Read Oshindonga-Ombiimbeli Ondjapuki JOHANNES 1 Bible Online

JOHANNES 1 - Oshindonga-Ombiimbeli Ondjapuki bible

JOHANNES 1

¹Ohapu oya li ko, manga uuyuni inaau shitwa. Ohapu oya li Kalunga nOhapu oya li Kalunga.

²Okuza ketamekolela Ohapu oya li puKalunga.

³Kalunga okwe mu shititha iinima ayihe, nokaku na nando oshinima shimwe shomeshito inaashi shitwa kee po.

⁴Ohapu oya li yi na omwenyo, nomwenyo ogwa ningi uuyelele waantu.

⁵Uuyelele mbuka owa minikile momilema, nomilema inadhi u dhima po.

⁶Okwa li ku na omulumentu a tumwa kuKalunga, edhina lye Johannes.

⁷Oye okwe ya, a hokololele aantu uuyelele, opo ayehe yi itaalithwe kuye.

⁸Haye mwene a li uuyelele, ihe okwe ya, a hokolole uuyelele.

⁹Uuyelele mbuka washili otau ya muuyuni, u minikile omuntu kehe.

¹⁰Ohapu okwa li muuyuni, naKalunga okwe mu shititha uuyuni, ihe uuyuni inau mu dhimbulula.

¹¹Oye okwe ya kumboka yaandjawo, naamboka yaandjawo inaye mu taamba.

¹²Ihe ayehe mboka ye mu taamba noye mu itaale, okwe ya pe oonkondo, ya ninge aana yaKalunga.

¹³Oyo inaa valwa pamukalo gwopanshitwe, nokutya kaye shi oluvalo lwomuntu, ihe oya valwa muKalunga.

¹⁴Ohapu nokwa ningi omuntu nokwa kala mokati ketu. Otse otwa tala eadhimo lye, eadhimo lyomuvalwa awike gwaHe. Oye okwa li u udha esilohenda noshili.

¹⁵Johannes okwe mu hokolola nokwi igidha a ti: “Nguka oye naanaa ngoka nde mu popile nda ti: ‘Ngoka te ya konima yandje, okwa li ndje komeho, oshoka okwa li ko, manga ngame nda li ndaa ko.’ ”

¹⁶Nomowindji wesilohenda lye tseni atuheni otwa pewa mo esilohenda lya gwedhele kesilohenda.

¹⁷Oshoka ompango Kalunga okwe yi gandja ya pitile muMoses, ihe esilohenda noshili oye etwa kuJesus Kristus.

¹⁸Kaku na omuntu a mono Kalunga nando olumwe, ihe Kalunga Omuvalwa awike ngoka e li puHe, oye e mu holola.

¹⁹Ndika olyo ehokololo lyaJohannes, Aajuda yomuJerusalem sho ya tumu kuye aayambi nAalevi oku mu pula: “Ongoye lye?”

²⁰Johannes ina tinda okuyamukula, ihe okwa hempulula sha yela a ti: “Hangame Kristus.”

²¹Oyo noye mu pula: “Ongoye lye ano? Ongoye Elia?” Oye okwa ti: “Aawe, hangame!” “Ongoye omuhunganeki?” Oye okwa yamukula. “Aawe.”

²²Oyo noya ti kuye: “Ongoye lye ano, opo tu fale eyamukulo kumboka ye tu tumu. Ngoye oto itile ngiini?”

²³Johannes okwa yamukula noohapu dhomuhunganeki Jesaja a ti: “Ongame ewi lyanakwiigidha mombuga tali ti: ‘Yelekanithileni Omuwa ondjila.’ ”

²⁴Aatumwa mboka oya li yomaafarisayi.

²⁵Oyo noya pula Johannes ya ti: “Omolwashike ano to shasha, ngele hangoye Kristus nenge Elia nenge omuhunganeki?”

²⁶Johannes okwe ya yamukula a ti: “Ngame otandi mu shasha nomeya, ihe mokati keni omwa thikama ngoka ne kaamu mu shi.

²⁷Ngoka te ya konima yandje, oye tuu ngoka inaandi gwana okudhitula omiya dhoongaku dhe.”

²⁸Iinima mbika oya ningilwa muBetania handiyaka yomulonga gwaJordan, nkoka Johannes a li ta shasha aantu.

