Read Oshindonga-Ombiimbeli Ondjapuki JOHANNES 11 Bible Online

JOHANNES 11 - Oshindonga-Ombiimbeli Ondjapuki bible

JOHANNES 11

¹Omulumentu gumwe gwomuBetania, edhina lye Lasarus, okwa li ta alukwa. MuBetania omo maandjawo yaMaria nomumwayina Marta.

²Maria nguka oye ngoka a gwayekele oompadhi dhOmuwa nokwe dhi thetithile omafufu gokomutse gwe. Omumwayina nguka Lasarus okwa li ta alukwa.

³Nena aamwayina mboka aakiintu oya tumine Jesus elaka ya ti: “Omuwa, kuume koye omuholike ota alukwa.”

⁴Jesus sho e shi uvu, okwa ti: “Uuvu mboka itau ka fala Lasarus meso, ihe owokusimanekitha Kalunga, nOmuna gwaKalunga opo wo a simanekithwe kuwo.”

⁵Jesus okwa li e hole Marta, Maria naLasarus.

⁶Ye sho u uvu kutya Lasarus ota alukwa, okwa kala natango omasiku gaali pehala mpoka a adhika.

⁷Konima yomasiku ngoka gaali Jesus okwa lombwele aalongwa ye a ti: “Tu shuneni natango kuJudea.”

⁸Aalongwa oya ti kuye: “Muhongi, opwa piti okathimbo okashona kowala, sho Aajuda ya li taa kambadhala ya hala oku ku dhipaga. Ihe owa hala ishewe okushuna ko?”

⁹Jesus okwa yamukula a ti: “Omutenya kagu na ootundi omulongo nambali? Ngoka te ende omutenya, ita punduka, oshoka oku wete uuyelele womuuyuni mbuka.

¹⁰Ihe ngoka te ende uusiku, ota punduka, oshoka muye kamu na uuyelele.”

¹¹Jesus sho a popi oohapu ndhika, okwa ti kuyo: “Kuume ketu Lasarus okwa kotha, ihe ngame onda hala, ndi ye, ndi ke mu penduthe.”

¹²Aalongwa oye mu yamukula: “Omuwa, ngele okwa kotha, ota ka aluka.”

¹³Jesus okwa li ta popi okusa kwaLasarus, ihe yo oya li ye shi, ota popi okukotha kwoomposi.

¹⁴Onkee Jesus okwe ya lombwele sha yela ta ti: “Lasarus okwa sa.

¹⁵Ngame onda nyanyukwa molweni, sho inaandi adhika ko, opo mu itaale. Tu yeni ano kuye.”

¹⁶Nena Tomas, ngoka ithanwa Mukwanambwiyu, okwa lombwele aalongwa ooyakwawo a ti: “Natu yeni atuheni nomuhongi, opo tu ka sileni pamwe naye.”

¹⁷Jesus sho a thiki ko, okwa adha Lasarus a ninga nale omasiku gane mombila.

¹⁸Okalando hoka Betania oka li popepi naJerusalem, ookilometa ndatu lwaampoka.

¹⁹Oyendji yomAajuda oya adhika ye ya kuMarta naMaria oku ya hupulutha molweso lyomumwayina Lasarus.

²⁰Ano Marta sho u uvu kutya Jesus okwe ya, okwa yi e ke mu tsakaneke, ihe Maria okwa kala a kuutumba megumbo.

²¹Marta okwa ti kuJesus: “Omuwa, ando owa li po, ando omumwameme ina sa.

²²Ihe ondi shi shi kutya natango Kalunga ote ke ku pa ashihe shoka to mu indile.”

²³Jesus okwe mu lombwele: “Omumwanyoko ota ka yumuka.”

²⁴Marta okwa ti kuye: “Ondi shi shi kutya ota ka yumuka mesiku lyahugunina.”

²⁵Jesus okwe mu lombwele: “Ongame eyumuko nomwenyo. Oongoka i itaala ndje, ota kala e na omwenyo, nando ona se.

²⁶Osho wo kehe ngoka e na omwenyo ye i itaala ndje, ita si we sigo aluhe. Owe shi itaala?”

²⁷Ye okwa yamukula: “Eeno, Omuwa, ondi itaala kutya ongoye Kristus, Omuna gwaKalunga, ngoka e na okuya muuyuni.”

²⁸Marta sho a popi oohapu ndhika, okwa yi nokwi ithana omumwayina Maria, yi ikalela, e te mu lombwele: “Muhongi oku li mpaka e ku pumbwa.”

²⁹Maria sho e shi uvu, okwa thikama mbala e ta yi kuye.

³⁰Ihe Jesus okwa adhika inaa thika natango mokalando, okwa li natango kehala ndyoka Marta e mu tsakanekele.

³¹Nena Aajuda mboka ya adhika ye li naMaria megumbo taye mu hupulutha, sho ye mu mono a thikama ta piti mo nokweendelela, oye mu landula. Oya li ye shi, ota yi kombila, a ka lile.

