Read Oshindonga-Ombiimbeli Ondjapuki AAKOLOSSA 4 Bible Online

AAKOLOSSA 4 - Oshindonga-Ombiimbeli Ondjapuki bible

AAKOLOSSA 4

¹Ooyene, tekuleni aalelwa yeni nawa nonuuyuuki. Dhimbulukweni, kutya nane wo omu na Omuwa megulu.

²Dhiginineni okugalikana, ihe galikaneni nokukotoka. Hambeleleni Kalunga.

³Tu galikanenii wo, Kalunga opo e tu pe ompito ombwanawa okuuvitha oohapu dhe, okuholola oshiholekwa shaKristus, shoka sha tulitha ndje mondholongo moka ndi li mo ngashingeyi.

⁴Galikanenii ndje, opo ndi vule okupopya pamukalo ngoka tagu yelitha oshiholekwa shika, ngashika naanaa nda tegelelwa, ndi shi ninge.

⁵Kaleni mu na oondunge mokukalathana kweni naantu mboka kaaye shi ooitaali. Longitheni nawa ompito kehe tamu yi mono.

⁶Oohapu dheni nadhi kale aluhe oombwanawa notadhi hokitha omuntu oku mu pulakena. Kambadhaleni, mu kale aluhe mu shi, nkene mu na okuyamukula aantu.

⁷Tikikus, omumwameme omuholike, omwiinekelwa nomuyakuli omukwetu moshilonga shOmuwa, ote ke mu hokololela iinima ayihe kombinga yandje.

⁸Onkee ano otandi mu tumu kune, opo e mu nyanyudhe, sho te ke mu hokololela, nkene tse atuhe tu li po.

⁹Oye ote ya pamwe naOnesimus, omumwameme omuholike nomwiinekelwa, omukwanegongalo lyaandjeni. Mboka ayehe yaali otaye ke mu hokololela ashihe shoka sha ningwa ko huka.

¹⁰Aristarkus, ngoka tu li naye mondholongo, ote mu kundile po. Osho wo Markus, gwaantsezi yaBarnabas, oongoka mwa lombwelelwe, mu mu yakule, ngele te ke ya kune.

¹¹Josua, ngoka hi ithanwa Justus, naye wo ote mu kundile po. Mbaka yatatu oyo ooitaali mboka ya zi muujuda notaa longo pamwe nangame omolwOshilongo shaKalunga. Oyo oya kala ekwatho enene kungame.

¹²Epafras, gumwe gwomongundu yeni nomuyakuli gwaJesus Kristus, ote mu kundile po wo. Oye he mu galikanene aluhe nuudhiginini noti indile Kalunga, mu wape okukala mwa kola meitaalo nohamu vulika kehalo lyaKalunga miinima ayihe.

¹³Ngame mwene otandi vulu oku mu hokololela eihepeko lyaEpafras omolweni nomolwaantu yomuLaodikea noyomuHierapolis.

¹⁴Lukas, ndohotola gwetu omuholike, naDemas otaye mu kundile po.

¹⁵Kundilii po aamwameme yomuLaodikea, naNimfas nosho egongalo ndyoka hali gongala megumbo lye.

¹⁶Ontumwafo ndjika ngele ya leshwa megongalo lyeni, yi tumeni, yi ka leshwe wo megongalo lyokuLaodikea; ne mu taambe wo ndjoka tamu yi tuminwa kAalaodikea, mu yi leshe.

¹⁷Lombweleni Arkippus kutya na tsakanithe oshilonga shoka e shi pewa okulongela Omuwa.

¹⁸Mpaka otandi nyola po noshikaha shandje mwene. Omakundo ga si kuPaulus. Inamu dhimbwa kutya ondi li momalyenge. Esilohenda lyaKalunga nali kale nane.