Read Oshindonga-Ombiimbeli Ondjapuki AAROMA 10 Bible Online

AAROMA 10 - Oshindonga-Ombiimbeli Ondjapuki bible

AAROMA 10

¹Aamwameme, ondi na ehalo momwenyo gwandje, Aaisraeli ya hupithwe, onkee ohandi ya galikanene.

²Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela.

³Oshoka inaa tseya nkene Kalunga ta ningi aantu aayuuki koshipala she. Oyo otaa kambadhala okutota ondjila yawo yene yo inaa gama kondjila ndjoka yaKalunga yokuninga aantu aayuuki.

⁴Oshoka ompango oya hulu, sho Kristus e ya, opo kehe ngoka ti itaale, a ninge omuyuuki koshipala shaKalunga.

⁵Moses ota nyola kombinga yomuntu ngoka ta ningi omuyuuki koshipala shaKalunga mokugwanitha ompango ta ti: “Omuntu ngoka ta gwanitha shoka tashi pulwa kompango, ota kala e na omwenyo molwayo.”

⁶Ihe shoka tashi popiwa kombinga yomuntu ta ningi omuyuuki koshipala shaKalunga molweitaalo, osho shika: “Ino ilombwela mwene, u tye: Olye ta londo, a ye megulu?” nokutya e ke ete Kristus.

⁷“Ino tya wo: Olye ta kulukile muule mwiya?” nokutya e ke ete ko Kristus kuusi.

⁸Shika otashi ti. “Oohapu dhaKalunga odhi li popepi nangoye, mokana koye nomomwenyo gwoye.” Odho oohapu ndhoka tatu dhi uvitha notadhi pula eitaalo.

⁹Ngele to hempulula nokana kutya Jesus oye Omuwa, nowi itaala momwenyo gwoye kutya Kalunga okwe mu yumudha kuusi, nena oto hupithwa.

¹⁰Oshoka ngoka i itaala nomwenyo gwe aguhe, ota ningi omuyuuki koshipala shaKalunga, naangoka ta hempulula nokana ke, ota hupithwa.

¹¹Oshoka enyolo otali ti: “Kehe ngoka te mu itaale, ita sithwa ohoni.”

¹²Mpaka kapu na eyooloko pokati kAajuda naapagani. Kalunga oye Omuwa gwaayehe noha gandja ayihe yomuuyamba we kwaayehe mboka taye mu ithana.

¹³Ngaashi enyolo tali ti: “Kehe ngoka ti ithana edhina lyOmuwa, ota hupithwa.”

¹⁴Ihe otaye mu ithana ngiini, ngele inaye mu itaala? Notaa itaale ngiini, ngele inaa uvithilwa?

¹⁵Noohapu otadhi uvithwa ngiini, ngele aayuvithi inaa tumwa ko? Ngaashi enyolo tali ti: “Osho opala ngiini, aantu mboka taye ya okuuvitha elaka etoye!”

¹⁶Ihe haayehe ya taamba elaka etoye. Jesaja mwene ota ti: “Omuwa, olye i itaale euvitho lyetu?”

¹⁷Onkee ano eitaalo ohali zi mokuuva, neuvitho otali zi moohapu dhaKristus.

¹⁸Ihe ote pula: Oshoshili tuu kutya inaa uva? Oyo oyu uva, ngaashi enyolo tali ti: “Ekugagano lyewi lyaayuvithi olyi ifala kombanda yevi alihe, oohapu dhawo odha thiki sigo okooha dhuuyuni.”

¹⁹Ihe natango ote pula: Aaisraeli inaye shi tseya nani? Moses ota yamukula tango ta ti: “Otandi mu ningi mwa sila aantu efupa mboka yaa shi oshigwana. Otandi mu ningi mu geele oshigwana shaa na oondunge.”

²⁰Jesaja wo okwa popi e na uupenda, sho ta ti: “Onda monika kaantu mboka inaa konga ndje, ondi ihololele aantu mboka inaa pula ndje.”

²¹Ihe kombinga yaIsrael ota ti: “Esiku alihe onda yelutha omaako kaantu ihaaya vulika noye na iityani.”