Read Oshindonga-Ombiimbeli Ondjapuki JOHANNES 16 Bible Online

JOHANNES 16 - Oshindonga-Ombiimbeli Ondjapuki bible

JOHANNES 16

¹“Iinima mbika onde yi mu lombwele, opo mwaa ethe eitaalo.

²Oyo otaa ke mu konda mo moosinagoga dhawo. Ethimbo otali ke ya, uuna kehe gumwe ngoka te mu dhipaga, ta ka dhiladhila kutya moku ninga ngaaka ota longele Kalunga.

³Iinima mbika otaa ke yi mu ningila, oshoka inaa tseya ndje nosho wo Tate kaye mu shi.

⁴Ayihe mbika onde yi mu lombwele, opo ethimbo lyawo ngele lya thiki lyoku shi ninga, mu dhimbulukwe elondodho lyandje.” “Shika inandi shi mu lombwela petameko, oshoka onda li pune.

⁵Ngashingeyi otandi yi kunguka a tuma ndje, ihe kape na nando ogumwe gwomune ta pula ndje kutya otandi yi peni?

⁶Ano ngashingeyi sho nde shi mu lombwele, omu na oluhodhi olunene.

⁷Onkee ano ngame otandi mu lombwele oshili: Okuya kwandje otaku mu kwatha, oshoka ngele itandi yi, nena Omupopili ite ya kune. Ihe ngele tandi yi, nena otandi ke mu tuma kune.

⁸Ano Omupopili ngele te ya, otu ulukile aantu kutya oyo aalunde yo inaa tseya shoka shi li mondjila nepangulo lyaKalunga kutya otali ti shike.

⁹Oye otu ulike uulunde waantu, oshoka inaa itaala ndje.

¹⁰Oye ote ya ulukile shoka shi li mondjila, oshoka otandi yi kuTate, ne itamu mono ndje we.

¹¹Oye ote ya ulukile epangulo lyaKalunga, oshoka omupangeli guuyuni mbuka okwa pangulwa nale.”

¹²“Ondi na natango odhindji oku mu lombwela, ihe ngashingeyi otamu nyengwa oku dhi uva ko.

¹³Ihe Ombepo yoshili nge te ya, ote ke mu longa oshili ayihe. Oye ita popi muye mwene, ihe ote mu lombwele shoka a uvu note mu hololele iinima mbyoka tayi ke ya.

¹⁴Oye ota simanekitha ndje, oshoka ota ka kutha mumbyoka ngame nda li ndi na oku popya, e te yi mu lombwele.

¹⁵Iinima ayihe yaTate oyandje, onkee nda ti: Ombepo ota kutha shoka nde mu pe e te shi mu lombwele.”

¹⁶“Ngele pwa piti okathimbo okafupi kowala, ne itamu ka mona ndje, ihe ngele pwa piti ishewe okathimbo okafupi, otamu ka mona ndje.”

¹⁷Yamwe yomaalongwa ye oya pulathana ya ti: “Otashi ti ngiini ano, sho te tu lombwele ta ti: ‘Ngele pwa piti okathimbo okafupi, ne itamu ka mona ndje, ihe ngele pwa piti ishewe okathimbo okafupi, otamu ka mona ndje?’ Ye ta ti ishewe: ‘Shika otashi ningwa, oshoka otandi yi kuTate.’

¹⁸Okwa dhiladhila shike, sho ta popi okathimbo okafupi? Katu uvite ko kutya okwa hala okutya shike.”

¹⁹Jesus okwa li e shi shi kutya oya hala oku mu pula, onkee okwa ti kuyo: “Otamu pulathana shike? Ngame onda ti: ‘Ngele pwa piti okathimbo okafupi, ne itamu ka mona ndje, nongele pwa piti ishewe okathimbo okafupi, otamu ka mona ndje.’

²⁰Ngame otandi mu lombwele oshili: Ne otamu ka lila nokuyemata, ihe uuyuni otau ka nyanyukwa. Ne otamu ka kala mwa sa oluhodhi, ihe oluhodhi lweni otalu ka shituka enyanyu.

²¹Omukiintu ngele oku li pokuvala okanona, oku na oluhodhi, oshoka ethimbo lye lyuuwehame olye ya. Ihe okanona ngele ka valwa, ye ota dhimbwa uuwehame we, oshoka okwa nyanyukwa, sho omuntu a valelwa muuyuni.

²²Osho naanaa nane mu li. Ngashingeyi omwa sa oluhodhi, ihe otandi ke mu mona natango, nomitima dheni otadhi ka kala dhu udha enyanyu; enyanyu ndyoka kape na ngoka ta vulu oku li mu kutha.”

²³“Esiku ndyoka ngele lya thiki, one itamu ka pula ndje nando osha. Ngame otandi mu lombwele oshili: Tate ote ke mu pa shaa shoka tamu indile medhina lyandje.

²⁴Sigo onena inamu indila nando osha medhina lyandje. Indileni, e tamu pewa, enyanyu lyeni opo li kale lyu udhilila pombanda.”

²⁵“Ngame onde mu lombwele iinima ayihe mbika momayele. Ethimbo otali ke ya, uuna itandi ka popya we omayele, ihe otandi ke mu lombwela oohapu dha fatuka kombinga yaTate.

²⁶Esiku ndyoka ngele lya thiki, ne otamu ka indila Tate medhina lyandje, ngame noitandi mu lombwele kutya otandi indile Tate molweni.

²⁷Oshoka Tate oku mu hole, molwaashoka ne omu hole ndje nomwi itaala kutya onda za kuKalunga.

²⁸Ngame onda za kuTate e tandi ya muuyuni, ihe ngashingeyi otandi thigi po ishewe uuyuni notandi yi kuTate.”

²⁹Nena aalongwa ye oya ti kuye: “Ngashingeyi oto popi oohapu dha fatuka; ito popi we nando omayele.

³⁰Ngashingeyi otu shi shi kutya owa tseya iinima ayihe, ngoye ino pumbwa nando omuntu te ku pula omapulo. Shika oshe tu itaalitha kutya ngoye owa za kuKalunga.”

³¹Jesus okwe ya yamukula a ti: “Omwi itaala ngashingeyi?

³²Ethimbo otali ke ya noli li po nokuli, uuna ne amuhe tamu ka halakanithwa. Kehe gumwe oti iyukile kaandjawo, e tamu thigi ndje po awike. Ihe ngame kandi li awike, oshoka Tate oku li pamwe nangame.

³³Shika onde shi mu lombwele, opo mu kale mu na ombili tayi zi muukumwe weni nangame. Uuyuni otau ke mu hepeka. Ihe inamu tila, ngame onda sinda uuyuni!”