Read Oshindonga-Ombiimbeli Ondjapuki 1 AAKORINTO 8 Bible Online

1 AAKORINTO 8 - Oshindonga-Ombiimbeli Ondjapuki bible

1 AAKORINTO 8

¹Ngashingeyi ote popi kombinga yonyama ya yambelwa iikalunga. Osho oshipu okudhiladhila kutya tseni atuheni otwa tseya, ohula oshike. Ihe okutseya otaku fala omuntu meinenepeko, nohole otayi tungu.

²Omuntu ngoka ta dhiladhila kutya oshinima shontumba oku shi shi, ke na naanaa ontseyo ya gwana.

³Ihe ngoka e hole Kalunga, okwa tseyika wo kuKalunga.

⁴Kombinga yokulya onyama ndjoka ya yambelwa iikalunga, tse otwa tseyeni kutya iikalunga oyo iinima ihaayi kwatha sha. Tse otu shi shi kutya oku na owala Kalunga gumwe.

⁵Oku na ngaa mbyoka haku tiwa “ookalunga”, ongele megulu nenge kombanda yevi. Ihe nando oku na “ookalunga” oyendji “naawa” oyendji,

⁶tseni otu na owala Kalunga gumwe. Oye Tate yetweni, omushiti gwiinima ayihe, mungoka tu na ethikilo. Otu na wo Omuwa gumwe awike, Jesus Kristus, ngoka Kalunga e mu shititha iinima ayihe, notu li po omolwe.

⁷Ihe haayehe ya tseya oshili ndjika. Aantu yamwe oyi igilila iikalunga. Onkee ano sigo onena ndjika ngele taa li onyama ya tya ngeyi, otaye yi dhiladhila kutya oya yambelwa iikalunga. Eiyuvo lyawo enkundi noyu uvite taa nyatekwa kiikulya ya tya ngaaka.

⁸Iikulya itayi vulu nando oku tu hedhitha popepi naKalunga. Itatu kanitha sha, ngele itatu li iikulya mbyoka; itatu likola wo sha, ngele tatu yi li.

⁹Kotokeni ano, emanguluko lyeni okutokola oshinima shika lyaa fale aantu mboka aankundi muulunde.

¹⁰Oshoka omuntu ngoka e na eiyuvo enkundi moshinima shika, ngele ta mono ngoka e na owino, ta li iikulya motempeli yoshikalunga, omunkundi a tya ngaaka ita tsuwa omukumo okulya iikulya mbyoka ya yambelwa iikalunga?

¹¹Ano mukweni a tya ngaaka omunkundi, ngoka Kristus a si wo omolwe, ota kana molwowino woye.

¹²Ngele tamu yono ngaaka kuyakweni mboka notamu nkundipaleke eiyuvo lyawo, otamu yono kuKristus.

¹³Ngele iikulya yontumba otayi fala mukwetu muulunde, nena ngame kombinga yandje itandi li we onyama, opo ndaa fale mukwetu muulunde.