Read Oshindonga-Ombiimbeli Ondjapuki LUKAS 10 Bible Online

LUKAS 10 - Oshindonga-Ombiimbeli Ondjapuki bible

LUKAS 10

¹Konima yaambika Omuwa okwa hogolola aalongwa yalwe omilongo heyali nayaali nokwe ya tetekelitha, ya ye koshilando nokehala kehe hoka ye mwene e na okuya ko.

²Oye okwe ya lombwele a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.

³Indeni! Ngame otandi mu tumu ongoonzi mokati komambungu.”

⁴“Inamu humbata okampunda kiimaliwa nenge ompunda yokweenda nayo, hangaku koompadhi, ne inamu mana po ethimbo nokukunda aantu mondjila.

⁵Ngele tamu yi megumbo lyontumba, tyeni tango: ‘Ombili nayi kale megumbo ndika.’

⁶Ngele omu na omuntu e hole ombili, nena ekundo lyeni lyombili otali kala kuye; ihe ngele hasho, ombili yeni otayi mu galukile.

⁷Kaleni megumbo olyo tuu ndyoka, mu lye ne mu nwe shoka tamu shi pewa; oshoka nakulonga kehe oku na okupewa ondjambi ye. Inamu za megumbo limwe, mu ye kekwawo.

⁸Ngele tamu yi moshilando shontumba e tamu taambwa, lyeni shoka tamu shi pewa.

⁹Aludheni aavu yomoshilando shoka, ne mu ya lombwele mu tye: ‘Oshilongo shaKalunga she ya popepi nane.’

¹⁰Ngele tamu yi moshilando, ihe inamu taambwa, indeni komapandaanda gasho e tamu ti:

¹¹‘Ontsi yomoshilando sheni, ndjoka ya kakatela koompadhi dhetu, otatu yi pupula ko oku mu pa uusama. Ihe tseyeni kutya Oshilongo shaKalunga she ya popepi.’

¹²Ngame otandi mu lombwele: Sodom otashi ka ninga ihwepo, shi vule oshilando shoka mesiku ndyoka lyepangulo.”

¹³“Yayee ngoye Korasin! Yayee ngoye Betsaida! Oshoka ando muTiro nomuSidon mwa li mwa ningilwa iilongankondo mbyoka ya ningilwa mune, ando yo oyi itedhulula nale mokuzala omahahi nokukuutumba momutoko.

¹⁴Ihe Tiro naSidon otayi ka kala ihwepo yi mu vule mesiku ndyoka lyepangulo.

¹⁵Nangoye wo Kapernaum, oto ka lengwa sigo omegulu? Aawe, oto ka kulukithilwa sigo omoheli.”

¹⁶Jesus okwa ti kaalongwa ye: “Oongoka ta vulika koohapu dheni, oye ta vulika wo koohapu dhandje; ngoka itee mu taamba, ita taamba ndje; naangoka ita taamba ndje, ita taamba wo ngoka a tuma ndje.”

¹⁷Aalumentu omilongo heyali nayaali oya galuka yu udha enyanyu enene noya ti: “Omuwa, noompwidhuli wo sho twe dhi ganda medhina lyoye, odha vulika kutse.”

¹⁸Jesus okwa ti kuyo: “Onda mono Satana a gu megulu ongolwaadhi.

¹⁹Pulakeneni! Ne onde mu pa oonkondo dhokulyata omayoka noondje nokusinda oonkondo adhihe dhaSatana, nokaku na shoka tashi mu etele oshiponga.

²⁰Ihe inamu nyanyukilwa, oompwidhuli sho tadhi vulika kune; nyanyukilweni, omadhina geni sho ga nyolelwa membo lyomegulu.”

²¹Pethimbo tuu ndyoka Jesus oku udhithwa enyanyu kOmbepo Ondjapuki e ta ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona. Eeno, Tate, shika osho she ku opalela.”

²²“Iinima ayihe onde yi pewa kuTate. Kaku na ngoka a tseya kutya Omwana oye olye, oTate awike. Osho wo kaku na ngoka a tseya Tate oye olye, Omwana awike, naamboka Omwana a hogolola oku ye mu hololela.”

