Read Oshindonga-Ombiimbeli Ondjapuki AAEFESO 5 Bible Online

AAEFESO 5 - Oshindonga-Ombiimbeli Ondjapuki bible

AAEFESO 5

¹Kambadhaleni ano okuholela Kalunga, oshoka one oyana aaholike.

²Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu, gu ninge eyambo lya nika nawa nolyo opalela Kalunga.

³One aantu yaKalunga, onkee itashi vulika, mokati keni tamu uvika oluhondelo niilonga ya nyata yoludhi kehe nolwiho.

⁴Osho wo inashi opala, ngele ne otamu popi oohapu tadhi sitha ohoni, omategu guugoya nenge oohapu dha nyata, shila omahambelelo okuhambelela Kalunga.

⁵Ndhindhilikeni ihe nawa oshinima shika: kape na ando omuhondeli nenge omuntu kehe e li muulunde nenge omunalwiho, oshoka olwiho olwo okusimaneka iimenka, ta ka kala e na oshitopolwa mOshilongo shaKristus noshaKalunga.

⁶Inamu etha, mu pukithwe nando okomuntu gumwe noohapu dhuugoya, oshoka omolwiinima ya tya ngaaka, ondjahi yaKalunga otayi ka adha aantu mboka ihaa vulika kuye.

⁷Ano inamu kala mu na ekwatathano naantu ya tya ngaaka.

⁸Nale omwa li aantu yomomilema, ihe ngashingeyi sho mwa ningi aantu yOmuwa, one omu li muuyelele. Onkee ano kaleni ngashika aantu yomuuyelele.

⁹Oshoka uuyelele owo otau eta eteyo olindji ngashika uuwanawa, uuyuuki noshili.

¹⁰Kambadhaleni okwiilonga okutseya shoka sho opalela Omuwa.

¹¹Inamu kala mu na ekwatathano naantu mboka haa longo iilonga yaa fele yomomilema. Ihe hololeni iinima ya tya ngaaka puuyelele.

¹²Oshoka okutumbula iinima mbyoka haa ningi meholamo, osho ohoni yowala.

¹³Ihe uuna iinima ayihe tayi ka hololwa puuyelele, nena uukwatya wayo otau ka kala puuyelele.

¹⁴Oshoka shaa shoka sha hololwa puuyelele, otashi kala sha yela. Onkee ano otaku tiwa: “Penduka, ngoye ngoka wa kotha, za mo meso! Kristus note ku minikile.”

¹⁵Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge.

¹⁶Longitheni nawa ethimbo kehe mu li na, oshoka omasiku ngaka omawinayi.

¹⁷Inamu kala ano omagoya, ihe kambadhaleni okukonakona kutya Omuwa okwa hala, mu ninge shike.

¹⁸Inamu kolwa komaviinu, oshoka uunkolwi otau mu etele oshiponga, ihe udheni Ombepo Ondjapuki.

¹⁹Hokololelathaneni oohapu dhomapisalomi, omaimbilo noondjimbo oondjapuki dhopambepo. Imbileni Omuwa omaimbilo nomapisalomi, mu simanekeni momitima dheni.

²⁰Hambeleleni aluhe Kalunga Tate molwaayihe medhina lyOmuwa gwetu Jesus Kristus.

²¹Ilongeni evuliko mokati keni omolwetilo lyeni okutila Kristus.

²²Aakiintu, vulikeni kaalumentu yeni, ngaashi hamu vulika kOmuwa.

²³Oshoka omulumentu oku na epitikilo okupangela omukiintu gwe, naanaa ngashika Kristus e na epitikilo okupangela egongalo lye. Nokuli Kristus ye mwene oye Omuhupithi gwegongalo lye, nokutya olutu lwe.

²⁴Osho ngeyi aakiintu oye na okuvulika kaalumentu yawo miinima ayihe pamukalo naanaa ngoka egongalo tali vulika kuKristus.

²⁵Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.

²⁶Oye okwe shi ningi, opo a yoololele Kalunga egongalo nohapu ye, nge e li yelitha noku li yoga momeya,

²⁷opo i iyetele po egongalo lyo opala, lya yogoka, lya yelithwa, lyaa na ontongo nenge egonyoto nenge onyata ya sha.

²⁸Ano aalumentu oye na okuhola aakiintu yawo, naanaa ngashika ye hole omalutu gawo yene.

²⁹Oshoka kaku na nando omuntu e tonde olutu lwe mwene, ihe kehe gumwe ohe lu palutha nohe lu sile oshimpwiyu, naanaa ngashika Kristus ha sile egongalo lye oshimpwiyu;

³⁰oshoka tse iilyo yolutu lwe, yegongalo lye.

³¹Ngashika enyolo tali ti: “Onkee ano omulumentu oku na okuthiga po he nayina e ti ihanganitha nomukiintu gwe, ayehe yaali notaa ningi omuntu gumwe.”

³²Oshiholekwa shika sha hololwa menyolo ndika, osho oshinene. Ngame ondi uvite ko kutya otashi ulike Kristus negongalo lye.

³³Ihe otashi ulike wo kutya omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.