Read Oshindonga-Ombiimbeli Ondjapuki AAEFESO 6 Bible Online

AAEFESO 6 - Oshindonga-Ombiimbeli Ondjapuki bible

AAEFESO 6

¹Aanona, vulikeni kaakuluntu yeni. Shika osho oshinakugwanithwa sheni shopakriste, onkee ano osho oshu uka, mu shi ninge.

²“Simaneka ho nanyoko.” Shika osho oshipango shotango, shoka kusho kwa gwedhwa euvaneko:

³“Opo u kale u na okukalamwenyo okuwanawa, ngoye u kale u na omwenyo ethimbo ele kombanda yevi.”

⁴Aakuluntu, inamu hinda aana yeni noku ya geyitha, ihe ya putudheni ne mu ya kumagidhe paukriste.

⁵Aapika, vulikeni kooyene yeni yomuuyuni nokutila nokukakama. Ihe shi ningeni nomwenyo aguhe, ongaashi tamu longele Kristus.

⁶Shika inamu shi ninga ashike uuna ndoka ye mu wete, mu hokiwe ando kuyo, ihe longeni nomwenyo aguhe shoka sha hokiwa kuKalunga ngashika aamati yaKristus.

⁷Longeni iilonga yeni nenyanyu ongaamboka tamu longele Omuwa mwene, hamuntu ashike.

⁸Dhimbulukweni, kutya Omuwa ota ka futa omuntu kehe ngoka ta longo uuwanawa, na kale omupika nenge omuvalwa.

⁹Ooyene, kaleni nawa naapika yeni. Etheni okulongitha omatilitho. Dhimbulukweni, kutya ne amuhe omu na Omuwa gumwe awike megulu, ngoka ta ningile aantu ayehe shi thike pamwe.

¹⁰Hugunina, ikoleleleni mOmuwa, mu mone omomukumo moonkondo dhe oonene.

¹¹Ihomatekeni iikondjitho ayihe mbyoka Kalunga te yi mu pe, opo mu vule okukandeka omakotokelo omawinayi gomuhindadhi.

¹²Oshoka tse itatu kondjitha aantu, ihe otatu kondjitha oonkondo dhomombepo, aanankondo yuuyuni mbuka womilema nosho wo oonkondo dhuuwinayi mewangandjo.

¹³Onkee ano ngashingeyi ihomatekeni iikondjitho ayihe mbyoka Kalunga te yi mu pe. Omasiku omawinayi ngele tage ya, nena otamu ka vula okwiipopila komahomono gomukondjithi gweni nokukala omuthika, ngele mwa kondjo sigo okehulilo.

¹⁴Kaleni ano omuthika mwi ilongekidha; zaleni oshili, yi ninge epaya moombunda dheni. Izalekeni uuyuuki, u ninge ehuuyanza poontulo dheni.

¹⁵Kaleni mwi ilongekidha okuuvitha elaka etoye lyombili, li kale oongaku dhokoompadhi dheni.

¹⁶Ethimbo alihe zaleni eitaalo ongehuuyanza, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi.

¹⁷Taambeni ehupitho, li ninge ongegala lyosheela, noohapu dhaKalunga ongegongamwele, ndyoka Ombepo te li mu pe.

¹⁸Mbika ayihe yi longeni negalikano okwiindila ekwatho lyaKalunga. Galikaneni aluhe, Ombepo ngaashi te mu wilike. Onkee ano kaleni mwa tonata ne inamu teka omukumo. Galikaneneni aantu yaKalunga ayehe.

¹⁹Galikanenii ndje wo, opo Kalunga a pe ndje oohapu ndhoka ndi na oku popya pethimbo ndyoka, opo ndi popye nuulaadhi oshiholekwa shika shevaangeli.

²⁰Oshoka ngame omutumwa omolwevaangeli, nonando ngashingeyi ondi li mondholongo. Onkee ano galikaneni, opo mokuuvitha kwandje ndi popye nuulaadhi, ngaashi ndi na oku shi ninga.

²¹Tikikus, omumwameme omuholike nomuyakuli omwiinekelwa moshilonga shOmuwa, ote mu hokololele iinima ayihe kombinga yandje, opo mu tseye, nkene ndi li po.

²²Onkee ngame otandi mu tumu kune, e mu hokololele, nkene tu li po, ye e mu tse omukumo.

²³Kalunga Tate nOmuwa Jesus Kristus na gandje ombili nohole neitaalo kaamwameme ayehe.

²⁴Esilohenda lyaKalunga nali kale naayehe mboka ye hole Omuwa gwetu Jesus Kristus, yo naa pewe ohole yaa na ehulilo.