Read Oshindonga-Ombiimbeli Ondjapuki 1 AAKORINTO 7 Bible Online

1 AAKORINTO 7 - Oshindonga-Ombiimbeli Ondjapuki bible

1 AAKORINTO 7

¹Kombinga yaambyoka mwa nyola, otandi ti ngeyi: Omulumentu ngoka itaa hokana, ota ningi nawa.

²Ihe omoluuhalu woluhondelo omulumentu kehe oku na okukala e na omukiintu gwe mwene, nomukiintu kehe oku na okukala e na omulumentu gwe mwene.

³Omulumentu kehe na gwanithile omukiintu gwe oompumbwe dhe. Osho wo nomukiintu na gwanithile omulumentu gwe oompumbwe dhe. Kehe gumwe oku na okugwanithila mukwawo oompumbwe dhe.

⁴Omukiintu omuhokanwa ke shi omupangeli gwolutu lwe mwene, ihe omulume oye omupangeli gwalwo. Osho wo nomulumentu ke shi omupangeli gwolutu lwe mwene, ihe omukadhi oye omupangeli gwalwo.

⁵Inamu idhilikathana, shila uuna mu uvathana, mu shi ninge okathimbo kowala, opo ethimbo ndyoka mu li longithe mokugalikana Kalunga. Konima yaashoka indeni kumwe ishewe pandjokana ngaashi shito, opo mwaa gwile memakelo lyaSatana, sho itaamu vulu okwiidhidhimika.

⁶Shika itandi shi mu lombwele ando pamukalo gwoshipango, ihe opampito ndjoka nde yi pewa.

⁷Onda hala, ando aantu ayehe ya kale ngaashi ngame; ihe omuntu kehe okwa pewa kuKalunga omagano gontumba, gumwe oongaka namukwawo oongeyaka.

⁸Mboka inaamu ya moondjokana naaselekadhi otandi mu lombwele: Osho opala, ngele itamu yi moondjokana, opo mu fe ndje.

⁹Ihe ngele itamu shi vulu, indeni moondjokana, oshoka okuya moondjokana okuhwepo ku vule okuhepekwa kehalo.

¹⁰Mboka ye li moondjokana, otandi ya lombwele oshipango sha zi kOmuwa, kashi shi shandje mwene: Omukiintu ina henga po omulumentu gwe.

¹¹Ngele ote shi ningi, oku na okukala itaa yi we moondjokana nenge a hangane ishewe nomulumentu gwe. Omulumentu ina henga po nando omukadhi.

¹²Aantu yalwe otandi ya lombwele omadhiladhilo gandje, haangoka gOmuwa: Omulumentu omukriste ngoka e na omukadhi kee shi omwiitaali, nomukadhi okwa zimina okukala naye, omulumentu ngoka ine mu henga po.

¹³Omukiintu omukriste ngoka a hokanwa komulumentu kee shi omwiitaali nokwa zimina okukala naye, nena omukiintu ngoka ine mu henga po.

¹⁴Oshoka omulumentu kee shi omwiitaali, ota vulu okutaambwa kuKalunga, sho a hangana nomukadhi omwiitaali. Osho tuu wo omukiintu kee shi omwiitaali, ota vulu okutaambwa kuKalunga, sho a hangana nomulumentu gwe omwiitaali. Ando okwa li hasho, ando uunona wawo otau talwa wa fa uunona waapagani, ihe ngashingeyi otau vulu okutaambwa kuKalunga.

¹⁵Ihe ngoka kee shi omwiitaali, ngele okwa hala okuhenga po mukwawo ngoka omukriste, ne shi ninge. Miinima ya tya ngeyi omunandjokana omukriste, omulumentu nenge omukiintu, okwa manguluka okuhogolola; oshoka Kalunga okwe mu ithanene okukalamwenyo ku na ombili.

¹⁶Meme ngoye omukriste, oto shi tseya ngiini kutya ito vulu okuhupitha omulumentu gwoye? Tate ngoye omukriste, oto shi tseya ngiini kutya ito vulu okuhupitha omukiintu gwoye?

¹⁷Kehe gumwe na kale pamagano ngoka e ga pewa kOmuwa, a kale ngaashi a li, uuna a adhika keithano lyaKalunga. Ndika olyo eutho momagongalo agehe.

¹⁸Kalunga ngele e ku ithana wa fukalekwa, ino kambadhala okulundulula efukaleko. Ngele wi ithanwa inoo fukala, ino ifukalekitha.

