Read Oshindonga-Ombiimbeli Ondjapuki LUKAS 1 Bible Online

LUKAS 1 - Oshindonga-Ombiimbeli Ondjapuki bible

LUKAS 1

¹Omusimanekwa Teofilus! Aanyoli oyendji oya si oshimpwiyu shokutunga ehokololo lyiiningwanima mbyoka ya tsakanithwa mokati ketu.

²Oyo oya nyola shoka twa li twe shi hokololelwa kumboka ya li ya mono nomeho gawo okuza petameko noya ningi aayuvithi yoohapu.

³Onkee ano ngame wo sho nda konakona iinima ayihe okuza petameko, onde shi tala sho opala, ndi ku nyolele ehokololo lya yela, omusimanekwa Teofilus,

⁴opo u tseye nawa kutya omahokololo ngoka we ga longwa, ogoshili.

⁵Pethimbo ndyoka, uuna Herodes a li omukwaniilwa gwaJudea, okwa li ku na omuyambi, edhina lye Sakaria, gwometanga lyaAbia. Edhina lyomukiintu gwe oElisabet, gwomezimo lyaAron.

⁶Ayehe yaali oya li aayuuki koshipala shaKalunga, yaa na oshipwe noya vulika kiipango ayihe nokomautho agehe gOmuwa.

⁷Ihe oya li kaaye na oluvalo, oshoka Elisabet okwa li ihaa vala, yo ayehe yaali oya adhika ye li methimbo lyuukulupe.

⁸Esiku limwe Sakaria okwa li miilonga yokuyamba koshipala shaKalunga opalufo lwetanga lye.

⁹Pamukalo ngoka gwa li gwa landulwa kaayambi, Sakaria okwa hogololwa nokuumba oshihogololitho, a ka tsinine motempeli yOmuwa.

¹⁰Pethimbo lyokutsinina aantu ayehe oya kala pondje taa galikana.

¹¹Omuyengeli gwOmuwa, ngoka a thikama kombinga yokolulyo lwoshiyambelo hoka haku fikilwa omatsinino, okwi ihololele Sakaria.

¹²Sakaria sho e mu mono, okwa haluka a tila.

¹³Omuyengeli okwa ti kuye: “Sakaria, ino tila, egalikano lyoye olyu uvika. Omukiintu gwoye Elisabet ote ke ku valela okanona okamati, e to ka luku Johannes.

¹⁴Ngoye oto kala u udha enyanyu neligolo, noyendji yalwe otaa ka nyanyukilwa evalo lyako.

¹⁵Oshoka omunona nguka ota ka kala omunene koshipala shOmuwa. Oye ita nu omaviinu nenge oshinuwa kehe hashi kolitha. Oye te ku udha Ombepo Ondjapuki nomanga e li mela lyayina.

¹⁶Oyendji yomAaisraeli ote ya galulile kOmuwa, Kalunga kawo.

¹⁷Oye omutumwa gwOmuwa te ya e na ombepo noonkondo dhaElia. Oye ota hanganitha oohe noyana, ota galulile oonakwaavulika mondjila yu uka nota longekidha aantu, ya wape okutaamba Omuwa gwawo.”

¹⁸Sakaria okwa ti komuyengeli: “Shika otandi shi tseya ngiini? Oshoka ngame onda kulupa nomukiintu gwandje wo oku li methimbo lyuukulupe.”

¹⁹Omuyengeli okwe mu yamukula a ti: “Ongame Gabriel nda thikama koshipala shaKalunga, ngoka a tumu ndje, ndi ku lombwele nondi ku uvithile elaka ndika etoye.

²⁰Ano ngashingeyi pulakena: Sho ino itaala oohapu dhandje, oto ka kala itoo popi sigo esiku ndyoka ayihe nde yi ku lombwele tayi ka gwanithwa.”

²¹Aantu oya li ya tegelele Sakaria noya kumwa, sho a kala ethimbo ele unene motempeli.

²²Ano sho a zi mo, okwa li itaa vulu okupopya nayo. Aantu noya dhimbulula kutya okwa mono emoniko motempeli. Molwaashoka Sakaria okwa li itaa vulu okupopya nayo, okwe ya lombwele nokuninga omandhindhiliko niikaha.

