Read Oshindonga-Ombiimbeli Ondjapuki LUKAS 21 Bible Online

LUKAS 21 - Oshindonga-Ombiimbeli Ondjapuki bible

LUKAS 21

¹Jesus okwa lengalenga nokwa mono, aayamba nkene taa tula omagano moshiketha shotempeli.

²Nena okwa mono omuselekadhi gumwe ohepele a tula mo uupeni uyali.

³Oye okwa ti: “Otandi mu lombwele kutya kape na omalimbililo, omuselekadhi nguka ohepele okwa tula mo oshindji e vule ayehe yalwe.

⁴Oshoka ayehe mboka oya tula mo, ya kutha muuyamba wawo, ihe omuselekadhi moluhepo lwe okwa gandja ashihe shoka a li e shi na, iipalutha ye ayihe.”

⁵Yamwe yomuyo sho ya popi kombinga yotempeli, nkene ya tungwa nomamanya go opala noya zalekwa nomagano ngoka ga pewa Kalunga, Jesus okwa ti:

⁶“Omu yi wete ayihe mbino; omasiku otage ke ya, uuna itaapa ka thigwa nando emanya lya tentekwa kekwawo inaali kumunwa po.”

⁷Oyo oye mu pula ya ti: “Muhongi, shika otashi ningwa uunake? Nendhindhiliko ndyoka tali ka holola kutya ethimbo lya thiki, mbika yi ningwe, olini?”

⁸Jesus okwa ti: “Kotokeni, mwaa pukithwe. Oshoka otaku ka holoka aantu oyendji medhina lyandje taa iti kutya oyo ngame notaa ti kutya ethimbo olya thika. Ihe inamu ya landula.

⁹Inamu tilithwa, ngele tamu uvu oonkundana dhiita nomapiyagano. Mbika oyi na okuningwa, ihe ehulilo inali thikana natango.”

¹⁰Oye okwe ya lombwele natango a ti: “Iigwana otayi ka thikama okukondjithathana, niilongo otayi ka matukilathana.

¹¹Otaku ke ya omakakamo gevi omatilithi, oondjala nomalega koombinga noombinga. Kegulu otaku ka holoka iitilithi iinene nomandhindhiliko omakumithi.”

¹²“Manga ayihe mbika inaayi ningwa, otamu ka kwatwa notamu ka tidhaganwa. Otamu ka falwa koompangu moosinagoga e tamu ke edhililwa mondholongo. Otamu ka falwa wo kiipala yaakwaniilwa noyomalenga omolwandje.

¹³Otashi ka kala ompito yeni, mu ninge oonzapo dhokupopya oshili mokati kawo.

¹⁴Ilongekidheni ano, mwaa kale mu na oshimpwiyu kutya otamu ki ipopila ngiini.

¹⁵Oshoka ngame otandi ke mu pa iitya noondunge tadhi nyenge aatondi yeni ayehe oku mu kondjitha noku mu ludhikitha.

¹⁶Otamu ka gandjwa miikaha yaatidhagani kaakuluntu yeni, kaamwanyoko aalumentu, kaanezimo nokookuume keni; yamwe yomune otaye ke ya dhipaga.

¹⁷Otamu ka tondwa kwaayehe omolwandje.

¹⁸Ihe one otamu kala mwa gamenwa, nefufu limwe lyokomitse dheni itali kana.

¹⁹Mokwiidhidhimika otamu ihupithile oomwenyo dheni.”

²⁰“Uuna tamu mono, Jerusalem sha kondekwa komatanga gaakwiita, tseyeni kutya oshi li popepi nokuhanagulwa po.

²¹Nena ayehe mboka ye li muJudea, naa tembukile koondundu; naamboka ye li moshilando shoshene, naa fadhuke po; naamboka taa adhika kondje yasho, inaa galukila mo.

²²Oshoka ngaka ogo omasiku ngoka Kalunga ta geele Aaisraeli, opo Omanyolo ga tsakanithwe ngoka taga ti:

²³Yayee aasimba naamwali yopomasiku ngoka! Oshoka uudhigu uunene otau ka adha oshilongo shika, nondjahi yaKalunga otayi ke ya kombanda yaantu mbaka.

²⁴Oyo otaa ka sa kegongamwele notaa ka falwa muupika miilongo ayihe. Aapagani otaa ka lyatagula Jerusalem, sigo ethimbo lyawo lya hulu po.

²⁵“Otaku ka holoka omandhindhiliko ketango, komwedhi nokoonyothi. Aantu ayehe yokombanda yevi otaa ka limbililwa notaa ka tilithwa kepopomo lyefuta nokomakuthikuthi galyo.

²⁶Aantu otaa ka sa omoluumbanda mokutegelela mbyoka tayi ka adha evi alihe, oshoka oonkondo dhomewangandjo otadhi ka tukuluka.

²⁷Oyo otaa ka mona Omuna gwOmuntu te ya te endele moshikogo e na oonkondo odhindji neadhimo.

²⁸Ano mbika ayihe ngele tayi tameke okuningwa, yelutheni omitse dheni, mu ukilila nokutegelela, oshoka ehupitho lyeni lya thiki popepi.”

²⁹Nena Jesus okwe ya lombwele eyele a ti: “Dhiladhileni omukwiyu nosho wo omiti dhilwe.

³⁰Omafo gadho ngele taga mbunyuka, nena omu shi shi kutya othinge oyi li popepi.

³¹Ano osho wo, ngele tamu mono ayihe mbika tayi ningwa, kaleni mu shi shi kutya Oshilongo shaKalunga oshi li popepi.

³²“Ongame tandi mu lombwele: Aantu mboka ye na omwenyo ngashingeyi, itaa si, manga ayihe mbika inaayi gwanithwa.

³³Egulu nevi otayi hulu po, ihe oohapu dhandje kadhi na mpoka tadhi hulu po.”

³⁴“Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopauyuni, opo esiku ndyoka lyaaye mu adhe ombaadhilila.

³⁵Oshoka otali ya ongomwigo, tali akele aantu ayehe kombanda yevi alihe.

³⁶Tonateni, ne mu galikane ethimbo kehe, mu mone oonkondo dhoku mu pititha mumbika ayihe tayi ka ningwa, nokuthikama koshipala shOmuna gwOmuntu.”

³⁷Momasiku ngoka Jesus okwa longo aantu motempeli pethimbo lyomutenya, ihe uusiku ngele we ya, oha yi, a ka lale kOndundu yooholivi.

³⁸Aantu ayehe oya meneka ongula onene e taa yi kotempeli, ye ke mu pulakene.