²⁹Esiku lya landula Johannes okwa mono Jesus te ya kuye nokwa ti: “Tala, Onzigona yaKalunga, tayi kutha po oondjo dhuuyuni!

³⁰Ngoka oye naanaa ngoka nde mu popile nda ti: ‘Omulumentu te ya konima yandje, oye omunene, oshoka okwa li ko, manga ngame nda li ndaa ko.’

³¹Ngame onda li kaandi mu shi, ihe onde ya okushasha nomeya, opo a tseyithilwe Aaisraeli.”

³²Johannes okwe mu hokolola a ti: “Onda mono Ombepo ya kuluka megulu ya fa onguti noye mu lambele.

³³Ngame nonda li kaandi mu shi, ihe Kalunga, ngoka a tumu ndje okushasha nomeya, okwa lombwele ndje a ti: ‘Ngoka to mu mono ta lambelwa kOmbepo notayi kala kombanda ye, oye ngoka ta shasha nOmbepo Ondjapuki.’

³⁴Ngame onde shi mono notandi mu hokololele nokutya oye Omuna gwaKalunga.”

³⁵Esiku lya landula Johannes okwa li ko ishewe a thikama nayaali yomaalongwa ye.

³⁶Johannes sho a mono Jesus te ende po, okwa ti: “Tala, Onzigona yaKalunga.”

³⁷Aalongwa ye yaali oye mu uvu, sho ta popi ngaaka noya landula Jesus.

³⁸Nena Jesus okwa punguluka nokwe ya mono, sho taye mu landula, nokwa pula: “Otamu kongo shike?” Oyo oye mu yamukula: “Owa kala peni, Rabbi?” (Oshitya shika otashi ti “Muhongi.”)

³⁹Jesus okwa ti kuyo: “Ileni, mu tale!” Oyo sho ya yi naye, oya mono mpoka a kala noya kala puye oshihupe shesiku ndyoka. Otundi oya li ontine yokomatango.

⁴⁰Gumwe gwomaalongwa mbeyaka yaali mboka ya li yu uvu Johannes sho a popi noya landula Jesus, oAndreas, omumwayina gwaSimon.

⁴¹Andreas okwa tsakaneke tangotango omumwayina Simon nokwe mu lombwele a ti: “Tse otwa mono Omugwayekwa” (Oshitya shika otashi ti “Kristus.”)

⁴²Ye okwa fala Simon kuJesus. Jesus okwe mu tala nokwa ti: “Ongoye Simon yaJohannes; oto ki ithanwa Kefas,” (kokutya Petrus ndyoka tali ti “emanya”.)

⁴³Esiku lya landula Jesus okwa li a hala okuya kuGalilea. Okwa tsakaneke Filippus nokwa ti kuye: “Landula ndje.”

⁴⁴Filippus okwa li Omubetsaida, oshilando moka Andreas naPetrus ya kala mo.

⁴⁵Filippus okwa tsakaneke Natanael nokwa ti kuye: “Tse otwa mono omulumentu ngoka a nyolwa kuMoses membo lyompango nokaahunganeki. Oye Jesus, omuna gwaJosef Omunasareti.”

⁴⁶Natanael okwe mu pula a ti: “MuNasaret otamu vulu tuu okuza uuwanawa washa?” Filippus okwe mu lombwele. “Ila, u tale!”

⁴⁷Jesus okwa mono Natanael te ya kuye nokwe mu popi a ti: “Tala, Omwiisraeli gwashili, ngoka kee na nando iifundja!”

⁴⁸Natanael okwe mu pula a ti: “Owa tseya ndje ngiini?” Jesus okwa ti: “Onde ku mono, sho wa li momukwiyu, manga Filippus inee ku ithana.”

⁴⁹Natanael okwe mu yamukula a ti: “Muhongi, ongoye Omuna gwaKalunga! Ongoye Omukwaniilwa gwAaisraeli!”

⁵⁰Jesus okwe mu yamukula a ti: “Ngoye ndishi owi itaale owala, sho nde ku lombwele kutya onde ku mono, sho wa li momukwiyu? Oto ka mona iinima iinene yi vule mbika.”

⁵¹Jesus okwa ti kuyo: “Ngame otandi mu lombwele oshili: Otamu ka mona egulu lye eguluka, naayengeli yaKalunga taa londo notaa kulukile kOmuna gwOmuntu.”