Read Oshindonga-Ombiimbeli Ondjapuki JOSUA 14 Bible Online

JOSUA 14 - Oshindonga-Ombiimbeli Ondjapuki bible

JOSUA 14

¹Mpaka otapa landula ehokololo, nkene evi lyaKaanan kuuninginino waJordan lya topolelwa Aaisraeli. Osha ningwa komuyambi Eleasar, kuJosua yaNun nokaawiliki yomaludhi gomomazimo gaIsrael.

²Ngaashi Omuwa a li a lombwele Moses, iitopolwa yomazimo omugoyi netata kuuninginino waJordan oyu uthwa nokuumba oshihogololitho.

³Moses okwa li a gandja nokuli evi kuuzilo waJordan komazimo gaali netata. (Oluvalo lwaJosef olwa li lwa topolwa momazimo gaali: ndyoka lyaManasse naandyoka lyaEfraim.) Ihe Aalevi inaa pewa kuMoses oshitopolwa shasha. Oya pewa ashike iilando yokukala mo nomalundu guunapelo okulitha oongombe dhawo, oonzi niikombo yawo.

⁵Aaisraeli oya topola evi, ngaashi Omuwa a lombwelele Moses.

⁶Esiku limwe aantu yamwe yomezimo lyaJuda oye ya kuJosua kuGilgal. Gumwe gwomuyo, Kaleb kaJefunne Omukenasi, okwa ti kuye: “Ou shi shi shoka Omuwa a popi muKadesh Barnea kombinga yetu nangoye kuMoses, omuntu gwaKalunga.

⁷Onda li ndi na omimvo omilongo ne, sho Moses, omumati gwOmuwa, a tumu ndje okuza kuKadesh Barnea okundaadha evi ndika. Onde mu etele ondjokonona yoshili.

⁸Aalumentu mboka ya yile ko pamwe nangame, oya mbandameke oshigwana shetu, ihe ngame onda li nda dhiginine okuvulika kOmuwa, Kalunga kandje.

⁹Sho nda ningi ngeyi, Moses oku uvanekele ndje euvaneko lya kola nokutya ngame noluvalo lwandje otatu ka pewa eliko lyetu mevi ndyoka nde li lyata oompadhi.

¹⁰Eewa, ngashingeyi opwa piti omimvo omilongo ne nantano, Omuwa sho e shi lombwele Moses. Shika osha ningwa, manga Israel a li mombuga. Pauvaneko lye Omuwa okwa gamene ndje, ndi kale ko natango ndi na omwenyo. Ondi na oomvula omilongo hetatu nantano,

¹¹ihe oonkondo dhandje natango tuu odhi thike pundhoka, Moses sho a tumine ndje. Natango tuu onda gwana okuhinga iita nenge okuninga sha shilwe.

¹²Pe ndje ano evi ndyoka lyokoondundu Omuwa u uvanekele ndje esiku ndiyaka. Ngoye owa kundana esiku ndiyaka kutya hwiyaka oku na oludhi lwaalefule halu ithanwa Aayanakim, ya kala miilando iinene yomadhingililokuma. Ondi inekela, Omuwa ota ka kala pamwe nangame, opo ndi ya tidhe mo, naanaa ngaashi Omuwa a ti.”

¹³Josua okwa yambeke Kaleb kaJefunne e te mu pe oshilando Hebron, shi ninge eliko lye.

¹⁴Sigo onena Hebron osholuvalo lwaKaleb kaJefunne Omukenasi, oshoka okwa li a vulika kOmuwa, Kalunga kaIsrael.

¹⁵Nale Hebron osha li hashi ithanwa oshilando shaArba. (Arba okwa li nale omunenentu mokati kAayanakim.) Nomoshilongo omwa li ombili.