Read Oshindonga-Ombiimbeli Ondjapuki 2 AAKORINTO 4 Bible Online

2 AAKORINTO 4 - Oshindonga-Ombiimbeli Ondjapuki bible

2 AAKORINTO 4

¹Kalunga okwe tu pe eyakulo ndika molwesilohenda lye, onkee itatu si uunye.

²Otwa laleke iilonga ayihe yomeholamo noyohoni. Tse ihatu longo nuufudhime noihatu pilike oohapu dhaKalunga, ihe ohatu popi oshili nokwiiholola pomuntu kehe e na eiyuvo ewanawa koshipala shaKalunga.

³Oshoka evaangeli ndyoka tatu uvitha, shila olya holekwa owala mboka ye li mondjila ndjoka yu uka mekano.

⁴Oomboka inaa itaala, oshoka omadhiladhilo gawo oga pukithwa komuhindadhi, kalunga komuuyuni mbuka, ngoka te ya imbi okumona uuyelele mboka tau ya minikile. Uuyeleke mboka otau zi melaka etoye ndyoka tali hokolola eadhimo lyaKristus, ngoka olupe lwaKalunga.

⁵Oshoka ihatu iyuvitha tse yene, aawe, ohatu uvitha kutya Jesus Kristus oye Omuwa. Natse otu li po aayakuli yeni omolwaJesus.

⁶Kalunga ngoka a popi nale a ti: “Momilema namu ze uuyelele, u minikile,” oye tuu ngoka a minikile wo nuuyelele we moomwenyo dhetu, opo tu tseye eadhimo lye, eadhimo ndyoka tali welima moshipala shaKristus.

⁷Ihe tse mbaka tu na uuyamba mbuka wopambepo, otwa fa owala iiyuma yeloya. Shika otashi ulike kutya oonkondo kadhi li mutse yene, ihe odhi li muKalunga.

⁸Tse otwa kala tu na uudhigu owindji, ihe inatu hatwa po. Omathimbo gamwe otwa kala momalimbililo, ihe inatu teka omukumo.

⁹Otwa kala tu na aatondi oyendji, ihe Kalunga ine tu ekelahi. Pomathimbo gamwe otwa hepekwa unene, ihe inatu yonagulwa po.

¹⁰Aluhe otwe ende nokuhumbata eso lyaJesus momalutu getu omasi, opo omwenyo gwe gu holoke wo momalutu getu.

¹¹Mokukalamwenyo kwetu akuhe otwa kala aluhe popepi noshiponga sheso molwaJesus, opo omwenyo gwe gu holoke momalutu ngaka getu omasi.

¹²Shika otashi ti kutya eso otali longo mutse, ihe omwenyo ogu li mune.

¹³Enyolo otali ti: “Ngame ondi itaala, onkee otandi popi.” Onkee ano sho tu na ombepo yimwe yeitaalo, natse wo otatu popi, oshoka otwi itaala.

¹⁴Oshoka otu shi shi kutya Kalunga, ngoka a yumudha Omuwa Jesus kuusi, ote ke tu yumudha wo pamwe naJesus note ke tu eta koshipala she pamwe nane.

¹⁵Iinima ayihe otayi ningwa molweni. Esilohenda lyaKalunga sho tali adha aantu oyendjiyendji, nena oku na wo oyendji mboka taa ka hambelela nokusimaneka Kalunga.

¹⁶Onkee ano itatu si uunye. Omuntu gwetu gwokombanda uuna ta yonuka po, omuntu gwetu gwomeni ota ningwa omupe esiku kehe.

¹⁷Oshoka uudhigu mbuka tu na ngashingeyi, owokathimbo notau ke tu etela eadhimo enenenene lyaa shi kuyelekwa nolyaaluhe.

¹⁸Tse ihatu tala iinima mbyoka yi wetike, ihe oombyoka kaayi wetike. Oshoka shoka shi wetike, otashi kala owala okathimbo, ihe shoka itaashi vulu okumonika, otashi kala aluhe.