Read Oshindonga-Ombiimbeli Ondjapuki LUKAS 3 Bible Online

LUKAS 3 - Oshindonga-Ombiimbeli Ondjapuki bible

LUKAS 3

¹Omumvo omutimulongo nantano gwepangelo lyaTiberius, omupangeli Omuroma, Pontius Pilatus okwa li omuleli gwaJudea, naHerodes omuleli gwaGalilea, nomumwayina Filippus okwa li omuleli gwaIturea na Trakonitis, Lisanias okwa li omuleli gwaAbilene,

²Annas naKajafas oya li aayambi aakuluntu yayakwawo. Pethimbo olyo tuu ndyoka oohapu dhaKalunga odha adha Johannes, omuna gwaSakaria, mombuga.

³Johannes okwa yi komikunda adhihe dhopopepi nomulonga gwaJordan noku uvitha kutya aantu nayi itedhulule e taa shashwa, Kalunga nota dhimi po oondjo dhawo,

⁴ongaashi omuhunganeki Jesaja a nyola ta ti: “Ewi lyanakwiigidha mombuga tali ti: ‘Longekidhileni Omuwa ondjila, yelekanitheni omapola ge.’

⁵Omasilu agehe naga filwe po; oondundu niikulundundu ayihe nayi kumunwe po; oondjila dha goyoka nadhi ukililithwe; iisilukutumba nayi yelekanithwe.

⁶Aantu ayehe otaa ka mona ehupitho lyaKalunga.”

⁷Oongundu dhaantu odhe ya kuJohannes, ya shashwe kuye, nokwa ti kuyo: “Oluvalo lwomayoka ne, olye e mu londodha okuya ontuku egeelo lyaKalunga ndyoka tali ya?

⁸Imikeni ano iiyimati mbyoka tayi holola kutya omwi itedhulula. Inamu tameka okupopya mu tye: ‘Tse otu na tate Abraham,’ oshoka otandi mu lombwele: Kalunga ota vulu okuyumudhila Abraham aanona momamanya ngaka.

⁹Ekuya olye egekwa nale nokuli pekota lyomuti. Okehe tuu omuti itaagu imi iiyimati iiwanawa, otagu kewa po e tagu umbilwa momulilo.”

¹⁰Aantu mbeyaka oya pula Johannes ya ti: “Natu ninge ngiini ano?”

¹¹Oye okwe ya yamukula a ti: “Kehe ngoka e na oohema mbali, na pe mukwawo ngoka kee na sha, naangoka e na iikulya, na pe mukwawo ngoka kee yi na.”

¹²Aafendelithi wo oye ya kuJohannes, e ya shashe, noye mu pula ya ti: “Tatekulu, otu na okuninga ngiini?”

¹³Oye okwa ti kuyo: “Inamu fendelitha sha pitilila.”

¹⁴Osho wo aakwiita oye mu pula ya ti: “Ongiini kombinga yetu? Otu na okuninga ngiini?” Oye okwe ya lombwele a ti: “Inamu yuga omuntu iimaliwa ye ne inamu kotokela. Kaleni mwa gwanenwa kondjambi yeni.”

¹⁵Aantu sho ya li mokutegelela, ayehe oya dhiladhila kutya, pamwe Johannes oye Kristus.

¹⁶Ihe Johannes okwe ya lombwele ayehe ta ti: “Ngame otandi mu shasha nomeya, ihe oku na gumwe ngoka e vule ndje oonkondo te ke ya. Ngame inandi gwana nande okudhitula omiya dhoongaku dhe. Oye ote ke mu shasha nOmbepo Ondjapuki nomulilo.

¹⁷Oye e na oshiyelitho miikaha ye. Ota kombo olupale lwe e ta yele. Iilya ote yi pungula miigandhi ye, ihe etutu ote li fike po nomulilo ihaagu dhimi po.”

¹⁸Johannes okwa kumagidha aantu nomakumagidho omakwawo ogendji nokwe ya uvithile elaka etoye.

¹⁹Omuleli Herodes okwa nyenyetelwa kuJohannes molwaashoka okwa adhika a hokana Herodias, omukiintu gwamumwayina, nomoluuwinayi ulwe kwa li e u ningi.

²⁰Uuwinayi u vule uukwawo Herodes e u ningi owo mbuka, sho e edhilile Johannes mondholongo.

²¹Aantu ayehe sho ya shashwa, Jesus naye wo okwa shashwa. Manga a li ta galikana, egulu olye eguluka,

²²nOmbepo Ondjapuki oya kuluka noye mu lambele yi na olupe lwolutu lwa fa lwonguti. Ewi nolya zi megulu lya ti: “Ongoye omumwandje omuholike, onde ku hokwa.”

²³Jesus sho a tameke okuuvitha, okwa li e na oomvula dhi thike lwopomilongo ndatu nokwa kala, ngaashi aantu ye mu dhiladhila kutya oye omuna gwaJosef yaeli,

²⁴lyaMatati gaLevi lyaMelki gaJannai gaJosef,

²⁵yaMatatias gaAmos yaNahum yaEsli lyaNangai,

²⁶yaMaat gaMatatias gaSemei yaJosek yaJoda,

²⁷yaJohanan yaResa lyaSerubbabel lyaShealtiel lyaNeri,

²⁸lyaMelki gaAddi yaKosam yaElmadam lyaEr,

²⁹lyaJosua yaElieser lyaJorim yaMatati gaLevi,

³⁰lyaSimeon yaJuda yaJosef yaJonam yaEliakim,

³¹lyaMelki gaMenna gaMatata gaNatan yaDavid,

³²yaIsai yaObed yaBoas yaSalmon yaNahshon,

³³yaAminadab yaAdmin yaArni yaHezron lyaPerez yaJuda,

³⁴yaJakob yaIsak yaAbraham yaTera yaNahor,

³⁵yaSerug lyaReu yaPelek yaEber lyaShela,

³⁶yaKainan yaArfaksad yaSem yaNoa yaLamek,

³⁷yaMetusala gaEnok lyaJared yaMahalalel gaKainan,

³⁸yaEnos lyaSet yaAdam yaKalunga.