Read Oshindonga-Ombiimbeli Ondjapuki 2 AAKORINTO 2 Bible Online

2 AAKORINTO 2 - Oshindonga-Ombiimbeli Ondjapuki bible

2 AAKORINTO 2

¹Ngashingeyi onda lundulula edhiladhilo lyandje moshinima shika: Itandi ya ko we kune, opo ndaaye mu nikithe oluhodhi.

²Oshoka ngame ngele onde mu nikitha oluhodhi, olye we ta hupu ko, a nyanyudhe ndje, kee shi ne mboka nda nikitha oluhodhi?

³Onkee ano tandi mu nyolele ontumwafo ndjika. Kanda li nda hala okuya kune, ndi nikithwe oluhodhi kaantu mboka ya li ye na okunyanyudha ndje. Oshoka ngame ondi inekela kutya uuna nda nyanyukwa, nena nane wo omwa nyanyukwa.

⁴Otandi mu nyolele ndi na oluhodhi olunene nuuwehame momwenyo gwandje. Onda lili omahodhi ogendji, haku mu nikitha oluhodhi, ihe oku mu ulukila kutya ondi mu hole.

⁵Ihe gumwe gwomune ngoka a nikitha mukwawo oluhodhi, hangame e shi ningile, ihe one amuhe. Nenge ndi tye oyendji yomune, oshoka inandi hala ndi mu ehameke.

⁶Osha gwana omuntu ngoka, sho a geelwa koyendji yomune pamukalo ngoka.

⁷Ngashingeyi omu na oku mu dhimina po noku mu hekeleka, opo kaa thindilwe pevi koluhodhi lwe e ti iyekelele.

⁸Onkee ano otandi mu kumagidha, mu kale noku mu hola.

⁹Oshoka sho nde mu nyolele ontumwafo ndjiyaka, onda li nda hala okutseya, nkene mwa sindi omamakelo nongele omwi ilongekidha aluhe okugwanitha omalombwelo gandje.

¹⁰Nongele mwa dhimine po omuntu a tya ngaaka uuwinayi mboka e u ningi, nena nangame wo otandi mu dhimine po. Shono otandi shi ningi omolweni amuhe koshipala shaKristus, ngele ondi na sha shokudhimina po kombinga yandje,

¹¹Satana opo kaa mone oonkondo oku tu pangela, oshoka omakoto ge otu ga shi.

¹²Ngame sho nda thiki muTroas okuuvitha elaka etoye tali hokolola Kristus, onda dhimbulula kutya Omuwa okwe egululile ndje osheelo, ndi longe mpeyaka.

¹³Ihe onda li ndu uvite uudhigu, oshoka omumwameme Titus inandi mu adha ko. Onkee onda laleke aantu yaahoka e te yi kuMakedonia.

¹⁴Ihe Kalunga na hambelelwe, oshoka ohe tu enditha aluhe mosheendo shaKristus shesindano! Ongaashi ezimba ewanawa tali taandele koombinga adhihe, osho Kalunga te tu longitha okutseyithila aantu ayehe Kristus.

¹⁵Mokati kaamboka taa hupithwa nokaamboka ye li mondjila ndjoka yu uka mekano, otwa fa ezimba lyeyambo lya nika nawa, ndyoka Kristus te li yambele Kalunga.

¹⁶Kwaamboka ye li mondjila ndjoka yu uka mekano, ezimba ndika otali ningi omuku tagu dhipaga, ihe mboka taa ka hupithwa, oyu uvite mulyo ezimba tali eta omwenyo. Olye ano ngoka a opalela oshilonga shika?

¹⁷Tse inatu fa yalwe oyendji mboka haa halitha oohapu dhaKalunga ongoshinima shombiliha. Tse aamati yaKristus Kalunga e tu tumu, onkee otatu popi oohapu dha yela montaneho ye.