Read Oshindonga-Ombiimbeli Ondjapuki JOHANNES 2 Bible Online

JOHANNES 2 - Oshindonga-Ombiimbeli Ondjapuki bible

JOHANNES 2

¹Sho pwa piti omasiku gatatu, okwa li ku na ohango muKana, oshilando shomuGalilea. Yina yaJesus oko a li.

²Jesus naalongwa ye oya li wo ya hiywa kohango.

³Omaviinu agehe sho ga pu po, yina yaJesus okwa ti kuye: “Kaye na omaviinu.”

⁴Jesus okwa ti kuye: “Ino kala u na oshimpwiyu nangame, meme. Ethimbo lyandje inali thika natango.”

⁵Yina yaJesus okwa lombwele aayakuli a ti: “Shaa shoka te mu lombwele, shi ningeni.”

⁶Pamukalo gwokuyoga kwAajuda okwa li ku na iiyuma ihamano yomamanya popepi. Oshuma kehe oshi thike pomayemele gahetatu nenge omulongo nagaali.

⁷Jesus okwa lombwele aayakuli a ti: “Tekeleni iiyuma omeya, yu udhe.” Oyo noye yi tekele yu udhilila sigo okomilungu.

⁸Ye okwa ti kuyo: “Ngashingeyi ga pimpii mo ihe, mu ga faalele omuyakuli omukuluntu gwaayenda.” Oyo noye ge mu faalele.

⁹Omuyakuli omukuluntu sho a makele omeya ngoka ga shituka omaviinu, okwa li kee shi mpoka ga zi. Aayakuli mboka ya teke omeya, oyo ayeke ya li ye shi shi. Omuyakuli omukuluntu okwi ithana ihe ombushiki

¹⁰nokwa ti kuye: “Omuntu kehe oha gandja tango omaviinu ngoka omatoye, opo ihe ngele aantu ya kolwa, ote ya pe ngoka omawinayi. Ihe ngoye sigo oompaka owa holeke omaviinu omatoye.”

¹¹Oshikumithalonga shika shotango Jesus okwe shi ningile muKana, oshilando shomuGalilea. Okwa holola eadhimo lye, aalongwa ye noye mu itaale.

¹²Konima yoshiningwanima shika Jesus mwene nayina naamwayina aalumentu naalongwa ye oya yi kuKapernaum noya kala ko omasiku gamwe.

¹³Opaasa yAajuda sho ya li popepi, Jesus okwa yi kuJerusalem.

¹⁴Okwa adha aantu motempeli taa landitha oongombe, oonzi noonguti, naapingakanithi yiimaliwa ya kuutumba piitaafula yawo.

¹⁵Okwa tungu ongola yepando nokwe ya tidha mo ayehe motempeli pamwe noongombe noonzi dhawo. Okwa tilehi iimaliwa, niitaafula yawo okwe yi undulile pevi.

¹⁶Aalandithi yoonguti okwe ya lombwele a ti: “Kuthii mo iinima mbika ayihe! Ongulu yaTate inamu yi ninga oshilandelo.”

¹⁷Aalongwa ye oya dhimbulukwa kutya enyolo otali ti: “Uulaadhi omolwongulu yoye, Kalunga, otau li ndje.”

¹⁸Aajuda oya pula Jesus ya ti: “Oshikumithalonga oshini po to longo, u tu ulukile kutya ou na epitikilo okulonga ngeyi?”

¹⁹Jesus okwe ya yamukula a ti: “Kumunii po otempeli ndjika, ngame notandi yi tungulula momasiku gatatu.”

²⁰Nena Aajuda oye mu lombwele: “Otempeli ndjika oya tungwa oomvula omilongo ne nahamano, ongoye noto yi tungulula momasiku gatatu?”

²¹Ihe otempeli ndjoka Jesus a popi, oyo olutu lwe.

²²Ano Jesus sho a yumudhwa kuusi, aalongwa ye oya dhimbulukwa oohapu ndhoka a li a popi. Oyo noyi itaale enyolo noohapu ndhoka Jesus e dhi ya lombwele.

²³Jesus sho a li muJerusalem pethimbo lyoshituthi shOpaasa, aantu oyendji oya mono iikumithalonga mbyoka a longo noye mu itaale.

²⁴Ihe ye ini iholola kuyo, oshoka ye mwene okwa li e ya shi ayehe.

²⁵Ye ina pumbwa omuntu e mu hokololele sha kombinga yomuntu, oshoka okwa tseya ye mwene shoka shi li momuntu.