Read Oshindonga-Ombiimbeli Ondjapuki LUKAS 17 Bible Online

LUKAS 17 - Oshindonga-Ombiimbeli Ondjapuki bible

LUKAS 17

¹Jesus okwa ti kaalongwa ye: “Omahongololo oge na okuya, ihe yayee omuntu ngoka, te ga eta!

²Ngoka ta hongolola kamwe komuushona mbuka, okwa gwana, a mangelwe emanya edhigudhigu mothingo ye e tu umbilwa muule wefuta.

³Onkee ano ikotokeleni!” “Mukweni ngele a yono, mu pukulula, nongele i itedhulula, mu dhimina po.

⁴Ngele ta yono kungoye luheyali mesiku, note ya kungoye meyono kehe ta ti: ‘Onda sa oluhodhi,’ mu pa ombili.”

⁵Aayapostoli oya lombwele Omuwa ya ti: “Tu gwedhela eitaalo.”

⁶Omuwa okwa yamukula: “Andola omu na eitaalo li thike pomuma yosinapi, ndjoka onshonanshona, otamu vulu okulombwela omuti nguka omunene: ‘Itumba po mpaka, u iyundulile mefuta!’ Notagu vulika kune.”

⁷“Tu tye, oku na omuntu mokati keni e na omumati gwe ta longo mepya nenge ta litha iimuna. Nge a zi kepya, mwene gwe ote mu lombwele tuu ta ti: ‘Endelela nziya, u lye’?

⁸Aawe ndishi, ihe ote mu lombwele: ‘Pakela ndje po uulalelo e to izaleke, u yakule ndje, manga tandi li e tandi nu. Opo ihe oto vulu okulya e to nu.’

⁹Omumati ngono a longo owala shoka a lombwelwa, ndishi ita pandulwa?

¹⁰Ano osho nane wo ngele omwa gwanitha owala ayihe mbyoka mwe yi lombwelwa, omu na okutya: ‘Otse aamati aahethi, sho twa longo owala shoka twa li tu na oku shi longa.’ ”

¹¹Jesus sho a li mondjila ta yi kuJerusalem, okwe ende ta kunkula nongamba yopokati kaSamaria naGalilea.

¹²Sho e ya momukunda gumwe, okwa tsakanekwa kaalumentu aanashilundu omulongo. Oyo oya thikama kokule naye

¹³noyi igidha ya ti: “Muhongi Jesus, tu sila ohenda!”

¹⁴Jesus okwe ya tala nokwa ti kuyo: “Indeni, mu ki iyulike komuyambi.” Ano manga ya li mondjila taa yi, oya aluka.

¹⁵Ihe gumwe gwawo sho a mono a aluka, okwa galukile kuJesus, ye ta hambelele Kalunga newi lyopombanda.

¹⁶Oye okwi ihata poompadhi dhaJesus e te mu pandula. Omulumentu nguka okwa li Omusamaria.

¹⁷Opo Jesus okwa ti: “Aalumentu mboka ya aludhwa kaya li omulongo? Omugoyi oye li peni?

¹⁸Omolwashike omukwiilongo nguno oye awike a galuka, a hambelele Kalunga?”

¹⁹Jesus okwe mu lombwele: “Thikama, u ye; eitaalo lyoye lye ku aludha.”

²⁰Aafarisayi yamwe oya pula Jesus kutya Oshilongo shaKalunga otashi ya uunake. Oye okwe ya yamukula a ti: “Oshilongo shaKalunga itashi ya shi na omandhindhiliko taga monika nomeho.

²¹Kaku na ngoka ta ka tya: ‘Tala, osho shika nenge osho shiyaka.’ Oshoka Oshilongo shaKalunga oshi li meni mune.”

²²Nena Jesus okwa lombwele aalongwa a ti: “Otaku ke ya ethimbo, uuna tamu ka hala okumona nando esiku limwe lyOmuna gwOmuntu, ihe itamu ke li mona.

²³Otaku ka kala mboka taye mu lombwele taa ti: ‘Tala, hwiyaka,’ nenge: ‘Tala, huka.’ Ano inamu ya ko ne inamu ya landula.

²⁴Oshoka ngashika olwaadhi talu adhima okuza kombinga yimwe sigo okonkwawo, osho wo Omuna gwOmuntu ta ka kala mesiku lye.

²⁵Ihe tango oku na okuhepekwa nomahepeko ogendji nokweekelwahi kaantu yopethimbo ndika.

²⁶Oshoka ngaashi sha li pomasiku gaNoa, osho tuu wo tashi ka kala pomasiku gOmuna gwOmuntu:

²⁷Aantu oya li ye hole okulya nokunwa, okuhokana nokuhokanitha, sigo esiku ndyoka Noa a yi monguluwato, eyelu nolye ya e tali ya hanagula po ayehe.

²⁸Otaku ka kala, ngaashi sha li pethimbo lyaLot. Aantu oya li ye hole okulya nokunwa, okulanda nokulanditha, okukuna nokutunga.

²⁹Esiku ndyoka Lot sho a zi mo muSodom, omulilo nomamanya gosulufuli oya gu kegulu, noya hanagulwa po ayehe.

³⁰Ano osho tashi ka kala wo nomesiku ndyoka lyOmuna gwOmuntu ta ka holoka.

³¹“Mesiku ndyoka ngoka ta adhika kombanda yongulu a thiga iinima ye megumbo, ina kuluka ko, e ke yi tale; osho tuu wo ngoka ta adhika mepya, ina galukila megumbo.

³²Dhimbulukweni omukiintu gwaLot!

³³Oongoka ta kambadhala okuhupitha omwenyo gwe, ote gu kanitha, naangoka te gu kanitha, ote gu hupitha.

³⁴Otandi mu lombwele: Uusiku mbwiyaka otaku ka kala aantu yaali ya lala montala yimwe; gumwe ta kuthwa po, mukwawo ta thigwa po.

³⁵Aakiintu yaali taa tsu poshini; gumwe ta kuthwa po, mukwawo ta thigwa po.

³⁶Aalumentu yaali ye li mepya; gumwe ta kuthwa po, mukwawo ta thigwa po.”

³⁷Aalongwa oye mu pula ya ti: “Openi, Omuwa?” Jesus okwa yamukula a ti: “Kokuma nkoka ku na omudhimba, oko haku gongala oontsa.”