Read Oshindonga-Ombiimbeli Ondjapuki JOHANNES 9 Bible Online

JOHANNES 9 - Oshindonga-Ombiimbeli Ondjapuki bible

JOHANNES 9

¹Jesus manga a li te ende, okwa mono omulumentu omuposi, nkene tuu a valwa.

²Aalongwa ye oye mu pula ya ti: “Muhongi, olye a yono, omulumentu nguka opo a valwe omuposi? Aakuluntu ye nenge oye mwene?”

³Jesus okwa yamukula. “Uuposi we kau na sha noondjo dhe nenge dhaakuluntu ye. Ye okwa ningi omuposi, opo oonkondo dhaKalunga dhi hololwe muye.

⁴Tse otu na okukala tatu longo iilonga yaanguka a tumu ndje, manga tu na omutenya. Uusiku otau ya, uuna kaape na we ngoka ta vulu okulonga.

⁵Manga ngame ndi li muuyuni, ongame uuyelele wuuyuni.”

⁶Jesus sho a popi oohapu ndhika, okwa hiyile omayeye pevi nokwe ga pilulile mumwe nevi e ta gwayeke enono ndyoka komeho gomulumentu ngoka

⁷nokwa ti kuye: “Inda, u ki iyoge moshipala medhiya lyaSiloa.” (Edhina ndika otali ti “Omutumwa.”) Omulumentu okwa yi e ti iyogo moshipala nokwa galuka ko omunameho.

⁸Nena aashiinda naantu mboka ya li haye mu mono shito, sho ta hehela, oya ti: “Omulumentu nguka haye ngoka a li ha kuutumba ta hehela?”

⁹Yamwe oya ti: “Oye ngoka.” Ihe ooyakwawo oya ti: “Aawe, haye, okwe mu fa ashike.” Omulumentu ye mwene okwa ti: “Ongame ngaa.”

¹⁰Oyo oye mu pula ya ti: “Omeho goye oga tonatithwa ngiini?”

¹¹Oyo okwa yamukula a ti: “Omulumentu ngwiyaka haku tiwa Jesus, oye a pilula enono lyomayeye nokwe li gwayeke komeho gandje e ta lombwele ndje, ndi ki iyoge moshipala medhiya lyaSiloa. Ngame onda yi, naasho ndi iyogo, onda tonata.”

¹²Oyo oya ti kuye: “Omulumentu ngoka oku li peni?” Oye okwa ti: “Kandi shi wo.”

¹³Nena oya fala omulumentu ngoka a li nale omuposi, kaafarisayi.

¹⁴Esiku ndyoka Jesus a li a pilula enono lyomayeye nokwa tonatitha omeho ge, olya li Esabati.

¹⁵Aafarisayi oya pula ishewe omulumentu, nkene a ningi omunameho. Oye okwe ya lombwele a ti: “Omwaaludhi gwandje okwa tula ndje enono pomeho, ngame ondi iyogo moshipala nonda mono ko.”

¹⁶Yamwe yomaafarisayi oya ti: “Omulumentu ngoka a ningi oshinima shika, ina za kuKalunga, oshoka iha vulika kompango yEsabati.” Ooyakwawo oya ti: “Omulumentu nguka ngele omulunde, ota vulu ngiini okulonga iikumithalonga yi thike mpaka?” Opo nopwa holoka etopoko mokati kawo.

¹⁷Aafarisayi oya pula natango omulumentu ngoka a li omuposi: “Ngoye oto tile ngiini omulumentu ngoka a tonatitha omeho goye?” Oye okwa yamukula a ti: “Oye omuhunganeki.”

¹⁸Aajuda oya li inaa hala okwiitaala kutya omulumentu nguka okwa li omuposi, ihe ngashingeyi oku wete ko, sigo yi ithana aakuluntu yaangoka a tonatithwa

¹⁹noye ya pula ya ti: “Nguno omuna gweni? Mwa ti, okwa valwa omuposi? Ongiini ano, sho e wete ko ngashingeyi?”

