Read Oshindonga-Ombiimbeli Ondjapuki JOHANNES 18 Bible Online

JOHANNES 18 - Oshindonga-Ombiimbeli Ondjapuki bible

JOHANNES 18

¹Jesus sho a mana okugalikana, okwa piti mo pamwe naalongwa ye e taa taaguluka okalonga kaKidron. Kokuma nkoka okwa li ku na eyana lyomiti. Jesus naalongwa ye oya yi mulyo.

²Judas, ngoka e mu gwaaleke, okwa li a tseya ehala ndyoka, oshoka Jesus naalongwa ye oya li haa kala ko olwindji.

³Ano Judas okwa yi keyana ndyoka pamwe nongundu yaakwiita nayamwe yomaalangeli yotempeli ya tumwa kaayambi aakuluntu nokaafarisayi. Oyo oya li ye na iikondjitho noya humbata oonyeka noolamba.

⁴Jesus sho a li a tseya ashihe shoka tashi ke mu adha, okwa zi mo meyana e ta yi kuyo nokwe ya pula a ti: “Otamu kongo lye?”

⁵Oyo mu yamukula ya ti: “OJesus Omunasareti.” Jesus okwa ti kuyo: “Ongame nguka!” Judas, omugwaaleki gwe, okwa li a thikama mpoka pamwe nayo.

⁶Ano Jesus sho e ya lombwele: “Ongame ngu,” oya shuna lwanima e taa ihata pevi.

⁷Jesus okwe ya pula ishewe: “Otamu kongo lye?” Oyo oya ti: “OJesus Omunasareti.”

⁸Jesus okwa ti kuyo: “Ngame onde mu lombwele kutya ongame nguka. Ngele ano ongame tamu kongo, nena etheni, aalumentu mbaka ya ye.”

⁹Oye okwa popi ngeyi, opo oohapu ndhoka a popile dhi gwanithwe: “Inandi kanitha po nando omuntu gumwe gwaamboka wa pa ndje.”

¹⁰Simon Petrus sho a li e na egongamwele, okwe li pweya mo e tu umpile omumati gwomuyambimukuluntu nokwa fegula ko okutsi kwe kwokolulyo. Edhina lyomumati ngoka oMalkus.

¹¹Jesus okwa ti kuPetrus: “Shuna mo egongamwele lyoye molumpangwa. Owa dhiladhila ando, ndi kale inaandi nwa oshitenga shomahepeko shoka nde shi pewa kuTate?”

¹²Ano ongundu yaakwiita pamwe nomuwiliki gwawo naalangeli yomAajuda oya kwata Jesus, e taye mu manga.

¹³Oye mu fala tango kuAnnas, oshoka oye hemweno yaKajafas, ngoka a li omuyambimukuluntu omumvo ngwiyaka.

¹⁴Kajafas nguka oye ngoka a tsile Aajuda omayele kutya oshihwepo, omuntu gumwe nge ta si peha lyaantu ayehe.

¹⁵Simon Petrus nomulongwa mukwawo oya landula Jesus. Omulongwa ngoka mukwawo okwa li e shiwike nawa komuyambimukuluntu, onkee okwa yi pamwe naJesus molugumbo lwomeni lyegumbo lyomuyambimukuluntu.

¹⁶Ihe Petrus okwa thikama pondje pomweelo. Omulongwa mukwawo, ngoka a li e shiwike komuyambimukuluntu, okwa piti mo e ta popitha omukadhona gwoposheelo nokwe eta Petrus meni.

¹⁷Omukadhona ngoka okwa pula Petrus a ti: “Ngoye ku shi gumwe gwomaalongwa yomulumentu nguka?” Petrus okwa ti kuye: “Aawe, hangame.”

¹⁸Okwa li ku na uutalala, onkee aayakuli naalangeli oya adhika ya tema omulilo noya thikama ye gu kondeka taa huhulukwa. Petrus okwa yi kuyo nokwa thikama e ta huhulukwa pamwe nayo.

¹⁹Omuyambimukuluntu okwa pula Jesus kombinga yaalongwa ye noyelongo lye.

²⁰Jesus okwe mu yamukula a ti. “Ngame ohandi popi aluhe montaneho yomuntu kehe. Onda longele aluhe moosinagoga nomotempeli, moka hamu gongala Aajuda ayehe. Ngame inandi popya nando osha meholamo.

