Read Oshindonga-Ombiimbeli Ondjapuki 2 AAKORINTO 13 Bible Online

2 AAKORINTO 13 - Oshindonga-Ombiimbeli Ondjapuki bible

2 AAKORINTO 13

¹Nduka otalu ka ninga olutitatu tandi mu talele po. Ngele opu na uusama washa, oshi na okukolekwa koonzapo yaali nenge yatatu, ngashika enyolo tali ti:

²Onda hala ndi mu lombwele ne mboka mwa yono nale nane yalwe amuhe. Ngaashi nde mu lombwele nale metalelopo lyandje etiyali, natango otandi mu lombwele, manga ndaa po pune tandi ti: Ngashingeyi ngele tandi ke ya, itandi ka tala nando ogumwe onteni.

³Nena otamu ka tseya ihe kutya Kristus oye ta popi mungame. Kristus ngoka ta longo mokati keni, ke shi ngoka kee na oonkondo, ihe ota holola oonkondo dhe mune.

⁴Oshoka nando okwa si komushigakano a fa kee na oonkondo, ngashingeyi oku na omwenyo omolwoonkondo dhaKalunga. Muukumwe wetu naye natse wo otwa fa twaa na oonkondo, ihe mekwatathano lyetu nane otatu ka kala tu na omwenyo pamwe naye omolwoonkondo dhaKalunga.

⁵Ikonakoneni, ne mu iyeleke, opo mu tale, ngele omu li tuu meitaalo. Omwa tseya kutya Jesus Kristus oku li mune? Ngele hasho, nena omwa hunutha oshinima oshinene.

⁶Ondi inekela, otamu ka tseya kutya tse inatu shi hunutha.

⁷Tse otatu galikana Kalunga, mwaa ninge nando epuko lyasha. Mpaka itatu ulike kutya tse aasindani, ihe otwa hala okuulika kutya nane wo otamu vulu okulonga shoka shi li mondjila, nando tse otu kale twa fa inaatu sindana.

⁸Oshoka tse itatu vulu nando okulonga shoka sha tsa ondumbo noshili yaKalunga, ihe otatu yi popile.

⁹Tse otwa nyanyukwa, sho twaa na oonkondo, ihe ne aanankondo. Onkee ano otatu galikana, mu kale mwa gwana mwa pwa.

¹⁰Onkee ano otandi nyola ontumwafo ndjika, manga inaandi ya kune, opo uuna tandi ke ya, ndaa kale omukukutu mokati keni omolwepitikilo ndyoka nda pewa kOmuwa oku mu tunga, haku mu hanagula po.

¹¹Onkee ano, aamwameme, kalii po nawa! Lalakaneni mu kale mwa gwana. Taambeni ekumagidho lyandje, mu kale mwa tsa ompango yimwe. Uvathaneni, ne mu kale mu na ombili. Nena Kalunga kohole nokombili ota kala pamwe nane.

¹²Kundilathanii po nohole yaamwayinathana. Aantu yaKalunga ayehe otaye mu kundile po.

¹³Esilohenda lyOmuwa Jesus Kristus nohole yaKalunga nehangano lyOmbepo Ondjapuki nali kale nane amuhe.