¹⁹Okukala wa fukalekwa nenge inoo fukalekwa hasho shi na oshilonga. Shoka shi na oshilonga, osho okuvulika kiipango yaKalunga.

²⁰Kehe gumwe na kale pomuthika gwe mpoka a li, uuna a adhika keithano lyaKalunga.

²¹Ngele owa li omupika sho Kalunga e ku ithana, kashi na mbudhi we. Ihe ngele ou na ompito yokumanguluka, shi ninga.

²²Oshoka omupika ngoka i ithanwa kOmuwa, a ninge omukriste, okwa mangululwa kOmuwa. Osho wo omumangululwa ngoka i ithanwa kuKristus, oye omupika gwe.

²³Kalunga okwe mu kulile niikulila yi na ondilo. Inamu ninga aapika yaantu.

²⁴Aamwameme, koshipala shaKalunga kehe gumwe na kale pomuthika mpoka a li, uuna i ithanwa.

²⁵Kombinga yaamboka inaaya ya moondjokana, inandi pewa oshipango kOmuwa, ihe omadhiladhilo gandje ongangoka nda silwa ohenda kOmuwa, oge shi kwiinekelwa.

²⁶Sho nda tala omathimbo ngaka omadhigu, otandi dhiladhila kutya, osho opala kehe omuntu, ngele ta kala pomuthika mpoka e li ngashingeyi.

²⁷Ngele ou li moondjokana, ino etha po omukiintu gwoye. Ngele owi ikalela, ino konga omukiintu.

²⁸Ihe ngele to hokana, ito yono; nosho wo omukadhona ngele ta hokanwa, ita yono. Ondi mu uvitile owala ohenda omoluudhigu womokukalamwenyo kwaamboka taa hokana.

²⁹Aamwameme, onda hala okutya: Ethimbo lyokukalamwenyo kwetu olyo efupi. Onkee ano mboka ya hokana, naa kale ya fa inaaya hokana.

³⁰Mboka taa lili, naa kale ya fa inaaya sa oluhodhi; mboka taa yolo, naa kale ya fa mboka inaaya nyanyukwa. Mboka taa ilandele sha, naa kale ya fa inaayi ilikolela sha.

³¹Mboka taa lalakana niinima yomuuyuni mbuka, naa kale ya fa inaayi itula muyo. Oshoka uuyuni mbuka kau li kokule nokuhula po.

³²Ngame onda hala, mu kale mwaa na iimpwiyu. Omulumentu ngoka inaa hokana, oti ipyakidhile owala niilonga yOmuwa, oshoka ota kambadhala okwoopalela Omuwa.

³³Ihe omulumentu ngoka a hokana, oti ipyakidhile niinima yomuuyuni, oshoka okwa hala okwoopalela omukadhi,

³⁴onkee ano okwa mangwa koombinga adhihe mbali. Omukiintu inaa hokanwa nenge ngoka omukadhona okwi ipyakidhila niilonga yOmuwa, oshoka okwa hala oku mu pa olutu nombepo ye. Ihe omukiintu a hokanwa oti ipyakidhile niinima yomuuyuni mbuka, oshoka okwa hala okwoopalela omulumentu gwe.

³⁵Otandi popi ngeyi, oshoka onda hala oku mu kwatha, haku mu manga. Onde mu halela okulonga shoka oshiwanawa noshi li mondjila, mu wape okwiigandja moshilonga shOmuwa.

³⁶Kombinga yayaali ya adhika ya yalekathana e taa tokola, yi idhilike oondjokana, otandi ti: Omumati ngele ita vulu okwiidhidhimika, nena naa hokane. Ngele taa hokana, itaa yono.

³⁷Omumati ngoka u uvite kutya ota vulu okwiikalela inaa hokana, nopwaa na ethiminiko lyomuntu, ne shi ninge. Ngele ota vulu okwiipangela noku na etokolo, nena oto opaleke, ngele ita hokana.

³⁸Onkee ano omumati ngoka ta hokana omuyalekwa gwe, ota opaleke, naangoka itee shi ningi, sho a hala okwiikalela, ota ningi nawa unene.

³⁹Omukiintu a hokanwa ita vulu okumanguluka, manga omulume e na omwenyo. Ihe ngele a si, nena omukiintu a tya ngaaka okwa mangulukila okuhokanwa komulumentu gulwe, ihe oondjokana dha tya ngaaka odhi na okukala dhopakriste.

⁴⁰Ihe osho opala unene, ngele omukiintu a tya ngaaka ita yi we moondjokana. Ngaka ogo omadhiladhilo gandje ngoka tandi tala kutya onde ga pewa kOmbepo yaKalunga.