³²Maria sho a thiki kehala ndyoka kwa li Jesus, okwe mu mono nokwa tsu oongolo poompadhi dhe e ta ti kuye: “Omuwa, ando owa li po, ando omumwameme ina sa.”

³³Ano Jesus sho e mu mono ta lili, nosho wo Aajuda mboka ye ya pamwe naye, okwa hendwa komutima noku uvite uudhigu meni lye.

³⁴Oye okwa pula: “Omwe mu fumvike peni?” Oyo oye mu yamukula: “Omuwa, ila u tale.”

³⁵Opo Jesus okwa lili.

³⁶Nena Aajuda oya ti: “Tala, nkene kwa li e mu hole.”

³⁷Ihe yamwe yomuyo oya ti: “Oye Okwa tonatitha omeho gomuposi. Okwa li ando a nyengwa okukeelela, Lasarus kaa se?”

³⁸Jesus okwa adhika ishewe kuudhigu momwenyo gwe e ta yi kombila, ndjoka ya li ekololo lya siikilwa nemanya.

³⁹Jesus okwe ya lombwele a ti: “Kuthii po emanya!” Marta, omumwayina gwomusi okwa ti kuye: “Omuwa, okwa nika nokuli, oshoka okwa ningi ngashingeyi omasiku gane a sa.”

⁴⁰Jesus okwa ti kuye: “Inandi ku lombwela kutya ngele owi itaala, oto ka mona eadhimo lyaKalunga?”

⁴¹Oyo oya kutha po emanya. Nena Jesus okwa tala pombanda e ta ti: “Tate, otandi ku hambelele, ongoye sho ho uvu ndje.

⁴²Ondi shi shi kutya ngoye oho uvu ndje aluhe, ihe otandi popi oohapu ndhika omolwaantu mbaka ya kundukidha ndje, opo yi itaale kutya ongoye wa tuma ndje.”

⁴³Sho a popi oohapu ndhika, okwi igidha newi enene a ti: “Lasarus, za mo!”

⁴⁴Nena Lasarus, ngoka a li a sa, okwa zi mo. Oompadhi dhe nomaako ge oya li ya mangwa nomalapi, noshipala she osha mangwa nonasituke. Jesus okwe ya lombwele: “Mu mangululeni, ne mu mu ethe, a ye.”

⁴⁵Oyendji yomAajuda mboka yi ile okuhupulutha Maria, oya mono shoka Jesus a ningi noye mu itaale.

⁴⁶Ihe yamwe yomuyo oya yi kaafarisayi noye ya hokololele shoka Jesus a ningi.

⁴⁷Nena aafarisayi naayambi aakuluntu oya hiya oshigongi shaatokoli e taa ti: “Otu na okuninga ngiini? Oshoka omulumentu nguka ota longo unene iikumithalonga oyindji.

⁴⁸Ngele otatu mu etha ngaaka, a tsikile nomukalo ngoka, aantu ayehe otaye ke mu itaala. Nena Aaroma otaa ke ya e taa hanagula po otempeli noshigwana shetu ashihe.”

⁴⁹Gumwe gwomuyo, edhina lye Kajafas, ngoka a li omuyambimukuluntu omumvo ngwiyaka, okwa ti: “Ne kamu na shoka mu shi.

⁵⁰Inamu tseya nani kutya okusa kwomuntu gumwe peha lyaantu ayehe okuhwepo ku vule okuyonukapo kwoshigwana ashihe?”

⁵¹Sho shene, ina popya oshinima shika muye mwene, aawe, ihe molwaashoka a li omuyambimukuluntu omumvo ngwiyaka, okwa hunganeke ngaaka kutya Jesus ota ka sila oshigwana shAajuda,

⁵²nohamolwoshigwana shAajuda ashike, ihe opo wo a kongolole aana yaKalunga ayehe mboka ye li po ya halakana, ya ninge ongundu yimwe.

⁵³Okuza kesiku ndyoka aakuluntu yAajuda oyu uvanene, ya dhipage Jesus.

⁵⁴Onkee ano Jesus ine enda we puuyelele mokati kAajuda, ihe okwa yi komukunda gu li popepi nombuga, koshilando shi ithanwa Efraim, e ta kala nkoka pamwe naalongwa ye.

⁵⁵Ano Opaasa, oshituthi shAajuda, oya li popepi. Aantu oyendji yokomikunda dhokokule oye ya kuJerusalem manga Opaasa inaayi thika, opo yi iyoge.

⁵⁶Oyo oya kongo Jesus. Sho ya gongalele motempeli, oya pulathana ya ti: “Otamu dhiladhila ngiini? Oye ote ya tuu koshituthi?”

⁵⁷Ihe aayambi aakuluntu naafarisayi oya adhika ya gandja nale elaka kutya ngele oku na ngoka e shi Jesus mpoka e li, ne shi holole, opo ye mu kwate.