Read Oshindonga-Ombiimbeli Ondjapuki AAROMA 16 Bible Online

AAROMA 16 - Oshindonga-Ombiimbeli Ondjapuki bible

AAROMA 16

¹Omumwameme meitaalo Foibe, ngoka ta yakula egongalo lyomuKenkrea, otandi mu gandja moshimpwiyu sheni.

²Mu taambeni medhina lyOmuwa, ne mu mu yakule moompumbwe dhe adhihe, ongaashi sho opalela aantu yaKalunga. Oshoka oye okwa yakula aantu oyendji, nangame mwene wo.

³Kundeni Priska naAkula, aayakuli ooyakwetu moshilonga shaJesus Kristus.

⁴Oyo oya li ya hupula oomwenyo dhawo omolwandje. Otandi ya pandula unene, hangame awike, ihe otaa pandulwa wo komagongalo agehe ngoka ga zi maapagani.

⁵Kundeni wo egongalo ndyoka hali gongala megumbo lyawo. Kundeni kuume kandje omuholike Epainetus, ngoka i itaale tango Kristus muAsia.

⁶Kundeni Maria, ngoka e mu ihepekele noonkondo.

⁷Kundeni Andronikus naJunias, oyo Aajuda ooyakwetu mboka ya li mondholongo pamwe nangame. Oyo oya tseyika nawa kaayapostoli noya ningi tango aakriste kungame.

⁸Kundeni Ampliatus, kuume kandje omuholike muukumwe nOmuwa.

⁹Kundeni Urbanus, omuyakuli mukwetu moshilonga shaKristus nakuume kandje omuholike Stakus.

¹⁰Kundeni Apelles, ngoka i iholola kutya okwa hala okulandula Kristus. Kundilii po yaandjaAristobulus.

¹¹Kundeni Herodion, Omujuda mukwetu, naakriste mboka ye li maandjaNarkissus.

¹²Kundeni Trifania naTrifosa, oomboka ye li moshilonga shOmuwa, nosho wo kuume kandje omuholike Persis, ngoka a longele Omuwa nuudhiginini.

¹³Kundeni Rufus, omuyakuli a simana moshilonga shOmuwa, nayina, ngoka a kala nangame ongomwana.

¹⁴Kundeni Asinkritus, Flegon, Hermes, Patrobas, Hermas naakriste ooyakwetu ayehe mboka ye li puyo.

¹⁵Kundeni Filologus naJulia, Nereus nomumwayina omukiintu, Olimpas, naantu ayehe yaKalunga ye li puyo.

¹⁶Kundilathanii po nohole yaamwayinathana. Omagongalo agehe gaKristus otage mu kundile po.

¹⁷Aamwameme, otandi mu kumagidha, mu angale aantu mboka taa eta omatopoko notaa pukitha ooitaali, sho ya tsa ondumbo nelongo ndyoka mwe li longwa. Kaleni kokule nayo.

¹⁸Aantu mboka haa ningi iinima ya tya ngeyi, itaa longele Kristus, Omuwa gwetu, aawe, ihe oya pikwa komahalo gawo yene. Oyo ohaa popi oohapu oombwanawa dhokufundjaleka nokupukitha omadhiladhilo gaantu yaa na oondjo.

¹⁹Kehe omuntu okwa uva kutya ohamu vulika kevaangeli; onkee onde mu nyanyukilwa. Oshoka onda hala mu kale aanandunge miinima mbyoka iiwanawa ne kaamu kale mu na okantongo miinima iiwinayi.

²⁰Kalunga, oluthithiya lwombili, ota ka nyanyagulila mbala Satana kohi yoompadhi dheni. Esilohenda lyOmuwa gwetu Jesus nali kale pamwe nane.

²¹Timoteus, omuyakuli mukwetu ote mu kundile po, nosho wo Lukius, Jason naSosipater, Aajuda ooyakwetu, otaye mu kundile po.

²²Ngame Tertius, omukriste mukweni nomunyoli gwoohapu dhaPaulus, otandi mu kundile po.

²³Gaius, omweedhilili gwandje, ote mu kundile po. Megumbo lye omo hamu gongala aakwanegongalo. Erastus, omudhiginini gwiimaliwa yoshilando, nomumwameme Kwartus otaye mu kundile po.

²⁴Esilohenda lyOmuwa Jesus Kristus nali kale pamwe nane. Amen.

²⁵Kalunga na simanekwe! Oye ngoka e na oonkondo oku mu kaleka mwa kola meitaalo, tashi monika melaka etoye ndyoka tali popi Jesus Kristus. Otashi monika wo mehololo lyoshili ndjoka ya kala ya holekwa nale momathimbo ga pita.

²⁶Ngashingeyi oshili ndjika oye etwa puuyelele momanyolo gaahunganeki nokelombwelo lyaKalunga kaaluhe noya tseyithilwa iigwana ayihe, aantu ayehe opo ya vulike kuye noye mu itaale.

²⁷Kalunga, ngoka omunandunge awike, na simanekwe omolwaJesus Kristus aluheluhe. Amen.