Read Oshindonga-Ombiimbeli Ondjapuki JOHANNES 17 Bible Online

JOHANNES 17 - Oshindonga-Ombiimbeli Ondjapuki bible

JOHANNES 17

¹Jesus sho a mana okupopya oohapu ndhika, okwa tala kegulu e ta ti: “Tate, ethimbo olye ya. Adhimitha omumwoye, omumwoye opo e ku adhimithe wo.

²Oshoka ongoye we mu pa oonkondo okupangela aantu ayehe, opo a gandje omwenyo gwaaluhe kwaayehe mboka we ye mu pa.

³Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.

⁴Ngame onde ku adhimitha kombanda yevi, onda tsakanitha oshilonga shoka wa pe ndje, ndi shi longe.

⁵Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.”

⁶“Aantu mboka yomuuyuni we pa ndje, onde ya tseyithile edhina lyoye. Oyo oyoye, ngoye nowe ya pe ndje. Oyo oya vulika koohapu dhoye.

⁷Ngashingeyi oye shi shi kutya ashihe shoka wa pa ndje, osha za kungoye.

⁸Oshoka ngame onde ya pe oohapu ndhoka wa pe ndje, noye dhi taamba. Oyo oye shi shi kutya ngame onda za shili kungoye, noyi itaala kutya ongoye wa tuma ndje.

⁹“Otandi ya galikanene. Itandi galikanene uuyuni, ihe oyo mboka we ya pa ndje, oshoka oyo oyoye.

¹⁰Ashihe shoka ndi shi na, oshoye, naashihe shoka u shi na, oshandje, neadhimo lyandje olya hololwa muyo.

¹¹Ngashingeyi ngame otandi ya kungoye. Ngame kandi li we muuyuni, ihe yo oye li muuyuni. “Tate Omuyapuki, ya gamena koonkondo dhedhina lyoye, opo ya ninge omuntu gumwe naanaa, ngashi ngame nangoye tu li gumwe.

¹²Manga ngame nda li pamwe nayo, onde ya gamene koonkondo dhedhina lyoye ndyoka we li pa ndje. Ngame onde ya gamene noinandi kanitha po nando ogumwe gwomuyo, kakele kaangoka a li e na oku ka kana, enyolo opo li gwanithwe.

¹³“Ngashingeyi otandi ya kungoye, ihe manga ndi li natango muuyuni, otandi popi iinima mbika, opo ya kale ye na enyanyu lyandje momitima dhawo meudhililo alihe.

¹⁴Ngame onde ya pe oohapu dhoye, onkee uuyuni otau ya tondo, oshoka yo kaye shi yomuuyuni, ngashi nangame ndaa shi gwomuuyuni.

¹⁵Ngame itandi ku indile, u ya kuthe mo muuyuni, ihe otandi ku indile, u ya gamene kuMwiinayi.

¹⁶Ngashi ngame ndaa shi gwomuuyuni, osho wo nayo kaye shi yomuuyuni.

¹⁷Ya iyoololela, ya kale moshili, oohapu dhoye odho oshili.

¹⁸Ngame onde ya tuma muuyuni, ngaashi ngoye wa tuma ndje muuyuni.

¹⁹Ngame otandi igandja kungoye molwawo, opo nayo wo ya kale lela yoye.”

²⁰“Hayo ayeke mbaka tandi galikanene, ihe naamboka wo taa ki itaala ndje molweuvitho lyawo.

²¹Otandi ya galikanene, opo ayehe ya ninge omuntu gumwe. Tate, naa kale mutse, ongaashi ngoye u li mungame nangame ndi li mungoye. Naa ninge omuntu gumwe, opo uuyuni u itaale kutya ongoye wa tuma ndje.

²²Ngame onde ya pa eadhimo ndyoka we li pa ndje, opo ya ninge gumwe, ngashika ngoye nangame tu li gumwe.

²³Ngame ondi li muyo nangoye omungame, opo ya ninge lela gumwe, uuyuni opo u tseye kutya ongoye wa tuma ndje nou ya hole, ngashi u hole ndje.

²⁴“Tate, ongoye we ya pa ndje, onkee onda hala, ndi kale pamwe nayo nkoka ndi li, opo ya tale eadhimo lyandje, eadhimo ndyoka wa pa ndje, oshoka ngoye owa kala u hole ndje, nomanga uuyuni inaau shitwa.

²⁵Tate omuyuuki, uuyuni inau ku tseya, ihe ngame ondi ku shi, naamboka yandje oye shi shi kutya ongoye wa tuma ndje.

²⁶Ngame onde ya tseyithile edhina lyoye notandi ka tsikila oku shi ninga, opo ohole ndjoka u hole ndje nayo yi kale muyo, nangame ndi kale muyo.”