Read Oshindonga-Ombiimbeli Ondjapuki AAGALATI 6 Bible Online

AAGALATI 6 - Oshindonga-Ombiimbeli Ondjapuki bible

AAGALATI 6

¹Aamwameme, ngele oku na ngoka ta gwile meyono lyontumba, nena aantu mboka yomokati keni yopambepo naye mu pukulule; ihe naye shi ninge nonge. Kala wa kotoka, opo nangoye wo waa hongololwe.

²Kwathathaneni mokuhumbata omitenge. Osho ngeyi otamu gwanitha ompango yaKristus.

³Ngele oku na ngoka ta dhiladhila kutya oye sha, nando ke shi sha, oti ifundjaleke.

⁴Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.

⁵Oshoka kehe gumwe oku na okuhumbata ye mwene omutenge gwe.

⁶Omuntu ngoka ta longwa oohapu dhaKalunga, oku na okutopola iinima ayihe iiwanawa mbyoka e yi na nomulongi gwe.

⁷Inamu ifundjaleka, Kalunga iha nyekelwa. Oshoka shono omuntu te shi kunu, osho wo ta ka teya.

⁸Ngele okwa kunu pauhalu we, nena eteyo olyo eso, ihe ngele okwa kunu mOmbepo, nena ota ka teya omwenyo gwaaluhe mOmbepo.

⁹Ano inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.

¹⁰Onkee ano manga tu na ethimbo, natu ningileni kehe gumwe uuwanawa, ihe unene tuu mboka tu li nayo meitaalo limwe.

¹¹Taleni, nkene tandi mu nyolele noshikaha shandje mwene moondanda oonene.

¹²Aantu ayehe mboka ya hala okwiisimanekela nokwiitangela iinima yi wetike, oyo wo mboka taa kambadhala oku mu thiminika, mu ifukalekithe. Oyo otaye shi ningi ashike, opo kaaya hepekelwe omushigakano gwaKristus.

¹³Nokuli naamboka haa longitha efukaleko, nayo wo ihaa vulika kompango. Ihe oyo oya hala ashike, ne mu ifukalekithe, opo ya wape okwiitanga kutya oye mu vulikitha.

¹⁴Ihe ngame kombinga yandje otandi itangele ashike omushigakano gwOmuwa gwetu Jesus Kristus. Oshoka mugwo uuyuni owa kwatunuka ko kungame, nangame onda kwatunuka ko kuwo.

¹⁵Itashi kwatha nando osha okukala wa fukalekwa nenge inoo fukalekwa. Shoka ashike tashi kwatha, osho okuninga omushitwa omupe.

¹⁶Ombili nohenda nayi kale naayehe mboka taa landula eutho ndika mokukalamwenyo kwawo, yo nayi kale naantu yaKalunga ayehe.

¹⁷Inaku kala we nando oongoka te etele ndje uudhigu washa. Oshoka iiyadhi mbyoka ndi yi na kolutu lwandje, otayi ulike kutya ngame omupika gwaJesus.

¹⁸Esilohenda lyOmuwa gwetu Jesus Kristus nali kale nane, aamwameme amuhe. Amen.