Read Oshindonga-Ombiimbeli Ondjapuki 1 AATESSALONIKA 1 Bible Online

1 AATESSALONIKA 1 - Oshindonga-Ombiimbeli Ondjapuki bible

1 AATESSALONIKA 1

¹Ontumwafo ndjika oya zi kuPaulus, Silvanus naTimoteus. Oya nyolelwa egongalo lyomuTessalonika, lyaantu yaKalunga Tate noyOmuwa Jesus Kristus. Esilohenda nombili nayi kale nane.

²Tse ohatu hambelele Kalunga aluhe omolweni nohatu mu dhimbulukwa wo aluhe momagalikano getu.

³Ohatu mu dhimbulukwa koshipala shaKalunga Tate, nkene mu na eitaalo li na iilonga, nkene mu na ohole tayi mu longitha nuupenda nonkene okutegamena kweni Omuwa gwetweni Jesus Kristus kwa kola.

⁴Aamwameme, tse otu shi shi kutya Kalunga oku mu hole nokwe mu hogolola, mu ninge aantu ye.

⁵Oshoka elaka etoye ndyoka twe mu etele, kalya li owala oohapu dhomokana, ihe olya holoka moonkondo nomOmbepo Ondjapuki mokuholola oshili ayihe. Okukala kwetu omwe ku tseya, sho twa li pune; osha ningwa moluuwanawa weni.

⁶Ne omwa ningi aaholeli yetu noyOmuwa. Nonando omwa li moothina odhindji, oohapu dhaKalunga omwe dhi taamba nenyanyu lyomOmbepo Ondjapuki.

⁷Onkee ano omwa ningi oshiholelwa shooitaali ayehe yomuMakedonia noyomuGreka.

⁸Oshoka elaka tali popi Omuwa, olya zi mune nolya taandele nokuli pondje yaMakedonia noyaGreka. Eitaalo lyeni okwiitaala Kalunga olya kundanwa akuhe. Kaku na we sha tu na oku shi popya.

⁹Aantu yo yene ohaa hokolola, nkene mwe tu taamba, sho twe mu talele po nonkene mwe etha iimenka e tamu ya kuKalunga. One omwa hala okulongela Kalunga kashili nomunamwenyo

¹⁰nokutegelela Omwana, a ze megulu. Oye Jesus ngoka Kalunga e mu yumudha kuusi naangoka te tu hupitha, twaa adhike kondjahi yaKalunga ndjoka tayi ke ya.