²³Omasiku giilonga yomotempeli sho ga pu ko, Sakaria okwa shuna kegumbo.

²⁴Konima yomasiku omukulukadhi gwe Elisabet okwa ningi omusimba nokwa kala megumbo uule woomwedhi ntano inaa za mo nokwa ti:

²⁵“Shika onde shi ningilwa kOmuwa. Ngashingeyi Omuwa okwa sile ndje ohenda, sho a kutha ndje okudhinwa kaantu.”

²⁶Elisabet sho a ningi omusimba gwoomwedhi hamano, Kalunga okwa tumu omuyengeli Gabriel koshilando shomuGalilea, edhina lyasho Nasaret,

²⁷a ye komukadhona a yalekwa komulumentu, edhina lye Josef, gwomezimo lyaDavid. Edhina lyomukadhona oMaria.

²⁸Omuyengeli okwe ya kuye e ta ti: “Ombili nayi kale nangoye! Omuwa na kale pamwe nangoye ye ne ku yambeke!”

²⁹Maria okwa haluthwa kepopitho nokwe li dhiladhila kutya otali ti ngiini.

³⁰Omuyengeli okwa ti kuye ishewe: “Maria, ino tila, owa silwa ohenda kuKalunga.

³¹Oto ka ninga omusimba e to vala okanona okamati nou na oku ka luka Jesus.

³²Oye ta ningi omunene e ti ithanwa Omuna gwaKalunga gwokombandambanda. Omuwa Kalunga ote mu ningi omukwaniilwa ongaashi he David.

³³Oye ta ningi omukwaniilwa gwoluvalo lwaJakob sigo aluhe; nuukwaniilwa we kau na mpoka tau ka hula po.”

³⁴Maria okwa ti komuyengeli: “Otashi ka vulika ngiini, oshoka ngame omukadhona natango?”

³⁵Omuyengeli okwe mu yamukula a ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.

³⁶Tala, naElisabet omunezimo lyoye ngoka a popiwa kutya iha vala, okwa ningi ngashingeyi omusimba gwoomwedhi hamano, nonando okwa kulupa.

³⁷Oshoka kaku na shoka tashi nyenge Kalunga.”

³⁸Maria okwa ti: “Ongame omuntu gwOmuwa. Nandi ningwe ngaashi wa ti.” Omuyengeli nokwa zi po puye.

³⁹Pethimbo olyo tuu ndyoka Maria okwa thikama e ta yi nokweendelela koshilando shomuJudea, shi li momukunda gu na oondundu.

⁴⁰Maria sho e ya maandjaSakaria, okwa popitha Elisabet.

⁴¹Elisabet sho u uvu epopitho lyaMaria, okanona oka nyulukuta mela lye. Opo Elisabet oku udha Ombepo Ondjapuki

⁴²nokwa popi mokule a ti: “Kala wa yambekwa mokati kaakiintu aakweni, nosho wo okanona hoka to ka vala, naka yambekwe.

⁴³Osha zile ndje peni, yina yOmuwa gwandje sho te ya kungame?

⁴⁴Oshoka manga tuu ewi lyepopitho lyoye tali thiki momakutsi gandje, okanona oka nyulukuta kenyanyu mela lyandje.

⁴⁵Omunelago oongoka wi itaala kutya shoka to shi lombwelwa kOmuwa, otashi ka gwanithwa.”

⁴⁶Maria okwa ti: “Omwenyo gwandje otagu hambelele Omuwa,

⁴⁷ombepo yandje otayi nyanyukilwa Kalunga, omuhupithi gwandje,

⁴⁸oshoka okwa dhimbulukwa omuntu gwe mokwiishonopeka kwe. Okuza ngashingeyi aantu ayehe otaa ki ithana ndje omunelago,

⁴⁹oshoka Omuwa omunankondo okwa ningile ndje iinima iinene. Edhina lye olyo eyapuki.

⁵⁰Oye ta sile ohenda ayehe mboka haye mu tila yomomapipi agehe.

⁵¹Oye okwa longo iilongankondo. Oonakuholuuntsa okwe ya halakanitha po pamwe nomadhiladhilo gawo.

