Read Oshindonga-Ombiimbeli Ondjapuki AAEFESO 3 Bible Online

AAEFESO 3 - Oshindonga-Ombiimbeli Ondjapuki bible

AAEFESO 3

¹Onkee ngame Paulus, ngoka ndi li onkwatwa molwaJesus Kristus ngashingeyi peha lyeni aapagani, ohandi galikana Kalunga.

²Ondi inekela, omu uva kutya Kalunga okwa pe ndje molwesilohenda lye oshilonga shika shelelo lyegumbo lye, ndi shi longe omoluuwanawa weni.

³Eeno, Kalunga okwa holola oshiholekwa she nokwa tseyithile ndje memoniko, ngashika naanaa nda li nde mu nyolele nale pafupi kombinga yoshinima shika.

⁴Nongele otamu lesha shoka nda nyola, nena otamu ka koneka kutya ngame ondu uvite ko oshiholekwa shika shaKristus.

⁵Oshiholekwa shika osha kala sha holekwa aantu yomapipi ngoka ga piti, ihe ngashingeyi Kalunga okwe shi hololele aayapostoli naahunganeki ye aayapuki mOmbepo Ondjapuki.

⁶Oshiholekwa osho shika kutya omolwevaangeli aapagani oye na oshitopolwa momayambeko gaKalunga pamwe nAajuda. Oyo ayehe iilyo yolutu lumwe noye na wo oshitopolwa momauvaneko ngoka Kalunga e ga uvaneka muJesus Kristus.

⁷Ngame onda ningi omuyakuli gwevaangeli pamagano gesilohenda lyaKalunga, ngoka e ga pe ndje pakulonga kwoonkondo dhe.

⁸Ngame tuu nguka, omufupi ndi vulike kaantu yaKalunga ayehe, onda pewa kesilohenda, ndi uvithile aapagani elaka etoye lyuuyamba waKristus waa shi kuyelekwa,

⁹nondi tseyithile aantu ayehe oshiholekwa shika shaKalunga kutya otashi ti ngiini. Kalunga, omushiti gwiinima ayihe, okwa li a kaleke oshiholekwa shika sha holama uule womathimbo agehe ngoka ga piti,

¹⁰opo pethimbo ndika lyongashingeyi egongalo li tseyithile aapangeli yomaayengeli naanankondo yomegulu uunongo waKalunga momalupe gawo agehe gi ili nogi ili.

¹¹Kalunga okwe shi ningi palalakano lye lya kala po aluhe, ndyoka e li gwanitha muKristus Jesus, Omuwa gwetu.

¹²Muukumwe naye nomolweitaalo lyetu oku mu itaala, tse otu na ompito okuhedha koshipala shaKalunga neinekelo lya kola.

¹³Onkee otandi mu kumagidha, mwaa se uunye, oshoka ngame otandi hepekwa molweni; ashihe otashi ningwa omoluuwanawa weni.

¹⁴Onkee ano otandi tsu oongolo koshipala shaTate,

¹⁵kungoka kwa za edhina tate mezimo kehe lyomegulu nolyokombanda yevi.

¹⁶Ngame otandi galikana Kalunga omoluunene wesimano lye, e mu pe oonkondo tadhi zi mOmbepo ye, opo mu wape okukala mwa kola kombinga yomuntu gweni gwomeni.

¹⁷Kristus na tunge egumbo lye momitima dheni keitaalo. Otandi mu galikanene, mu kale mu na omidhi nekankameno mohole,

¹⁸ne mu wape pamwe naantu yaKalunga ayehe okuuva ko uumbwalangandja nuunene, uule wopombanda nuule womohi wohole yaKristus.

¹⁹Eeno, tseyeni ohole ye, nonando itayi vulu okutseyika thiluthilu, e tamu kala ihe mu udhithwa egwano alihe lyaKalunga.

²⁰Kalunga sho ta longo noonkondo ndhoka dhi li mutse, ota vulu okulonga oshindji shi vulithe pushoka tatu shi indile nenge tatu shi dhiladhila.

²¹Oye na simanekwe megongalo nomuKristus Jesus uule womathimbo agehe aluhe sigo aluhe! Amen.