Read Oshindonga-Ombiimbeli Ondjapuki 1 AAKORINTO 5 Bible Online

1 AAKORINTO 5 - Oshindonga-Ombiimbeli Ondjapuki bible

1 AAKORINTO 5

¹Akuhe otaku popiwa kutya mokati keni omu na oluhondelo lwa geya noonkondo, ndele naapagani ihaa yono eyono lya tya ngaaka. Oshoka onda lombwelwa kutya omulumentu gumwe ota kala nomukiintu gwahe.

²Otamu vulu ngiini okwiitanga? Omwa li mu na okukala mwa sa oluhodhi, nomulumentu ngoka a ningi oshinima sha tya ngeyi, okwa li e na okukondwa mo mokati keni.

³Oshoka ngame nando kandi li mokati keni palutu, onkee tuu ndi li pamwe nane pambepo. Medhina lyOmuwa gwetu Jesus onda ningi nale etokolo kombinga yomulumentu ngoka a ningi iihuna yi thike mpoka. Shika onde shi ningi nda fa ndi li pune.

⁴Ngele tamu gongala, nangame wo otandi kala pamwe nane pambepo. Koonkondo dhOmuwa gwetu Jesus ndhoka dhi li mutseni,

⁵ne omu na okugandja omulumentu a tya ngeyi kuSatana, a dhenge olutu lwe. Pamwe omwenyo gwe tagu ka hupithwa mesiku lyOmuwa.

⁶Okwiitanga itaku mu opalele. Eyele omu li shi ndyoka tali ti: “Okafulika okashona ohaka tumbike ondombo ayihe.”

⁷Kuthii mo mokati keni efulika lya tya ngaaka ekulu lyuulunde, opo mu kale mwa yogoka. Nena otamu kala mwa fa ondombo inaayi fulikwa, nondi shi shi kutya osho mu li. Oshituthi shetu shOpaasa osha longekidhwa nale, oshoka onzigona yetu yOpaasa, Kristus, okwa dhipagwa.

⁸Tu dhaneni ano oshituthi shetu, ihe haniikwiila ya ningwa nefulika ekulu lyuulunde nolyonyata kehe, ihe oniikwiila inaayi fulikwa, ya yogoka noyashili.

⁹Montumwafo ndjoka nde mu nyolele, onde mu lombwele, mwaa kwatathane naahondeli.

¹⁰Ano inandi dhiladhila ando aahondeli yoomaapagani nenge aanalwiho, aayugi naasimaneki yiimenka, oshoka moku ya yanda omu na okuthiga po uuyuni mbuka.

¹¹Shoka nda tumbula montumwafo ndjoka, osho shika kutya inamu kwatathana nomuntu ngoka ti iningi a fa omukriste, nonando oye omuhondeli, omunalwiho, omusimaneki gwiimenka, omusheki, onkolwi nomuyugi. Nokuli inamu lya pamwe nomuntu a tya ngaaka.

¹²Onkee ano kashi shi oshinima shandje okupangula aantu mboka kaaye shi ooyitaali. Kalunga oye te ke ya pangula. Ne itamu pangula nani mboka yokombinga yeni ongaashi enyolo tali ti: “Umbii mo omuyoni mokati keni.”