Read Oshindonga-Ombiimbeli Ondjapuki JOHANNES 19 Bible Online

JOHANNES 19 - Oshindonga-Ombiimbeli Ondjapuki bible

JOHANNES 19

¹Nena Pilatus okwa kutha Jesus e te mu dhengitha noongola.

²Aakwiita oya tungu oshishani shomakwega noye shi mu zaleke komutse. Oyo oye mu zaleke wo onguwo onene ontiligane.

³Noye ya kuye e taa ti: “Kala u na omwenyo omule, omukwaniilwa gwAajuda!” Opo ihe oye mu dhenge nomalupi.

⁴Pilatus okwa shuna natango pondje kAajuda e ta ti kuyo. “Taleni, otandi mu eta mpaka pondje pune, opo ndi mu ulukile kutya kandi wete nando etompelo lyasha lyoku mu pangulitha.”

⁵Jesus okwa piti mo ihe a zalekwa oshishani shomakwega nonguwo ontiligane. Pilatus okwa ti kuyo: “Taleni, omuntu oye ngu.”

⁶Nena aayambi aakuluntu naalangeli sho ye mu mono, oyi igidha ya ti: “Mu alela komushigakano!” Pilatus okwe ya lombwele a ti: “Mu kuthii po ne yene e tamu mu alele komushigakano, oshoka ngame kandi wete nando etompelo lyoku mu pangulitha.”

⁷Aajuda oye mu yamukula ya ti: “Tse otu na ompango ndjoka tayi ti: Oku na okusa, oshoka okwi iningi Omuna gwaKalunga.”

⁸Pilatus sho e ya uvu taa popi ngeyi, okwa tila noonkondo shi vulithe nale.

⁹Oye okwa shuna megumbo lye nokwa pula Jesus a ti: “Owa za peni ano?” Ihe Jesus ine mu yamukula nando osha.

¹⁰Pilatus okwa ti kuye: “Ito yamukula ndje? Dhimbulukwa kutya ondi na oonkondo oku ku mangulula nondi na oonkondo oku ku alelitha komushigakano.”

¹¹Jesus okwe mu yamukula a ti: “Ku na oonkondo dhokupangula ndje, ngele ino dhi pewa kuKalunga. Onkee omulumentu ngoka a gandja ndje kungoye, oku na oondjo e ku vule.”

¹²Pilatus sho u uvu oohapu ndhoka, okwa li a hala noonkondo okumangulula Jesus. Ihe Aajuda oyi igidha ya ti: “Ngele oto mu mangulula, nena otashi ti kutya ku shi kuume komupangeli Omuroma. Oshoka kehe ngoka ti iningi omukwaniilwa, oye omukondjithi gwomupangeli Omuroma.”

¹³Pilatus sho u uvu oohapu ndhoka, okwa fala Jesus pondje e ta kuutumba koshipundi shepangulo pehala hali ithanwa Olupale lwomamanya, mOshihebeli “Gabbata”.

¹⁴Ethimbo olya li potundi ontimulongo nambali yomutenya yesiku ndyoka lya tetekela Opaasa. Pilatus okwa ti kAajuda: “Taleni, omukwaniilwa gweni oye nguka!”

¹⁵Oyo oyi igidha mokule: “Mu dhipaga, mu dhipaga! Mu alela komushigakano!” Pilatus okwe ya pula a ti: “Omwa hala, ndi alele omukwaniilwa gweni komushigakano?” Aayambi aakuluntu oya yamukula ya ti: “Tse katu na omukwaniilwa a tya ngaaka, kakele komupangeli Omuroma.”

¹⁶Nena Pilatus okwa gandja Jesus kuyo, opo a ka alelwe komushigakano. Nena yo oya kutha Jesus.

¹⁷Oye okwa piti mo a humbata omushigakano gwe ye mwene e te ya kehala lyi ithanwa “Golgata”, mOshihebeli otali ti “Oshala sholukwe”.

¹⁸Oko nkoka ye mu alele komushigakano. Pamwe naye oya alele wo aalumentu yaali komishigakano dhawo, gumwe okolulyo nomukwawo okolumoho naJesus pokati kawo.

¹⁹Pilatus okwa nyola enyolo e te li tula komushigakano gwaJesus. Olyo olya li lya nyolwa ngeyi: “Jesus Omunasareti, omukwaniilwa gwAajuda.”

²⁰Aajuda oyendji oya lesha enyolo ndika, oshoka ehala mpoka Jesus a alelwa komushigakano, olya li popepi noshilando. Enyolo olya li lya nyolwa mOshihebeli, mOshilatina nomOshigreka.

