Read Oshindonga-Ombiimbeli Ondjapuki AAROMA 3 Bible Online

AAROMA 3 - Oshindonga-Ombiimbeli Ondjapuki bible

AAROMA 3

¹Ano Aajuda oye vule aapagani mushike? Efukaleko oli na tuu ekwatho lyasha?

²Eeno, Aajuda oye na oshindji pamikalo odhindji. Shotango, oya pewa oohapu dhaKalunga.

³Ongiini ano, yamwe yomuyo sho inaa itaala? Okwaaitaala kwawo otaku ningi tuu, Kalunga a kale kee shi omwiinekelwa?

⁴Itashi vulika! Kalunga oye omunashili, nonando omuntu kehe oye omufundja. Ngaashi enyolo tali ti: “Ngele to popi, aluhe ou li mondjila. Ngele to tamanekwa, ongoye to sindana.”

⁵Ihe ongiini ano, omayono getu ngele otaga holola kutya Kalunga oye omuyuuki? Otatu ti ngiini ano? Otatu ti, Kalunga oha longo epuko, ngele te tu geele? Mpaka ote popi pantu.

⁶Aawe, hasho! Kalunga ota vulu ngiini okupangula uuyuni, ngele ke shi omuyuuki?

⁷Ihe ongiini, oshili yaKalunga, ndjoka tayi mu simanekitha, ngele otayi hololwa nawa kiifundja yandje? Omolwashike ndi na okupangulwa natango ndi li omulunde?

⁸Omolwashike itaandi ti: “Tu longeni uuwinayi, opo mu ze uuwanawa?” Oshoka aantu yamwe oya sheke ndje nokulundila ndje kutya onda popi ngeyi. Oyo otaa ka pangulwa, ngaashi ye shi ilongele.

⁹Ongiini ano? Tse Aajuda otu li nawa ando tu vule aapagani? Aawe, hasho! Oshoka onde shi ulike nale kutya Aajuda naapagani ayehe oye li kohi yoonkondo dhuulunde.

¹⁰Ongaashi kwa nyolwa taku tiwa: “Kaku na nande omuntu gumwe omuyuuki.

¹¹Kaku na nando ogumwe u uvite ko, kaku na nando ogumwe ta kongo Kalunga.

¹²Aantu ayehe oye etha Kalunga. Ayehe oya puka. Kaku na nando ogumwegumwe ta longo uuwanawa.

¹³Omiligu dhawo odha fa ombila ye ekama. Omalaka gawo ogu udha oohapu dhomakoto. Omilungu dhawo otadhi popi oohapu oombwinayi dha fa uuzigo wontoka.

¹⁴Omakana gawo ogu udha omatukano omadhigu.

¹⁵Oyo otaa matuka, ya ka dhipage omuntu.

¹⁶Eyonuuko niiponga otayi kala mpoka ye enda.

¹⁷Oyo inaa tseya ondjila yombili,

¹⁸yo inaa ilonga okutila Kalunga.”

¹⁹Ngashingeyi otu shi shi kutya ashihe shoka sha nyolwa mompango, otayi shi lombwele mboka ye li kohi yoonkondo dhompango, opo omuntu kehe a mutikwe, nuuyuni auhe u tompwe kutya ou na oondjo koshipala shaKalunga.

²⁰Oshoka kaku na nando omuntu ta ningi omuyuuki koshipala shaKalunga, sho a gwanitha shoka tashi pulwa kompango; oshoka ompango oyi lile po okutseyithila omuntu kutya oye omulunde.

²¹Ihe ngashingeyi Kalunga okwa holola po ondjila yokuninga aantu aayuuki koshipala she kaayi na sha nompango. Ompango naahunganeki oye shi popi kutya

²²Kalunga ota ningi aantu aayuuki, sho yi itaala Jesus Kristus. Oye ote shi ningile aantu ayehe mboka yi itaala pwaa na eyooloko.

²³Oshoka aantu ayehe oya yona, kaye na oonkondo dhoku ya hupitha.

²⁴Ihe molwomagano gesilohenda lye Kalunga ote ya ningi aayuuki, oshoka Jesus Kristus okwe ya kulila.

²⁵Kalunga okwa gandja Jesus, opo mokusa kwe a ninge iikulila, moka aantu mboka ye mu itaala, taa dhiminwa po oondjo dhawo. Kalunga okwe mu gandja, opo a ulike, nkene ta ningi aantu aayuuki koshipala she. Nale Kalunga okwa li i idhidhimikile nokwe etha oondjo dhaantu, inee ya geela omolwadho.

²⁶Ngashingeyi Kalunga ota holola kutya oye oku li mondjila, sho ta ningi omuntu kehe ngoka i itaala Jesus, omuyuuki koshipala she.

²⁷Otatu vulu natango tuu okwiitanga? Aawe, itashi vulika we! Omolwashike? Omolwaashoka omuntu ta gwanitha ompango? Aawe, omolwaasho i itaala.

²⁸Ano otatu ti kutya omuntu ota ningi owala omuyuuki koshipala shaKalunga, sho i itaala, ihe hamolwaasho ta gwanitha shoka tashi pulwa kompango.

²⁹Nenge Kalunga okAajuda ayeke? Ke shi nani Kalunga kaapagani wo? Eeno, okaapagani wo.

³⁰Kalunga gumwe awike, ngoka ta ningi Aajuda aayuuki koshipala she omolweitaalo lyawo nosho wo aapagani omolweitaalo lyawo.

³¹Ano ompango otatu yi dhimi po molweitaalo? Aawe, hasho; ihe otatu yi koleke.