²³Jesus naalongwa ye sho ya li yi ikalele, okwe ya tala e ta ti kuyo: “Omeho geni oge na elago, sho taga mono iinima mbika mwe yi tala.

²⁴Oshoka otandi mu lombwele: Aahunganeki oyendji naakwaniilwa oya li ya hala nokuhalelela okumona mbyoka tamu yi tala, yo inaye yi mona, nokuuva ndhoka tamu dhi uvu, yo inaye dhi uva.”

²⁵Nena omunongompango gumwe okwe ya, a makele Jesus e ta ti: “Muhongi, ondi na okuninga shike, ndi mone omwenyo gwaaluhe?”

²⁶Jesus okwe mu yamukula a ti: “Omanyolo otaga ti ngiini? Oho ga fatulula ngiini?”

²⁷Oye okwa yamukula a ti: “ ‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe’; na: ‘Hola mukweni, ngaashi ngoye wi ihole mwene.’ ”

²⁸Jesus okwa ti kuye: “Owa yamukula mondjila, shi gwanitha e to kala u na omwenyo.”

²⁹Omunongompango sho a li a hala okwiiyulika kutya oye omuyuuki, okwa pula Jesus a ti: “Mukwetu olye?”

³⁰Opo Jesus okwa yamukula a ti: “Omulumentu gwontumba okwa li ta zi kuJerusalem u uka kuJeriko nokwa adhika kaayugi. Oye mu hula oonguwo noye mu mokagula e taye mu thigi e na okamwenyo okashona.

³¹Ohaluka omuyambi gwontumba okwa adhika te ende nondjila ndjoka. Sho e mu mono, okwa tsu moluha e te mu pitilile.

³²Osho wo Omulevi, sho e ya pehala mpoka, okwe mu mono nokwa tsu moluha e te mu pitilile.

³³Ihe Omusamaria manga a li te ende nondjila ndjoka, okwe ya po nokwa mono omulumentu ngoka a mona iihuna nokwa li e mu uvitile olukeno.

³⁴Oye okwa yi kuye nokwa panga iilalo ye nokutila mo omahooli nomaviinu e te yi manga. Oye okwe mu kayilike konkutsa ye nokwe mu sisidhile kongulu yaayenda e te mu hungu.

³⁵Esiku lya landula manga inaa ya, okwa kutha iimaliwa iisiliveli iyali nokwe yi pe mwene gwongulu yaayenda e ta ti kuye: ‘Hunga omuvu nguka, nuuna tandi ka galuka, otandi ke ku galulila ashihe shoka we mu futile.’ ”

³⁶Jesus okwa ti: “Ano pandunge dhoye oguni po gwaambaka yatatu a kala omukwawo gwaanguka a adhikile kaayugi?”

³⁷Omunongompango okwa yamukula a ti: “Oye ngoka e mu sile ohenda.” Jesus okwa ti kuye: “Nangoye wo inda, u ka ninge ngaaka.”

³⁸Jesus naalongwa ye oya tsikile ondjila yawo noye ya komukunda gwontumba. Omukiintu gumwe edhina lye Marta okwe mu taamba maandjawo.

³⁹Oye okwa li e na omumwayina, edhina lye Maria, ngoka a li a hokwa okukuutumba poompadhi dhOmuwa nokwa pulakene oohapu dhe.

⁴⁰Ihe Marta okwi ipyakidhile unene niilonga nokwe ya kuJesus e ta ti: “Omuwa, ku na ko nasha nangame, omumwameme sho e etha ndje, ndi yakule awike? Mu lombwela, e ye, a kwathe ndje.”

⁴¹Omuwa okwe mu yamukula a ti: “Marta, Marta, ou na iimpwiyu oyindji nowa piyagana,

⁴²ihe oshinima shimwe shi na oshilonga, osho shika: Maria okwi ihogololele ombinga ombwanawa itee yi kuthwa nando okulye.”