Read Oshindonga-Ombiimbeli Ondjapuki LUKAS 23 Bible Online

LUKAS 23 - Oshindonga-Ombiimbeli Ondjapuki bible

LUKAS 23

¹Ongundu ayihe yaantu oya thikama noya fala Jesus kuPilatus.

²Oyo oya tameke oku mu tamaneka taa ti: “Omulumentu nguka otwe mu kwata, oshoka ota pukitha aantu note ya indike okugandja oompale komupangeli Omuroma, ye ti iti kutya oye Kristus, omukwaniilwa.”

³Pilatus okwe mu pula a ti: “Ongoye omukwaniilwa gwAajuda?” Jesus okwe mu yamukula: “Osho wa ti.”

⁴Nena Pilatus okwa lombwele aayambi aakuluntu nongundu ayihe a ti: “Kandi wete etompelo lyokupa omulumentu nguka oondjo.”

⁵Ihe aatamaneki oya dhiginine noonkondo ya ti: “Oye ota piyaganeke aantu nelongo lye. Oye okwa tameke muGalilea nokwe ende muJudea ashihe sigo oompaka.”

⁶Ano Pilatus sho e shi uvu, okwa pula a ti: “Omulumentu nguka Omugalilea?”

⁷Sho a kundana kutya Jesus okwa za koshitopolwa shoka shi li mepangelo lyaHerodes, okwe mu tumu kuHerodes, oshoka Herodes okwa li muJerusalem pethimbo ndyoka.

⁸Herodes okwa nyanyukwa unene, sho a mono Jesus, oshoka okwa adhika e mu uvu owala nokwa kala ethimbo ele e na ehalo oku mu mona; unene okwa kala a hala, a mone Jesus ta longo oshikumithalonga.

⁹Ano Herodes sho a pula Jesus omapulo ogendji, Jesus ina yamukula nando osha.

¹⁰Aayambi aakuluntu naalongimpango oye ya po noya lundile Jesus ye na uulaadhi.

¹¹Nena Herodes pamwe naakwiita ye oye mu dhini noye mu sheke. Oyo oye mu zaleke onguwo onene yesimano. Herodes nokwe mu shunitha kuPilatus.

¹²Okuza kesiku tuu ndyoka Herodes naPilatus oya panga ihe uukuume, oshoka nale oya li ye tondathane.

¹³Pilatus okwa gongele aayambi aakuluntu, aakuluntu Aajuda naantu yalwe

¹⁴e ta ti kuyo: “One omwe eta omulumentu nguka kungame tamu ti kutya ota pukitha aantu. Ngashingeyi onde mu pula nokuli montaneho yeni amuhe, ihe inandi mona muye nando eyono limwe ndyoka tamu mu tamanekele.

¹⁵Herodes wo sho inee mu mona e na oondjo, okwe mu shunitha kutse. Omulumentu nguka ina ninga nando osha shoku mu dhipagitha.

¹⁶Onda hala ndi mu dhengithe e tandi mu etha, a ye.” [

¹⁷Pethimbo kehe lyoshituthi shOpaasa Pilatus ohe ya mangululile onkwatwa yimwe.]

¹⁸Nena aantu ayehe oyi igidha mokule ya ti. “Na dhipagwe! Tu mangululila Barabbas!”

¹⁹Barabbas okwa li e edhililwa mondholongo omolwekolokosho ndyoka lya li lya holoka moshilando nomolwedhipago.

²⁰Pilatus okwe ya tseyithile ishewe kutya okwa hala okumangulula Jesus.

²¹Ihe oyo oyi igidha mokule ya ti: “Na alelwe, na alelwe komushigakano!”

²²Pilatus okwe ya pula olutitatu a ti: “Uuwinayi owashike ano ningi? Ngame inandi mu mona e na oondjo dhoku mu dhipagitha. Otandi mu dhengitha owala e tandi mu etha.”

²³Ihe oya dhiginine okwiigidha mokule taa ti kutya Jesus na alelwe komushigakano. Neigidho lyawo olya sindana.

²⁴Nena Pilatus okwa tokola, ehalo lyawo li gwanithwe.

²⁵Oye okwa mangulula omulumentu ngwiyaka taa pula, ngoka a li a tulwa mondholongo omolwekolokosho nedhipago, nokwa gandja Jesus miikaha yawo, ye ke mu ninge ngaashi ya hala.

²⁶Oyo oya yi naJesus. Mokweenda kwawo oya tsakaneke Simon, omulumentu Omukireni, a li ta zi kepya u uka moshilando. Aakwiita oye mu thikamitha noye mu tsike omushigakano komapepe ge, e gu humbate konima yaJesus.

²⁷Ongundu onene yaantu oya landula Jesus. Mokati kawo omwa li aakiintu mboka ya li taa lili notaa hekumuna omolwe.

