Read Oshindonga-Ombiimbeli Ondjapuki AAROMA 13 Bible Online

AAROMA 13 - Oshindonga-Ombiimbeli Ondjapuki bible

AAROMA 13

¹Omuntu kehe na vulike kaapangeli mboka taye mu pangele. Oshoka epangelo kehe itali vulu okukala po, ngele inali pitikwa kuKalunga. Aapangeli mboka tu ya na, oya tulwa po kuKalunga.

²Kehe ngoka ta tindi okuvulika kepangelo, oye okwa tsa ondumbo neutho lyaKalunga, naangoka ta ningi ngaaka, okwi ilongela okugeelwa.

³Oshoka aapangeli kaye lile po okutilitha mboka taa longo uuwanawa, ihe oomboka taa longo uuwinayi. Opo waa kale wa tila omupangeli, longa uuwanawa, nena ote ku pandula.

⁴Oshoka omupangeli oye omuyakuli gwaKalunga e lile po uuwanawa woye mwene. Ihe ngele to longo uuwinayi, kala wa tila, oshoka oku na oonkondo dhoku ku geela. Oye omuyakuli gwaKalunga mokugeela mboka taa longo uuwinayi.

⁵Onkee ano ne omu na okuvulika kaapangeli, hamolwokutila ondjahi yaKalunga ayike, ihe omolweiyuvo lyeni wo.

⁶Onkee ano omolwoshinima shika ohamu gandja oompale. Oshoka aapangeli ohaa longele Kalunga, uuna taa gwanitha iinakugwanithwa yawo.

⁷Ano ya peni shoka mu na oku shi ya pa: ya peni oompale nomafendelo; vulikeni ne mu ya simaneke ayehe.

⁸Inamu kala mu na ongunga yomuntu, kakele kongunga yokuholathana. Oshoka ngoka e hole mukwawo, oye okwa gwanitha ompango ayihe.

⁹Iipango oyo mbika: “Ino hondela, Ino dhipaga, Ino yaka, Ino haluka;” iipango mbika ayihe niikwawo ya gwedhwa ko, oya kwatelelwa moshipango shika: “Hola mukweni, ngaashi ngoye wi ihole mwene.”

¹⁰Oshoka ngoka e hole mukwawo, ita vulu oku mu ningila uuwinayi. Onkee ano ohole oyo egwanitho lyompango ayihe.

¹¹Ningeni shika, oshoka omwa tseya ethimbo ndika kutya olyo ethimbo lyokupenduka moomposi. Ngashingeyi ehupitho lyetu oli li popepi li vule lyuuna ndoka twa tameke okwiitaala.

¹²Uusiku owa tya koongulasha, netango oli li pokupita. Natu etheni okulonga iilonga yomomilema. Natu ihomatekeni iikondjitho, tse tu kondjeni tu li muuyelele.

¹³Natu endeni pamikalo ndhoka dho opala, ngashika aantu taa ende muuyelele; hamuufukedhi nomuunkolwi, hamuuholume nomuukeeneidhiliko, hamoontamanana nomefupa.

¹⁴Ihe ihomatekeni iikondjitho mbyoka tamu yi pewa kOmuwa Jesus Kristus, ne inamu landula ehalo lyomuntu guulunde.