²⁰Aakuluntu ye oya yamukula ya ti: “Tse otu shi shi kutya ye omumwetu nokwa valwa omuposi.

²¹Ihe katu shi wo kutya oshe ende ngiini, ngashingeyi sho e wete ko. Osho wo ngoka a tonatitha omeho ge, katu mu shi. Puleni omwaaludhwa. Ye okwa koka, na yamukule ye mwene.”

²²Aakuluntu ye oya popi ngeyi, oyo oya li ya tila Aajuda. Oshoka Aajuda oyu uvanene kutya kehe ngoka ta hempulula kutya Jesus oye Kristus, ota kondwa mo mosinagoga.

²³Onkee aakuluntu ye oya ti “Oye okwa koka, mu puleni.”

²⁴Aafarisayi oya ithana olutiyali omulumentu ngoka a li omuposi noya ti kuye. “Uvaneka koshipala shaKalunga kutya oto ka popya oshili! Tse otu shi shi kutya omulumentu ngwiyaka omulunde.”

²⁵Omwaaludhwa okwa yamukula a ti: “Ngame kandi shi wo, ngele ye omulunde. Shimwe ashike ndi shi shi, osho shika: Ngame onda li omuposi, ihe ngashingeyi ondi wete ko.”

²⁶Oyo oya ti kuye: “Okwe ku ningi ngiini ano? Omeho goye okwe ga tonatitha ngiini?”

²⁷Oye okwe ya yamukula: “Onde mu hokololole nale, ihe inamu pulakena. Omolwashike mwa hala oku shi uva natango? Nane wo omwa hala okuninga aalongwa ye?”

²⁸Aafarisayi oye mu nyana ya ti: “Ongoye awike omulongwa gwe, tse aalongwa yaMoses.

²⁹Tse otu shi shi kutya Kalunga okwa popile naMoses, ihe omulumentu ngoka katu shi nkoka a za.”

³⁰Omutonatithwa okwe ya yamukula a ti: “Oshikumitha osho shika kutya ne kamu shi nkoka a za, ihe oye tuu a tonatitha omeho gandje.

³¹Tseni atuheni otu shi shi kutya Kalunga iha pulakene ewi lyaalunde, ihe oha pulakene aantu mboka haye mu tila nohaa gwanitha ehalo lye.

³²Okuza ketameko lyuuyuni inaku uvika nando ogumwe a tonatitha omeho gomuntu a valwa omuposi.

³³Omulumentu nguka ando okwa li inaa za kuKalunga, ando ke na shoka ta vulu okuninga.”

³⁴Oyo oye mu yamukula ya ti: “Ngoye owa valelwa nowa putukila muulunde, ihe owa hala oku tu longa?” Oyo noye mu umbu mo mosinagoga.

³⁵Jesus oku uvu kutya oye mu umbu mo mosinagoga. Sho e mu mono, okwa ti kuye: “Ngoye owi itaala Omuna gwOmuntu?”

³⁶Omulumentu okwa yamukula a ti: “Tatekulu, lombwela ndje kutya oye olye, opo ndi vule oku mu itaala.”

³⁷Jesus okwa ti kuye: “Owe mu mona nale noye ngoka ta popi nangoye ngashingeyi.”

³⁸Oye okwa ti: “Omuwa, ondi itaala.” Oye okwa tsu oongolo koshipala shaJesus.

³⁹Jesus okwe mu lombwele a ti. “Ngame onde ya muuyuni mbuka okupangula, opo mboka ihaa mono ko, ya mone ko, naamboka haa mono ko, ya tsike.”

⁴⁰Yamwe yomaafarisayi mboka ya li pamwe naye, oyu uvu oohapu ndhika noya ti kuye: “Oto dhiladhila kutya natse wo aaposi?”

⁴¹Jesus okwa ti kuyo: “Ando omwa li aaposi, ando kamu na oondjo, ihe sho tamu ti: ‘Tse otu wete ko,’ nena otashi ti, omu na oondjo.”