Read Oshindonga-Ombiimbeli Ondjapuki JOHANNES 14 Bible Online

JOHANNES 14 - Oshindonga-Ombiimbeli Ondjapuki bible

JOHANNES 14

¹Jesus okwa lombwele aalongwa ye a ti: “Oomwenyo dheni inadhi kala dha ziyalala. Itaaleni Kalunga ne mu itaale ndje wo.

²Megumbo lyaTate omu na omahala gokukala ogendji. Ando kasha li ngeyi, ando otandi mu lombwele kutya otandi ke mu longekidhila ehala.

³Nongele nda yi e tandi mu longekidhile ehala, otandi ka galuka ishewe, ndi mu ile, opo mu ka kale wo nkoka ndi li.

⁴Ondjila yaankoka tandi yi, omu yi shi.”

⁵Tomas okwa ti kuye: “Omuwa, tse katu shi ko nkoka to yi. Ondjila otatu vulu ngiini oku yi tseya?”

⁶Jesus okwe mu lombwele: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.

⁷Ngele omu shi ndje, otamu ka tseya wo naTate. Okuza ngashingeyi omu mu shi nomwe mu mona.”

⁸Filippus okwa ti kuye: “Omuwa, tu ulukila Ho, shika osho shoka twe shi pumbwa.”

⁹Jesus okwe mu lombwele: “Ngame onda kala nane amuhe ethimbo ele, ihe nani ku shi ndje, Filippus? Kehe ngoka a mono ndje, okwa mona wo Tate. Omolwashike ano to ti: ‘Tu ulikila Ho?’

¹⁰Ino itaala nani, Filippus, kutya ngame ondi li muTate naTate oku li mungame?” Jesus okwa ti ihe kaalongwa ye: “Oohapu ndhoka tandi mu lombwele, itandi dhi popi mungame mwene; ihe Tate, ngoka e li mungame, oye ta longo iilonga ye.

¹¹Itaaleni ndje kutya ngame ondi li muTate naTate oku li mungame. Ihe ngele inamu hala okwiitaala, itaaleni molwiilonga.

¹²Ngame otandi mu lombwele oshili: Kehe ngoka i itaala ndje, ota ka longa wo iilonga mbyoka tandi longo. Eeno, oye ota ka longa nokuli iilonga iinene yi vule mbika, oshoka ngame otandi yi kuTate.

¹³Nena shaa shoka tamu shi indile medhina lyandje, otandi shi ningi, Tate opo a simanekithwe mOmwana.

¹⁴Ngele otamu indile ndje sha medhina lyandje, otandi shi ningi.”

¹⁵“Ngele omu hole ndje, nena otamu vulika komalombwelo gandje.

¹⁶Ngame otandi ki indila Tate, oye note ke mu pa Omupopili gulwe, Ombepo yoshili, a kale pamwe nane aluhe.

¹⁷Uuyuni itau vulu oku mu taamba, oshoka owo kau mu wete nokau mu shi. Ihe ne omu mu shi, oshoka ota kala pamwe nane noku li mune.

¹⁸“Ngame itandi mu thigi po one amuke, ihe otandi ke ya kune.

¹⁹Ngele pwa piti okathimbo okafupi kowala, uuyuni itau mono ndje we, ihe ne otamu mono ndje. Molwaashoka ngame ondi na omwenyo, nane wo otamu ka kala mu na omwenyo.

²⁰Esiku ndyoka nge lya thiki, nena otamu ke shi tseya kutya ngame ondi li muTate nane omu li mungame, ngashi naanaa ngame ndi li mune.

²¹“Kehe ngoka ta taamba omalombwelo gandje nota vulika kugo, oku hole ndje. Tate wo ota kala e hole ngoka e hole ndje, nangame otandi kala ndi mu hole notandi mu ihololele.”

²²Judas haangoka yaIskariot, okwa ti kuye: “Omuwa, omolwashike wa hala oku tu ihololela, ihe hauyuni?”

²³Jesus okwe mu yamukula ta ti: “Oongoka e hole ndje, ota vulika koohapu dhandje. Tate ota kala e mu hole, tse naTate notatu ya kuye e tatu kala muye.

²⁴Oongoka kee hole ndje, ita vulika koohapu dhandje. Ihe oohapu ndhika nde dhi mu lombwele, kadhi shi dhandje mwene, odha Tate, ngoka a tuma ndje.

²⁵“Iinima mbika onde yi mu lombwele, manga ndi li pune.

²⁶Ihe Omupopili Ombepo Ondjapuki, ngoka Tate ta ka tuma medhina lyandje, ote ke mu longa iinima ayihe, note ke mu dhimbulutha iinima ayihe mbyoka nde mu lombwela.

²⁷“Ombili otandi yi mu thigile. Ombili yandje mwene otandi yi mu pe. Ngame itandi yi mu pe, ngashi uuyuni hau gandja. Oomwenyo dheni inadhi ziyalala, ne inamu tila.

²⁸Ne omu uvu, sho nde mu lombwele kutya otandi yi, ihe otandi ka galukila kune. Ngele omu hole ndje, nena ando otamu nyanyukwa, sho tandi yi kuTate, oshoka Tate oye omunene e vule ndje.

²⁹Ngame otandi shi mu lombwele ngashingeyi, manga inaashi ningwa, opo mu itaale, ngele tashi ka ningwa.

³⁰Itandi vulu we okupopya nane olule, oshoka omupangeli gwuuyuni mbuka oku li pokuya. Ye ke na nando oonkondo dhasha dhi vule dhandje.

³¹Ihe uuyuni ou na okutseya kutya ngame ondi hole Tate. Onkee otandi longo ayihe, ngashi a lombwele ndje. “Tikameni, tu zeni po mpaka.”