Read Oshindonga-Ombiimbeli Ondjapuki AAGALATI 4 Bible Online

AAGALATI 4 - Oshindonga-Ombiimbeli Ondjapuki bible

AAGALATI 4

¹Ihe ngame otandi ti: Omuvalwa manga omunona, ina yooloka nomupika, nonando na kale oye mwene guuthiga auhe wahe.

²Manga e li omushona, ohapu kala aantu mboka taye mu sile oshimpwiyu notaa tonatele iinima ye sigo ethimbo ndyoka lyu uthwa kuhe.

³Pamukalo nguka natse wo manga twa li aanona, otwa li twa pikwa koombepo dhomewangandjo sigo esiku ndyoka twa adha uukuluntu.

⁴Ihe ethimbo lyo opala sho lya thikana, Kalunga okwa tumu Omwana. Oye okwa valwa komukiintu nokwa kala kohi yompango yAajuda,

⁵a vule okumangulula mboka ya kala kohi yompango, opo tse tu ninge aana yaKalunga.

⁶Kalunga opo u ulike kutya otse oyana, okwe tu pe Ombepo yOmwana moomwenyo dhetu, Ombepo ndjoka tayi igidha: “Tate, Tate!”

⁷Onkee ano kamu shi we aapika, ihe aavalwa. Onkee molwaashoka one oyana, nena Kalunga ote ke mu pa ashihe shoka e shi nine aathigululi ye.

⁸Nale omwa li inaamu tseya Kalunga, onkee omwa li mwa pikwa kiikalunga kaayi shi ookalunga muukwatya wayo.

⁹Ihe ngashingeyi sho mwa tseya Kalunga, nenge ndi tye, ngashingeyi sho mwa tseyika kuKalunga, otamu vulu ngiini okwiigameka ishewe koombepo ndhoka tadhi pangele mewangandjo nodhaa na oshilonga? Omolwashike mwa hala ishewe okuninga aapika yadho?

¹⁰One ohamu yoolola omasiku gontumba, oomwedhi, omathimbo gomumvo nomimvo.

¹¹Onda tila omolweni. Iilonga yandje ayihe mokati keni oya ningi osima yowala?

¹²Aamwameme, otandi mu indile, ituleni pehala lyandje, ngashika nangame wo tandi itula pehala lyeni. Ne inamu ningila ndje uuwinayi nando owasha.

¹³Ne otamu dhimbulukwa kutya omoluunkundi wandje wokolutu onde mu uvithile tango evaangeli.

¹⁴Ihe ne inamu dhina ndje noinamu huga ndje, nonando onkalo yolutu lwandje oya li eyeleko enene kune. Ihe omwa taamba ndje, ngashika tamu taamba omuyengeli gwaKalunga nenge Jesus Kristus mwene nokuli.

¹⁵One omwa li mwa nyanyukwa unene. Oshike ano sha ningwa po? Ngame mwene otandi vulu oku shi mu lombwela kutya ando sha li tashi vulika, ando omwa kolola mo omeho geni e tamu ga pe ndje.

¹⁶Ano ngashingeyi onda ningi omutondi gweni, sho nde mu hokololele oshili?

¹⁷Aantu yamwe mboka oya hwama unene omolweni, ihe elalakano lyawo kali shi ewanawa. Oyo oya hala oku mu tokola ko kungame, opo mu ya ningile ngaashi yo ye mu ningile.

¹⁸Aluhe osho opala okuhwamena oshinima oshiwanawa, hauna ndoka ashike ndi li pune.

¹⁹Aamwameme aaholike, ngashika naanaa omukiintu e li muuwehame wokuvala, osho wo nangame ndi uvite uuwehame omolweni, sigo ondjelo yaKristus ya tungwa mune.

²⁰Onda halele ando ondi li pune ngashingeyi, opo ndi popye nane newi li ili. Ondi li po ndu uvite uudhigu omolweni.

²¹Lombwelii ndje ano, ne mboka mwa hala okukala kohi yompango: Inamu uva nani ompango shoka tayi ti?

²²Ompango otayi ti kutya Abraham okwa li e na oyana aamati yaali, gumwe omuna gwomudhike nomukwawo omuna gwomuhokanwa.

²³Omuna gwomudhike okwa li a valwa pamukalo gwopanshitwe, ihe omuna gwomuhokanwa omolwoonkondo dheuvaneko lyaKalunga.

²⁴Ehokololo ndika olyo eyele. Aakiintu mbaka yaali oyo omahangano gaali. Ehangano limwe oondyoka lyokondundu yaSinai hali vala aapika, olyo Hagar.

²⁵Oshoka Hagar oye ondundu yaSinai yi li muArabia. Oye efano lyoshilando shaJerusalem shopethimbo ndika, shoka shi li muupika pamwe naantu yamo ayehe.

²⁶Ihe Jerusalem shomegulu osho omukiintu omuhokanwa, meme yetu.

²⁷Oshoka enyolo otali ti: “Nyanyukwa, ngoye nguka ihoo vala! Ligola nokwiigidha pombanda, ngoye nguka inoo thetwa nando olumwe! Oshoka omukiintu ngoka e ethiwa ota ka kala e na aanona oyendji ye vule yaangoka e na omulumentu.”

²⁸Aamwameme, nane wo aana yaKalunga omolweuvaneko lye, ngashika naanaa Isak a li.

²⁹Pomasiku ngeyaka omunona ngoka a valwa pamukalo gwopanshitwe, okwa tidhagana mukwawo ngoka a valwa koonkondo dhOmbepo yaKalunga. Osho shi li po nonena.

³⁰Ihe enyolo otali ti ngiini? Otali ti: “Laleka omudhike nomwana, oshoka omuna gwomudhike ita vulu okutopola uuthiga nomuna gwomuhokanwa.”

³¹Onkee ano, aamwameme, tse katu shi aana yomudhike, ihe otse aana yomuhokanwa.