Read Oshindonga-Ombiimbeli Ondjapuki AAROMA 4 Bible Online

AAROMA 4 - Oshindonga-Ombiimbeli Ondjapuki bible

AAROMA 4

¹Otatu ti ngiini ano kombinga yatatekulu Abraham pazimo? Oye okwa mono shike?

²Ngele Abraham okwa ningi omuyuuki koshipala shaKalunga molwaashoka e shi ningi, nena ota vulu oku shi itangela, ihe hakoshipala shaKalunga.

³Oshoka enyolo otali ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.”

⁴Omuntu ngoka ta longo, oha futwa, nondjambi ye itayi talwa kutya oshinima sha gandjwa omagano, aawe, otayi talwa oshinima e shi ilongele ye mwene.

⁵Omuntu ngoka iti ilongele sha, ihe okwi itaala Kalunga, ngoka ta taamba omulunde a kale kee na oondjo, ota talwa omuyuuki koshipala shaKalunga omolweitaalo lye.

⁶Shika osho naanaa shoka David e shi popi, sho a ti kutya omuumentu omunelago oye ngoka Kalunga te mu tala omuyuuki pwaa na iilonga:

⁷“Aanelago aantu mboka Kalunga e ya dhimina po omayono gawo, oomboka oondjo dhawo dha siikilwa.

⁸Omuntu omunelago oye ngoka Omuwa itaa yalula we oondjo dhe.”

⁹Ano elago ndino tali popiwa kuDavid olyaamboka ya fukalekwa ayeke? Aawe, olyaamboka wo inaa fukalekwa. Oshoka otwa ti: “Abraham okwi itaale Kalunga, nomolweitaalo ndika Kalunga okwe mu tala ihe omuyuuki.”

¹⁰Shika osha ningwa uunake? Ndishi omanga Abraham a li inaa fukalekwa.

¹¹Tango okwi itaale, opo ihe okwa fukalekwa, nokufukalekwa kwe okwa ningi ihe endhindhiliko tali koleke kutya Kalunga okwa tala Abraham omuyuuki koshipala she, sho i itaala. Ngashingeyi Abraham oye he yopambepo yaayehe mboka yi itaala Kalunga noya taambwa aayuuki koshipala she, nonando inaa fukalekwa.

¹²Oye wo he yaamboka ya fukalekwa, hamolwaasho owala ya fukalekwa, ihe omolwaasho ye li meitaalo ndyoka tate Abraham a li e li na, manga inaa fukalekwa.

¹³Kalunga oku uvanekele Abraham, uuyuni u ninge we nowoluvalo lwe. Euvaneko ndika inali ningwa ando molwaasho Abraham a gwanitha ompango, ihe omolwaasho i itaala, naKalunga okwe mu tala omuyuuki.

¹⁴Oshoka ngele omauvaneko gaKalunga otaga pewa mboka taa gwanitha ompango, nena eitaalo lyomuntu itali kwatha sha nomauvaneko gaKalunga kage na oshilonga.

¹⁵Ano ompango otayi etelele ondjahi yaKalunga; ihe hoka kwaa na ompango, kaku na wo eyono lyompango.

¹⁶Euvaneko olya gandjwa molweitaalo, opo li kolekwe nawa kutya olyo esilohenda lyaKalunga koluvalo aluhe lwaAbraham, hakwaamboka haa vulika kompango, ihe nokwaamboka wo yi itaala ngaashi Abraham. Oshoka Abraham oye tate yopambepo atuhe mbaka.

¹⁷Ongaashi enyolo tali ti: “Ngame onde ku ningi he yiigwana oyindji.” Euvaneko oli na oshilonga oshinene koshipala shaKalunga, ngoka i itaalwa kuAbraham. Oye Kalunga ngoka ta yumudha aasi, naangoka ta popi, iinima mbyoka ya li yaa ko e tayi holoka.

¹⁸Abraham okwi itaale nokwa tegamene, manga pwaa na sha shokutegamenwa, onkee okwa ningi he yiigwana oyindji. Ongaashi enyolo tali ti: “Oluvalo lwoye otalu ka ningwa wo olwindji.”

¹⁹Oomvula dhaAbraham odha li lwopethele, ihe ina nengena meitaalo lye, nando e wete kutya olutu lwe kalu na we oonkondo dholuvalo, naSara ita vala we.

²⁰Oye okwi itaale ye ina limbililwa shoka e shi uvanekelwa kuKalunga, onkee eitaalo lye olye mu koleke e ta hambelele Kalunga.

²¹Oshoka Abraham okwa li e shi shi nawa kutya shoka Kalunga e shi uvaneke, ota vulu oku shi gwanitha.

²²Onkee ano Kalunga okwa tala Abraham omuyuuki koshipala she, sho i itaala.

²³Oohapu ndhika: “Kalunga e mu tala omuyuuki koshipala she,” inadhi nyolwa molwaAbraham awike,

²⁴ihe odha nyolwa wo molwetu, mboka tatu talwa aayuuki, sho twi itaala Kalunga ngoka a yumudha Omuwa gwetu Jesus kuusi.

²⁵Kalunga okwa gandja Jesus omolwoondjo dhetu nokwe mu yumudha kuusi, e tu ninge aayuuki koshipala she.