Read Oshindonga-Ombiimbeli Ondjapuki 1 AAKORINTO 13 Bible Online

1 AAKORINTO 13 - Oshindonga-Ombiimbeli Ondjapuki bible

1 AAKORINTO 13

¹Nando ndi popye omalaka gaantu nogaayengeli, ihe kandi na ohole, nena okupopya kwandje okwa fa owala ekudhilo lyokangendjo taka tono nenge lyongendjo tayi ngelengendja.

²Nando ondi kale ndi na omagano gokupopya elaka lyaKalunga nondi na owino wokutseya iiholekwa ayihe; nando ondi kale ndi na eitaalo tali vulu okudhikula po oondundu, ihe kandi na ohole, ongame oshinima showala.

³Nando ondi gandje po iinima ayihe, nenge ndi gandje olutu lwandje, lu fikwe po, ihe kandi na ohole, itashi kwatha ndje sha.

⁴Ohole ohayi idhidhimikile ayihe noyi na olukeno. Ohole ihayi si efupa, ihayi tuwalala.

⁵Ohole ihayi holoka nayi, ihayi kongo shayo yene, ihayi ningi omwenyo omwiinayi, ohole ihayi dhimbulukwa uuwinayi ye u ningilwa.

⁶Ohole ihayi nyanyukilwa uugoyoki, ihe ohayi nyanyukilwa oshili.

⁷Ohole ihayi tonyala, ihe otayi itaale, tayi tegamene e tayi idhidhimike sigo okehulilo.

⁸Ohole itayi hulu po. Okupopya elaka lyaKalunga itaku kala sigo aluhe, omagano gokupopya omalaka gaa shiwike itaga kala sigo aluhe, nosho wo okutseya otaku hulu po.

⁹Oshoka okutseya nokupopya kwetu elaka lyaKalunga inaku gwana.

¹⁰Ihe shono sha gwana sha pwa ngele tashi ya, nena shono inaashi gwana, otashi hulu po.

¹¹Ngame sho nda li okanona, onda popi, nda dhiladhila nonda yeleke pakanona; ihe sho nda ningi omulumentu, onde etha ayihe yopakanona.

¹²Shoka tu wete ngashingeyi osha fa owala efano inaali yela nawa lyomuntu ngoka ti italele moshiitalelo, ihe esiku ndiyaka otatu ka mona koshipala noshipala. Ngashingeyi okutseya kwandje inaku gwana, ihe esiku ndiyaka otandi ka tseya nda gwana, ngaashi naanaa Kalunga a tseya ndje nawa.

¹³Ihe ngashingeyi otaku kala mbika itatu: eitaalo, etegameno nohole, ihe oshinima oshinene kwaayihe mbika osho ohole.