⁵²Aakwaniilwa aanankondo okwe ya kutha ko kiipangelapundi yawo, nokwa nenepeke aaishonopeki.

⁵³Mboka ya sa ondjala, okwe ya kutitha nuuwanawa, aayamba okwe ya tidha po ye li iikaha yowala.

⁵⁴Oye okwa dhiginine euvaneko ndyoka e li lombwele ootate. Oye e ya okukwatha omuntu gwe Israel,

⁵⁵nokwa dhimbulukwa okusila Abraham ohenda noluvalo lwe sigo aluhe.”

⁵⁶Maria okwa menekele puElisabet oomwedhi ndatu, opo ihe okwa shuna kaandjawo.

⁵⁷Ethimbo lyaElisabet lyokuvala sho lya thiki, okwa vala okanona okamati.

⁵⁸Aashiinda ye naanezimo sho yu uvu, nkene Omuwa e mu hololele esilohenda enene li thike mpoka, oya nyanyukwa pamwe naye.

⁵⁹Esiku etihetatu oye ya, ya fukaleke okanona, noya li ya hala ye ka lukile he Sakaria.

⁶⁰Ihe yina okwa ti: “Itashi vulika. Edhina lyako otali lukwa Johannes.”

⁶¹Oyo noya ti kuye: “Mezimo lyoye kamu na nando omuntu e na edhina ndyoka.”

⁶²Oyo noya lombwele he nokuninga omandhindhiliko niikaha, opo ye mu pule kutya okanona okwa hala ka lukwe edhina lini.

⁶³Oye okwi indile, a pewe okapelende kokunyolela nokwa nyolele mo kutya: “Edhina lyako oJohannes.” Aantu ayehe noya kumwa.

⁶⁴Opo tuu mpoka ewi lye olya thituluka nelaka lye olya manguluka, nokwa tameke okupopya e ta hambelele Kalunga.

⁶⁵Aantu ayehe yopuushiinda oya kwatwa kehaluko, nakehe gumwe gwomoshitopolwa shoka shoondundu muJudea oku uvu ayihe mbika ya ningwa.

⁶⁶Ayehe mboka ye shi uvu, oya pungula oohapu ndhika moomwenyo dhawo noya ti: “Okanona haka otaka ka kala ka tya ngiini?” Oyo oya dhimbulula kutya, oko oke li miikaha yOmuwa.

⁶⁷He Sakaria oku udha Ombepo Ondjapuki nokwa hunganeke a ti:

⁶⁸“Omuwa, Kalunga kaIsrael, na hambelelwe! Oshoka okwe ya okuhupitha nokumangulula aantu ye.

⁶⁹Oye okwe tu pe Omukulili ofule a zi mezimo lyomuntu gwe David.

⁷⁰Ngaashi aahunganeki ye aayapuki ye shi uvaneke nale kutya:

⁷¹Oye ote ke tu hupitha maatondi yetu nomiikaha yaayehe mboka ye tu tonde.

⁷²Shika ote shi ningi molwesilohenda lye ndyoka e li hololele ootate, sho ha dhimbulukwa ehangano lye eyapuki.

⁷³Oye okwa ganene tate yetu Abraham kutya,

⁷⁴ote ke tu hupitha miikaha yaatondi yetu, opo tu mu longele twaa na uumbanda,

⁷⁵tse tu ninge aayapuki naayuuki koshipala she omasiku getu agehe.

⁷⁶Ngoye okanona oto ki ithanwa omuhunganeki gwaKalunga gwokombandambanda, oshoka oto ka tetekela Omuwa, u mu opalekele ondjila.

⁷⁷Ongoye to ka tseyithila aantu ye ehupitho, uuna oondjo dhawo dha dhimwa po.

⁷⁸Oshoka Kalunga ketu oku na olukeno nesilohenda, onkee eluwa lyehupitho otali tu tendele, li tu minikile.

⁷⁹Tse mboka twa kuutumba momilema nomomuzizimba gweso, li ukithe oompadhi dhetu mondjila yombili.”

⁸⁰Omunona okwa koko nokwa kolo pambepo. Oye okwa kala mombuga sigo esiku ndyoka i ihololele Aaisraeli.