁹Omolwowindji waantu Jesus okwa lombwele aalongwa ye, ye mu kalekele owato popepi, opo kaa thininikwe kaantu.

¹⁰Jesus okwa li a aludha aantu oyendji, onkee aavu ayehe oyi ithininikile puye, opo ye mu gume.

¹¹Aantu mboka ye na oombepo dha nyata sho ye mu mono, oya tsu oongolo koshipala she noyi igidha mokule ya ti: “Ongoye Omuna gwaKalunga!”

¹²Jesus okwa ganda oombepo dha nyata, dhaaye mu popye, kutya oye lye.

¹³Jesus okwa londo kondundu nokwi ithana aalumentu mboka ye mwene a hala, ye ye kuye.

¹⁴Oye nokwa hogolola aalongwa omulongo nayaali, ya kale puye e te ya luku aayapostoli. Okwe ya tumu, ya ka uvithe

¹⁵noya kale ye na oonkondo dhokutidha mo oompwidhuli.

¹⁶Mboka omulongo nayaali e ya hogolola, oyo: Simon, ngoka Jesus e mu luku wo Petrus;

¹⁷Jakob yaSebedeus nomumwayina Johannes, mboka Jesus e ya luku Boanerges, otali ti: aalumentu yendundumo lyomvula;

¹⁸Andreas, Filippus, Bartolomeus, Mateus, Tomas, Jakob yaAlfeus, Taddeus, Simon omulaadhi

¹⁹naJudas Iskariot, ngoka e mu gwaaleke.

²⁰Jesus okwe ya kaandjawo, naantu oyendji oya gongala ishewe. Onkee Jesus naalongwa ye inaa vula we okulya.

²¹Ihe aakwanezimo lye sho ye shi uvu, oya yi ko, ye ke mu kwate, oshoka oya ti: “Ota yi oonkwengu!”

²²Ihe aalongimpango mboka ya zi kuJerusalem oya ti: “OBelsebul, omukuluntu gwoompwidhuli e mu pe oonkondo dhokutidha mo oompwidhuli.”

²³Jesus okwi ithana aantu, ya hedhe kuye nokwe ya lombwele momayele e ta ti: “Satana ota vulu tuu okutidha mo Satana mukwawo?

²⁴Oshilongo ngele tashi itsile ondumbo, nena oshilongo shoka itashi vulu okukala po.

²⁵Egumbo ngele tali itsile ondumbo, nena egumbo ndyoka itali vulu okukala po.

²⁶Osho wo Satana ngele ti ikondjitha noti itsile ondumbo, nena ita vulu okukala po, ota hulu po.

²⁷“Ihe kaku na ngoka ta vulu okugwayela megumbo lyomunankondo, e mu yuge eliko lye, okuninga ta manga tango omunankondo ngoka, opo ihe ta yugu egumbo lye.

²⁸“Ngame otandi mu lombwele: Oondjo adhihe nomasheko agehe, nando oga kale ge thike peni, aantu otaye ga dhiminwa po.

²⁹Ihe ngoka ta sheke Ombepo Ondjapuki, ke na mpoka na dhiminwa po oondjo dhe sigo aluhe, oshoka ota kala e na oondjo dhaaluhe.”

³⁰Jesus okwa popi ngeyi, oshoka oya ti kutya oku niwe kombepo ya nyata.

³¹Yina yaJesus naamwayina aalumentu oye ya noya thikama pondje. Oya tumu kuye noye mu ithana, e ye kuyo.

³²Ihe ongundu yaantu oya kuutumba ya ngundumanena Jesus noye mu lombwele ya ti: “Tala, nyoko naamwanyoko oye li pondje, taye ku kongo.”

³³Jesus okwe ya yamukula a ti: “Meme naamwameme oolye?”

³⁴Oye okwa tala kumboka ya kuutumba puye nokwa ti: “Tala, meme naamwameme oyo mbaka.

³⁵Oshoka kehe tuu ngoka ta gwanitha ehalo lyaKalunga, oye omumwameme omulumentu nomumwameme omukiintu nameme.”