Read Oshindonga-Ombiimbeli Ondjapuki AAFILIPPI 1 Bible Online

AAFILIPPI 1 - Oshindonga-Ombiimbeli Ondjapuki bible

AAFILIPPI 1

¹Ontumwafo ndjika oya zi kuPaulus naTimoteus, aamati yaJesus Kristus, ya nyolelwa aantu yaKalunga ayehe yomuFilippi, mboka yi itaala Jesus Kristus pamwe naawiliki yegongalo lyaKalunga naayakuli yalwe.

²Silweni ohenda, ne mu kale mu na ombili yaKalunga noyOmuwa Jesus Kristus.

³Otandi hambelele Kalunga kandje omolweni amuhe, kehe ethimbo tandi mu dhiladhila.

⁴Momagalikano gandje agehe otandi mu galikanene nenyanyu,

⁵oshoka omwa kwatha ndje moshilonga sheuvitho lyevaangeli okuza kesiku lyotango sigo ongashingeyi.

⁶Ngame ondi inekela shili kutya Kalunga, ngoka a tameke oshilonga oshiwanawa mune, ote shi tsikile, sigo tashi ka pwa mesiku lyaJesus Kristus.

⁷Ngame ondi mu hole. Nokuli osho oshu uka lela, ngame ndi kale noku mu dhiladhila ngeyi, oshoka one aasilwahenda kuKalunga pamwe nangame; ngashingeyi sho ndi li mondholongo naasho wo nda li inaandi kwatwa okupopila nokukoleka evaangeli.

⁸Kalunga oku shi shi kutya otandi popi oshili, sho tandi ti: Onde mu yuulukwa nohole yomuJesus Kristus.

⁹Egalikano lyandje olyo ndika kutya Kalunga a kokithe nokutaneka ohole yeni mokutseya nomokuninga omatokolo ge na oondunge,

¹⁰opo mu kale mu na owino yokuyoolola iinima mbyoka yi na oshilonga. Nena mesiku lyaKristus one otamu ka kala ihe mwa yela mwaa na nando okantongo kasha.

¹¹Okukalamwenyo kweni otaku kala ihe ku udha iiyimati iiwanawa mbyoka Jesus Kristus awike ta vulu oku yi mu imitha, iiyimati yokusimanekitha noyokuhambelelitha Kalunga.

¹²Aamwameme, ngame onda hala, mu kale mu shi shi kutya iinima mbyoka ya ningilwa ndje, oya kwathele lela mokutaandelitha evaangeli.

¹³Nokuli etanga alihe lyaalangeli yuuwa naambala yalwe ooyakwawo yaamuka oye shi shi ngashingeyi kutya ngame onda tulwa mondholongo molwaashoka ndi li omumati gwaKristus.

¹⁴Okukala kwandje mondholongo okwa pe oyendji yomaamwameme aalumentu omukumo okwiinekela Omuwa nokuuvitha nuulaadhi yaa na uumbanda.

¹⁵Eeno, yamwe yomuyo otaa uvitha Kristus omolwefupa nomolwondumbo, ihe ooyakwawo otaye mu uvitha nehalo ewanawa.

¹⁶Mboka otaye shi ningithwa kohole, oshoka oyo oye shi shi kutya Kalunga okwa pe ndje oshilonga shokupopila evaangeli.

¹⁷Mbeyaka ooyakwawo ihaa uvitha Kristus nehalo ewanawa, ihe omombepo yokwiihola noyondumbo. Ngashingeyi sho ndi li mondholongo, oye shi aniwa otaa gwedhele ndje uudhigu u vule wonale.

¹⁸Ihe shoka kashi na mbudhi. Ngame ondi li po nde shi nyanyukilwa notandi ke shi nyanyukilwa komeho, Kristus shaa ashike tu uvithwa pamukalo kehe ngoka tagu vulika, ongele nelalakano ewanawa nenge nelalakano lya puka.

¹⁹Nokuli ngame ondi shi shi kutya omolwomagalikano geni nokekwatho lyOmbepo yaJesus Kristus otandi ka manguluka.

²⁰Oshoka ondjuulukwe yandje onene netegameno lyandje olyo ndika kutya ngame ndaa idhimbike nando okuli oshinakugwanithwa shandje. Ethimbo alihe, unene okuza kongashingeyi, otandi kala ndi na omukumo omunene, opo ngame mwene nuuntu wandje auhe ndi simanekithe Kristus. Ashihe shimwe, ngele ondi na omwenyo nenge tandi si.

²¹Oshoka kombinga yandje Kristus oye omwenyo gwandje nokusa okwo elikolo.

²²Ihe ngele nani mokukala ndi na omwenyo molutu nduka, otandi vulu okulonga sha shi na oshilonga oshinene, nena onda nyengwa nokandi shi wo kutya oshini po ndi na okuhogolola po.

²³Ondi li po tandi thiminikwa koombinga adhihe mbali: Onda hala nokuhalelela, ndi thige po okukalamwenyo huka, ndi ka kale puKristus. Shika osho oshinima oshiwanawa shi vule oshikwawo.

²⁴Ihe osha pumbiwa unene noonkondo, ndi kale ndi na omwenyo omolweni.

²⁵Onkee ngame ondi inekela lela nondi shi shi kutya otandi ka kala ndi na omwenyo. Eeno, otandi ka kala natango pune oku mu kokitha noku mu nyanyudha meitaalo.

²⁶Ngele nda kala pune natango, nena ne otamu ka vula ihe okwiisimanekela ndje mokukala kweni muKristus Jesus.

²⁷Oshinima oshinene nosha simana osho shoka kutya omikalo dheni nadhi kale dho opalathana nevaangeli lyaKristus, opo nge nde ya ko, ndi mu mone nongele ndi li kokule, ndi mu uve mu li mwa thikama omuthika mu na elalakano limwe alike, nokutya okukondjela eitaalo lyomevaangeli pamwe nangame.

²⁸Inamu tila aakondjithi yeni, ihe kaleni aluhe mu na omukumo. Omukumo gweni otagu ya tompo kutya oyo itaa ka sindana, ihe ne otamu ka sindana, oshoka Kalunga oye te mu pe esindano.

²⁹Oshoka ne omwa pewa ohenda yokuyakula Kristus, hamoku mu itaala akuke, ihe nomoku mu hepekelwa wo.

³⁰One wo otamu vulu okukondja pamwe nangame. Olugodhi ndoka olwo naanaa ndoka mwa li mwa mono ndje ndi lu na, nosigo onena omu uvite ndje ndi lu na.