Read Oshindonga-Ombiimbeli Ondjapuki JOHANNES 20 Bible Online

JOHANNES 20 - Oshindonga-Ombiimbeli Ondjapuki bible

JOHANNES 20

¹Ongula onene yesiku lyotango lyoshiwike, manga kwa luudha natango, Maria Magdalena okwa yi kombila nokwa mono kutya emanya olya kandulwa po posheelo.

²Oye okwa matuka e ta yi kuSimon Petrus nokomulongwa mukwawo ngoka Jesus kwa li e hole nokwe ya lombwele a ti: “Oyo oya kutha mo Omuwa mombila, natse katu shi wo mpoka ye mu tula!”

³Nena Petrus nomulongwa mukwawo oya yi ihe kombila.

⁴Ayehe yaali oya ningi shanamutango, ihe omulongwa ngoka mukwawo okwa thigi po Petrus e ta thiki tango kombila.

⁵Oye okwa ontamene mo e ta mono omalapi omatokele, ihe ina ya mo.

⁶Simon Petrus okwe ya wo e mu landula nokwa thikile u ukilila mombila. Oyo okwa mono mo omalapi omatokele ge li mo.

⁷Nelapi ndyoka lya li lya manga omutse gwaJesus, lya gonywa li ikalela pehala lyalyo.

⁸Nena nomulongwa mukwawo ngoka a thiki tango kombila, okwa yi wo mombila nokwa mono e ti itaale.

⁹Oshoka natango tuu oya li kaa uvite ko enyolo ndyoka tali ti: “Oye okwa li e na okuyumudhwa kuusi.”

¹⁰Nena aalongwa oya shuna kaandjawo.

¹¹Maria okwa kala a thikama pombila pondje ta lili. Ano sho ta lili ngeyi, okwa ontamene mo mombila

¹²nokwa mono mo aayengeli yaali ya zala oonguwo oontokele ya kuutumba mpoka pwa li pwa lala omudhimba gwaJesus, gumwe okomutse nomukwawo okomagulu.

¹³Oyo oye mu pula: “Nekulu, omolwashike to lili?” Maria okwe ya yamukula a ti: “Aantu oya kutha mo Omuwa gwandje mombila, ngame inandi tseya mpoka ye mu tula.”

¹⁴Sho a popi ngeyi, okwa punguluka e ta tala lwanima nokwa mono Jesus a thikama mpoka. Ihe okwa li kee shi shi kutya oye Jesus.

¹⁵Nena Jesus okwe mu pula: “Nekulu, omolwashike to lili? Oto kongo lye?” Maria okwa dhiladhila kutya ngiika omwene gweyana nokwa ti kuye: “Tatekulu, ngele ongoye we mu kutha mo, lombwela ndje nkoka we mu tula, ndi ke mu tale ko.”

¹⁶Jesus okwa ti kuye: “Maria!” Maria okwa pungulukile kuye e ta popi mOshihebeli ta ti: “Rabbi,” otashi ti Muhongi.

¹⁷Jesus okwa ti kuye: “Ino guma ndje, oshoka inandi londa natango, ndi ye kuTate. Ihe inda kaamwameme e to ya lombwele kutya ngame otandi shuna kuTate, nokuKalunga kandje nokeni wo.”

¹⁸Nena Maria Magdalena okwa yi nokwa lombwele aalongwa kutya okwa mono Omuwa, ngoka e mu lombwele oohapu ndhoka.

¹⁹Ongulohi yesiku tuu ndyoka lyotango lyoshiwike omiyelo dhongulu moka aalongwa ya li ya gongala, odha li dha patwa, oshoka oya li ya tila Aajuda. Nena Jesus okwe ya nokwa thikama mokati kawo e ta ti kuyo: “Ombili nayi kale nane!”

²⁰Sho a popi ngeyi, okwe ya ulukile iikaha ye nolupati lwe. Aalongwa oya nyanyukwa noonkondo, sho ya mono Omuwa.

²¹Jesus okwa ti ishewe kuyo: “Ombili nayi kale nane! Ngashi naanaa Tate a tumu ndje, osho wo nangame otandi mu tumu.”

²²Oye okwa popi ndhika nokwe ya fudhile e te ya lombwele ta ti: “Taambeni Ombepo Ondjapuki.

²³Mboka tamu ya dhimine po oondjo, oyo oya dhiminwa po, naamboka itaamu ya dhimine po, inaa dhiminwa po.”

²⁴Gumwe gwomaalongwa, Tomas, ngoka i ithanwa Mukwanambwiyu, ina adhika mo mokati kawo, Jesus sho e yi ihololele.

²⁵Aalongwa ooyakwawo oye mu lombwele ya ti: “Tse otwa mono Omuwa.” Tomas okwa ti kuyo: “Ngele itandi mono iishaho yoomboha miikaha ye noitandi tsu omunwe gwandje moombululu moka mwa li oomboha, noshikaha shandje shi tse molupati lwe, itandi itaale.”

²⁶Omasiku gahetatu sho ga piti po, aalongwa oya adhika ishewe ya gongala mongulu, naTomas okwa li pamwe nayo. Omiyelo odha li dha patekeka, ihe Jesus okwe ya nokwa thikama mokati kawo e ta ti: “Ombili nayi kale nane!”

²⁷Opo ihe okwa lombwele Tomas a ti: “Ukitha omunwe gwoye nkuka, ngoye u tale iikaha yandje: Ganeka oshikaha shoye, u gume olupati lwandje. Za mo ihe momalimbililo, u itaale.”

²⁸Tomas okwe mu yamukula a ti: “Omuwa gwandje! Kalunga kandje!”

²⁹Jesus okwa ti kuye: “Owi itaale, sho wa mono ndje. Aanelago oomboka yi itaala, nando inaa mona ndje.”

³⁰Jesus okwa longo iikumithalonga yilwe oyindji montaneho yaalongwa ye, mbyoka inaayi nyolelwa mo membo ndika.

³¹Ihe mbika oya nyolwa, opo mu itaale kutya Jesus oye Kristus, Omuna gwaKalunga, nongele mwi itaala, otamu mono omwenyo molwe.