Read Oshindonga-Ombiimbeli Ondjapuki AAGALATI 1 Bible Online

AAGALATI 1 - Oshindonga-Ombiimbeli Ondjapuki bible

AAGALATI 1

¹Ontumwafo ndjika oya zi kuPaulus, ngoka eithano lye okuninga omuyapostoli inaali za komuntu nenge komadhiladhilo gomuntu, ihe olya zi kuJesus Kristus nokuKalunga He, ngoka e mu yumudha kuusi.

²Aamwameme ayehe mboka ye li mpaka pungame, otaa kundile po omagongalo agehe gomuGalatia.

³Silweni ohenda, ne mu kale mu na ombili yaKalunga Tate noyOmuwa Jesus Kristus.

⁴Kristus ngoka i igandja ye mwene omolwoondjo dhetu, opo e tu hupithe mo methimbo ndika ewinayi, sho a vulika kehalo lyaTate Kalunga.

⁵Kalunga na simanekwe aluhe sigo aluhe! Amen.

⁶Ngame onde mu kuminwa. One omwa pilamene nziyanziya Kalunga, ngoka e mu ithana molwesilohenda lyaKristus, nomwa gama kevaangeli lilwe.

⁷Sho shene kaku na evaangeli lilwe, ihe otandi shi ti, oshoka ope na aantu yamwe mboka taye mu piyaganeke notaa kambadhala okupilika evaangeli lyaKristus.

⁸Ihe nonando otse nenge omuyengeli a ze megulu, te mu uvithile evaangeli lilwe lyaa shi ndyoka twe li mu uvithile, na pangulilwe moheli.

⁹Shoka twa popi nale, ngame otandi shi popi ishewe ngashingeyi: Ngele ope na ngoka te mu uvithile evaangeli lyaa shi ndyoka mwe li taamba, oye na pangulilwe moheli.

¹⁰Shika itashi uvika ko ando sha fa ongaangoka tandi kambadhala okwoopalela aantu? Aawe! Ngame onda hala okwoopalela Kalunga. Natango otandi kambadhala okukala nda hokiwa kaantu? Ngele nani otandi kambadhala okuninga ngaaka, nena kandi shi we omumati gwaKristus.

¹¹Aamwameme, nandi mu hokololele oshinima shika kutya evaangeli ndyoka tandi uvitha, inali totwa komuntu.

¹²Ngame inandi li pewa nando okomuntu gwontumba, nongaashi kape na nando ogumwe ngoka e li longo ndje, ihe oJesus Kristus ye mwene e li hololele ndje.

¹³Ne omwa hokololelwa okukala kwandje kwonale, nkene nda li ependa meitaalo lyopaShijuda nonda tidhagana egongalo lyaKalunga ndaa na ohenda nonda ningi ashihe shoka tandi vulu oku li hanagula po.

¹⁴Ngame onda li ependa ndi vule Aajuda ooyakwetu oyendji yepipi lyandje mokukala meitaalo lyopaShijuda. Onda li wo ependa mokudhiginina omithigululwakalo dhootate.

¹⁵Ihe nando ongaaka, Kalunga okwa hogolola ndje molwesilohenda lye, manga inaandi valwa, nokwi ithana ndje, ndi mu longele.

¹⁶Oye okwa tokola okuhololela ndje Omwana, opo ndi uvithile aapagani elaka etoye tali popi Omwana. Onkee ngame inandi ya nando okomuntu gumwegumwe oku mu pula omayele.

¹⁷Osho wo inandi ya kuJerusalem kumboka ya ningi tango aayapostoli kungame. Ihe onda yi mbalambala kuArabia nonda galukile ishewe kuDamaskus.

¹⁸Oomvula ndatu sho dha piti po, onda yi ihe kuJerusalem okumona oowino kuPetrus nonda kala puye uule wiiwike iyali.

¹⁹Ngame inandi mona nando omuyapostoli mukwawo gulwe, kakele kaJakob, ngoka omumwayina gwOmuwa.

²⁰Shoka tandi mu nyolele, oshoshili. Otandi popi ndi li koshipala shaKalunga, ite fundju.

²¹Konima onda yi komikunda dhomuSiria nodhomuKilikia.

²²Ethimbo ndika alihe aakriste ayehe yomomagongalo gomuJudea oya li inaa tseya oshipala shandje.

²³Oyo yu uvu ashike shono tashi hokololwa kaantu yalwe kutya omulumentu ngoka a li he tu hepeke shito, ngashingeyi otu uvitha eitaalo ndyoka a li a hala okuhanagula po.

²⁴Oyo noya hambelele Kalunga omolwandje.