Read Oshindonga-Ombiimbeli Ondjapuki JOHANNES 13 Bible Online

JOHANNES 13 - Oshindonga-Ombiimbeli Ondjapuki bible

JOHANNES 13

¹Olya li esiku lya tetekela lyOpaasa. Jesus okwa li e shi kutya ethimbo lye olya thikana okuthiga po uuyuni mbuka, a ye kuHe. Oye ngaashi a kala e hole mboka ye ya li muuyuni, okwa li e ya hole sigo opehulilo.

²Jesus naalongwa ye manga ya li puulalelo, omuhindadhi okwa adhika a tula nale etokolo muJudas yaSimon Iskariot a gwaaleke Jesus.

³Jesus okwa li e shi shi kutya He okwe mu pa iinima ayihe miikaha ye. Oye okwa li wo e shi shi kutya ye okwa za kuKalunga nota yi kuKalunga.

⁴Onkee okwa thikama poshililo, e ti ihula onguwo ye yokombanda nokwa kutha oshihanduke e te shi imanga mombunda.

⁵Oye okwa tile ihe omeya moshiyaha shokwiiyogela e ta tameke okuyoga oompadhi dhaalongwa nokwe dhi pyaanitha oshihanduke shoka e shi imanga mombunda.

⁶Okwe ya kuSimon Petrus. Nena Petrus okwa ti kuye: “Omuwa, ongoye to yogo oompadhi dhandje?”

⁷Jesus okwe mu yamukula a ti: “Shoka tandi ningi, ku shi shi manga ngashingeyi, ihe oto ke shi tseya komeho.”

⁸Petrus okwe mu lombwele: “Ku na mpoka noka yoga oompadhi dhandje sigo aluhe!” Jesus okwe mu yamukula: “Ngele itandi yogo oompadhi dhoye, nena ku shi we omulongwa gwandje.”

⁹Simon Petrus okwa yamukula: “Omuwa, ino yoga ashike oompadhi dhandje, ihe yoga wo iikaha yandje nomutse.”

¹⁰Jesus okwa ti: “Ngoka a yogwa okwa yela shekesheke ye ina pumbwa okwiiyoga ye mwene, kakele koompadhi dhe. Ne amuhe omwa yela, kakele kagumwe.”

¹¹Jesus okwa li a tseya nale ngoka te ke mu gwaaleka, onkee a ti: “Ne amuhe omwa yela, kakele kagumwe.”

¹²Ano Jesus sho a mana okuyoga oompadhi dhawo, okwa zala onguwo ye yokombanda nokwa shuna ishewe pehala lye. Okwa ti kuyo: “Omu uvite ko tuu shoka nde mu ningile?

¹³Ohamu ithana ndje Muhongi nOmuwa, noshu uka, sho hamu ningi ngaaka, oshoka ongame tuu ngoka.

¹⁴Ngame Omuwa nomuhongi gweni sho nda yogo ngashingeyi oompadhi dheni, nane wo omu na okuyogathana koompadhi.

¹⁵Oshoka ngame onde mu pe oshiholelwa, opo mu ninge naanaa ngashika nde mu ningile.

¹⁶Ngame otandi mu lombwele oshili: Omuyakuli ke shi omunene e vule mwene gwe, nomutumwa ke shi omunene e vule omutumi gwe.

¹⁷Ngashingeyi omu shi uvithe ko. One aanelago, ngele tamu shi ningi.

¹⁸“Ngame itandi mu popi, ne amuhe, ihe ondi ya shi mboka nda hogolola. Ihe enyolo oli na okugwanithwa ndyoka tali ti: ‘Omulumentu ngoka ta li iikulya yandje, okwa pilukila ndje.’

¹⁹Shika otandi shi mu lombwele ngashingeyi, manga inaashi ningwa, opo mu itaale kutya Ongame ngoka, uuna tashi ka ningwa.

²⁰Ngame otandi mu lombwele oshili: Ngoka ta taamba kehe gumwe ngoka tandi mu tumu, oye ota taamba ndje, naangoka ta taamba ndje, ota taamba ngoka a tuma ndje.”

²¹Jesus sho a popi oohapu ndhoka, okwa tukuluka mombepo ye e ta ti: “Ngame otandi mu lombwele oshili: Gumwe gwomokati keni ota ka gwaaleka ndje.”

²²Aalongwa oya talathana ya limbililwa.

²³Gumwe gwomaalongwa ngoka Jesus a li e mu hole, okwa kuutumba ponto ye.

²⁴Simon Petrus okwe mu pepe nomeho nokwe mu pula kutya olye ngoka ta popi.

²⁵Omulongwa ngoka okwa hedha popepilela naJesus e te mu pula: “Omuwa, olye ngo?”

²⁶Jesus okwa yamukula: “Oye tuu ngoka tandi mu pe oshipambu shika tandi shi elele mo.” Oye okwe elele ihe oshipambu e te shi pe Judas yaSimon Iskariot.

²⁷Mbalambala Judas sho a li oshipambu shoka, Satana okwa yi mo muye. Nena Jesus okwe mu lombwele: “Shono to ningi, shi ninga nziya.”

²⁸Mwaamboka ya li koshililo kamwa li nando ogumwe ngoka u uvu ko shoka Jesus e mu lombwele.

²⁹Judas sho a li ha kala nokampunda kiimaliwa, yamwe yomaalongwa oya dhiladhila kutya ngiika Jesus okwe mu lombwele, a ye a ka lande shoka ya pumbwa omolwoshituthi, nenge pamwe okwe mu lombwele, a gandje sha koohepele.

³⁰Judas okwa taamba oshipambu shoshikwiila e ta yi mbala pondje; nokwa li uusiku.

³¹Judas sho a yi pondje, Jesus okwa ti: “Ngashingeyi eadhimo lyOmuna gwOmuntu olya hololwa; ngashingeyi eadhimo lyaKalunga olya hololwa muye.

³²Ngele eadhimo lyaKalunga olya hololwa muye, nena Kalunga mwene ota ka holola eadhimo lyOmuna gwOmuntu note ke li holola mbala.

³³Aamwandje, itandi ka kala we nane ethimbo ele. Otamu ka konga ndje; ihe otandi mu lombwele ngashingeyi shoka nda lombwele Aajuda kutya kokuma nkoka tandi yi, itamu vulu okuya ko.

³⁴Oshipango oshipe otandi shi mu pe, mu holathane. Ngashi naanaa nangame nda kala ndi mu hole, osho nane wo omu na okuholathana.

³⁵Ngele omu holathane, nena aantu ayehe otaa ka dhimbulula kutya one aalongwa yandje.”

³⁶Simon Petrus okwe mu pula: “Omuwa, oto yi peni?” Jesus okwe mu yamukula: “Ito vulu okulandula ndje ngashingeyi nkoka tandi yi, ihe komeho oto ka landula ndje.”

³⁷Petrus okwa ti kuye: “Omuwa, omolwashike itaandi vulu oku ku landula ngashingeyi: Ngame ondi ilongekidha okusa molwoye.”

³⁸Jesus okwa yamukula: “Owi ilongekidha tuu shili okusa molwandje? Ngame otandi ku lombwele oshili: Ekondombolo manga inaali iga, ngoye o idhimbike ndje lutatu.”