²¹Omolwashike to pula ndje? Pula aantu mboka yu uvu sho nda popi. Ya pula kutya onde ya lombwele shike, oye shi shi.”

²²Jesus sho a popi oohapu ndhika, omumati gumwe gwomaalangeli mboka ya li ya thikama mpoka, okwe mu dhenge olupi e ta ti: “Osho to yamukula omuyambimukuluntu ngawo?”

²³Jesus okwe mu yamukula: “Ngele onda popi sha sha puka, lombwela kehe gumwe e li mpaka kutya oshike. Ihe ngele shoka nda popi, oshi li mondjila, oto dhengele ndje shike?”

²⁴Annas okwe mu tumu a mangwa natango kuKajafas, omuyambimukuluntu.

²⁵Petrus okwa li a thikama natango pomulilo ta huhulukwa. Ano mboka ya li taa huhulukwa pamwe naye, oye mu pula ya ti: “Ngoye ku shi gumwe gwomaalongwa yomulumentu ngwiya?” Ihe Petrus okwi idhimbike natango a ti: “Aawe, hangame.”

²⁶Gumwe gwomaamati yomuyambi omukuluntu, omukwanezimo gwomulumentu ngoka Petrus a tetele okutsi, okwa ti: “Ou shi aniwa, inandi ku mona meyana pamwe naye?”

²⁷Natango Petrus okwi idhimbike, nopo tuu mpoka ekondombololo olyi igi.

²⁸Aakwiita oya kutha mo Jesus maandjaKajafas e taye mu fala kaandjaPilatus. Osha ningwa ongula onene. Ihe Aajuda inaa ya mo maandjaPilatus, oshoka oya li ya hala okukala ya yogoka, opo ya wape okulya onzigona yOpaasa.

²⁹Nena Pilatus okwa piti mo, a yi kuyo e ta ti: “Omulumentu nguno otamu mu tamanekele shike?”

³⁰Oyo oye mu yamukula ya ti: “Omulumentu nguka ando okwa li kee shi omukolokoshi, ando inatu mu eta kungoye.”

³¹Pilatus okwa ti kuyo: “Mu kuthii po e tamu ke mu pangula ne yene pampango yeni.” Aajuda oye mu yamukula ya ti: “Tse otwi indikwa okudhipaga omuntu.”

³²Shika osha ningwa, opo oohapu ndhoka dhi gwanithwe Jesus e dhi popi, sho a holola kutya eso ndyoka e na okusa, olya tya ngiini.

³³Pilatus okwa shuna megumbo nokwi ithana Jesus e te mu pula ta ti: “Ngoye omukwaniilwa gwAajuda?”

³⁴Jesus okwa yamukula a ti: “Epulo ndika olya zi mungoye mwene, nenge aantu yalwe ya hokolola ndje pungoye?”

³⁵Pilatus okwa yamukula: “Ou shi ngame Omujuda? Aantu yoshigwana shoye naayambi yawo aakuluntu oyo ye ku eta kungame. Owa ningi shike ano?”

³⁶Jesus okwa yamukula a ti: “Uukwaniilwa wandje kau shi womuuyuni mbuka. Ando uukwaniilwa wandje owa li womuuyuni mbuka, ando aantu yandje ya kondjele ndje ndaa gandjwe miikaha yAajuda. Ihe ngashingeyi, uukwaniilwa wandje kau shi waampaka.”

³⁷Pilatus okwe mu pula a ti: “Ngoye omukwaniilwa nani?” Jesus okwe mu yamukula a ti: “Ongoye to ti kutya ngame omukwaniilwa. Osho nda valelwa nonde ya muuyuni mbuka, opo ndi popye oshili. Kehe ngoka ha kala moshili, otu uvu ewi lyandje.”

³⁸Pilatus okwa ti kuye: “Oshili oshike?” Pilatus okwa shuna pondje kAajuda e ta ti kuyo: “Ngame kandi wete nando etompelo lyasha lyoku mu pangulitha.

³⁹Ihe omu na omukalo handi mu mangululile aluhe onkwatwa yimwe pethimbo lyoshituthi shOpaasa. Omwa hala, ndi mu mangululile omukwaniilwa gwAajuda?”

⁴⁰Oyo oyi igidha ishewe ya ti: “Aawe, haye ngoka! Tse otwa hala Barabbas!” Barabbas okwa li omukolokoshi.