²¹Aayambi aakuluntu Aajuda oya ti kuPilatus: “Ino nyola ‘Omukwaniilwa gwAajuda,’ ihe shila tya: ‘Omulumentu nguka okwa tile: Ongame omukwaniilwa gwAajuda.’ ”

²²Pilatus okwa yamukula a ti: “Shoka nda nyola, nda nyola nale.”

²³Ano aakwiita sho ya alele Jesus komushigakano, oya kutha oonguwo dhe e taa dhi topola miitopolwa ine, kehe omukwiita okwa pewa oshitopolwa shimwe. Oyo oya kutha onguwo yokohi, ya tungwa niikaha yaa na nando omihondjo.

²⁴Nena aakwiita oya lombwelathana ya ti: “Inatu yi kondeni, ihe tu yi umbileni oshihogololitho, opo tu mone kutya otayi ningi yalye.” Shika osha ningwa, opo enyolo li gwanithwe ndyoka tali ti: “Oyo oya topolelathana oonguwo dhandje, omuzalo gwandje oye gu umbile oshihogololitho.” Onkee aakwiita osho ya ningi.

²⁵Ihe popepi nomushigakano gwaJesus opwa li pwa thikama yina nomumwayina omukiintu, Maria, omukiintu gwaKleopas naMaria Magdalena.

²⁶Ano Jesus sho a mono yina nomulongwa ngoka a li e hole, ya thikama mpoka, okwa ti kuyina: “Meme, omumwoye oye ngo!”

²⁷Opo ihe okwa ti komulongwa: “Nyoko oye ngo!” Pethimbo olyo tuu ndyoka omulongwa okwa taamba Maria, a kale megumbo lye.

²⁸Jesus okwa li e shi shi kutya ngashingeyi iinima ayihe oya gwanithwa. Onkee, opo shoka sha nyolwa shi gwanithwe, okwa ti: “Onda sa enota.”

²⁹Okwa li ku na oshuma shu udha omaviinu omalulu. Oyo oya yaya oshisopi momaviinu omalulu e taye shi tula koshihenguti shoshisopi noye shi tsike komilungu dhaJesus.

³⁰Jesus okwa nu omaviinu omalulu e ta ti: “Ayihe ya gwanithwa!” Opo ihe okwa sizimike omutse gwe e ta si.

³¹Nena Aajuda oyi indile Pilatus, e ya pitikile okuteyagula oohongo dhaalumentu mboka ya alelwa, opo ya kuthwe ko komishigakano. Shika oye shi ningi molwashoka esiku ndyoka olya li Etitano, yo oya li inaaya hala, omidhimba dhi kale dhe endjelela komishigakano mEsabati, oshoka Esabati ndyoka olya li lya simana.

³²Aakwiita oya yi e taa teyagula oohongo dhomulumentu ngoka gwotango, opo ihe dhomukwawo omutiyali, aalumentu mboka ya li ya alelwa pamwe naJesus.

³³Ihe sho ye ya kuJesus, oya dhimbulula kutya okwa sa nale nokuli, onkee inaa teyagula nando oohongo dhe.

³⁴Opo ihe gumwe okwa tsu Jesus negonga molupati, omo nomwa zi ombinzi nomeya.

³⁵Ngoka a mono shika, sho tashi ningwa, oye e shi hokolola. Tse otu shi shi kutya shoka ta popi, oshoshili, naye mwene wo oku shi shi kutya ota popi oshili, opo nane wo mu itaale.

³⁶Shika osha ningwa, opo enyolo li gwanithwe ndyoka tali ti: “Kaku na nando esipa lye tali ka teyagulwa.”

³⁷Enyolo ekwawo ishewe otali ti: “Aantu otaa ka tala kunguka ye mu ulula.”

³⁸Konima yaambika Josef, ngoka a za koshilando shaArimatia, okwa pula Pilatus, ngele otashi vulika, a pewe omudhimba gwaJesus. Josef okwa li omulongwa gwaJesus, ihe omeholamo, oshoka okwa tila Aajuda. Pilatus okwe mu zimine. Oye nokwa yi nagwo.

³⁹Nikodemus ngoka i ile kuJesus uusiku, okwe ya pamwe naJosef e na omugwayo gwomagadhi ga nika nawa, gu thike puudhigu wookilo omulongo nambali.

⁴⁰Aalumentu mbaka yaali oya kutha omudhimba gwaJesus e taye gu mangele momalapi omatokele mumwe niizimba. Nguka ogwo omukalo gwAajuda gwokulongekidhila omudhimba efumviko.

⁴¹Pehala mpoka Jesus a alelwa komushigakano, opwa li pu na eyana. Meyana ndyoka omwa li mu na ombila ompe, moka inaamu fumvikwa nando omuntu.

⁴²Molwashoka olya li esiku lya tetekela Esabati lyAajuda nomolwashoka wo ombila oya li popepi, oya fumvike Jesus mombila ndjoka.