²⁸Jesus okwa punguluka nokwe ya tala e ta ti. “Aakiintu Aajerusalem, inamu lila ndje, ihe ilileni ne yene naana yeni.

²⁹Oshoka omasiku otage ke ya, uuna aantu taa ka tya: ‘Aakiintu aanelago oomboka inaa mona uunona, inaa vala yo inaa yamutha.’

³⁰Pethimbo ndyoka aantu otaa ka popya taa ti: ‘Oondundu, tu gwileni! iikulundundu, tu siikileni!’

³¹Oshoka omuti omutalala ngele otagu ningwa ngeyi, nena omuti omukukutu otagu ningwa ngiini?”

³²Jesus okwa falwa, a ka dhipagwe pamwe naalumentu aakolokoshi yaali.

³³Sho ya thiki kehala ndyoka lyi ithanwa Oshala sholukwe, oko ya alele Jesus komushigakano pamwe naakolokoshi mboka yaali komishigakano dhawo, gumwe okolulyo lwe nomukwawo okolumoho lwe.

³⁴Jesus okwa ti: “Tate, ya dhimina po oondjo dhawo, oshoka inaa tseya shoka taa ningi.” Oyo oya topolelathana oonguwo dhe pamukalo gwoku dhi umbila oshihogololitho.

³⁵Aantu oya thikama mpoka noye mu tala, manga aakuluntu Aajuda ye mu sheke ya ti: “Okwa li ha hupitha aantu yalwe, ni ihupithe ano, ngele oye Kristus, omuhogololwa gwaKalunga.”

³⁶Aakwiita wo oye mu sheke; oyo oye ya kuye noye mu pe omaviinu omalulu

³⁷e taa ti: “Ihupitha ano, ngele ngoye omukwaniilwa gwAajuda.”

³⁸Oohapu ndhika odha li dha nyolwa kombanda yomutse gwe: “Nguka oye omukwaniilwa gwAajuda.”

³⁹Gumwe gwomaakolokoshi okwe mu sheke wo a ti: “Ongoye Kristus? Ihupitha ano, u tu hupithe wo.”

⁴⁰Nena mukwawo okwe mu ganda a ti: “Iho tila Kalunga? Natse otu li megeelo olyo ndyoka.

⁴¹Okuhepekwa kwetu oku li mondjila, sho tatu ningilwa shoka twe shi ilongela, ihe nguka ina ninga nando uuwinayi washa.”

⁴²Oye okwa ti kuJesus: “Jesus, dhimbulukwa ndje ngele wa thiki mOshilongo shoye.”

⁴³Jesus okwa ti kuye: “Ongame tandi ku lombwele, nena tuu ndjika oto ka kala pamwe nangame mOparadisa.”

⁴⁴Pokati komutenya lwopotundi omulongo nambali etango inali minikila, onkee okwa ningi omilema moshilongo ashihe sigo opotundi ontintatu yokomatango.

⁴⁵Nena etopolitho lyotempeli olya tuuka pokati.

⁴⁶Jesus okwi igidha mokule a ti: “Tate, omwenyo gwandje otandi gu gandja miikaha yoye.” Ano sho a popi ngeyi, okwa si.

⁴⁷Ano omukuluntu gwaakwiita sho a mono ayihe mbyoka ya ningwa po, okwa simaneke Kalunga a ti: “Kapu na omalimbililo, omulumentu nguka ke na oondjo.”

⁴⁸Aantu mboka ya gongalele okutala, sho ya mono shoka sha ningwa po, ayehe oya shuna komagumbo ya sa oluhodhi.

⁴⁹Aantu ayehe mboka ya li ye shaathane nawa naJesus, osho wo aakiintu mboka ye mu landula okuza kuGalilea, oya thikama kokule noya tala ayihe mbika.

⁵⁰Okwa li ku na omulumentu, edhina lye Josef, gwomuArimatia, oshilando shAajuda.

⁵¹Oye okwa li e na omikalo omiwanawa, he ende moshili nokwa kala a tegelela Oshilongo shaKalunga. Nonando oye okwa li oshilyo shoshigongi shaatokoli, ina zimina omatokolo niilonga yawo.

⁵²Oye okwa yi kuPilatus nokwe mu indile omudhimba gwaJesus.

⁵³Oye okwe gu kutha nokwe gu dhingile moshiyata oshitokele nokwe gu langeke mombila ya li ya hokwa memanya, inaamu tulwa nando nale omuntu.

⁵⁴Esiku olya li Etitano, nEsabati olya li pokutameka.

⁵⁵Aakiintu mboka ya li ya landula Jesus okuza kuGalilea, oya yi pamwe naJosef noya mono ombila nomudhimba mpoka gwa langekwa.

⁵⁶Ano sho ya shuna komagumbo, oya longekidha iizimba ya nika nawa nomugwayo, ya ka gwayeke omudhimba. MEsabati oya vululukwa, ngaashi shu uthwa kompango.