Read Oshindonga-Ombiimbeli Ondjapuki JOSUA 15 Bible Online

JOSUA 15 - Oshindonga-Ombiimbeli Ondjapuki bible

JOSUA 15

¹Omaludhi gomezimo lyaJuda oga pewa oshitopolwa shevi, ngaashi tashi landula: Kuumbugantu evi olya li lya taandela sigo onkotso yahugunina yombuga Zin pongamba yaEdom.

²Ongamba ndjika yokuumbugantu oya tameke kohulo yEfuta lya sa,

³yu uka lwokuumbugantu okuza pomulondo gwondundu Akrabbim, sigo oZin, sigo oKadesh Barnea, tayi pitilile Hezron, tayi londo yu uka kuAddar, tayi goyokele lwokuKarka,

⁴yu uka kuAzmon nokulandula ihe okalonga pongamba yaEgipiti, sigo okEfuta lyopokati, mpoka ongamba tayi hulile. Ndjika oyo ongamba yokuumbugantu yaJuda.

⁵Ongamba yokuuzilo oyo Efuta lya sa, sigo oompoka Jordan tagu yi mulyo. Oko nkoka ongamba yokuumbangalantu tayi tameke.

⁶Oya adha kuBet Hogla nokupitilila Bet Araba kuumbangalantu washo. Okuza nkoka oyu uka kemanya lyaBohan (omuna gwaRuben),

⁷okuza kEsilu lyomalwa otayi londo yu uka kuDebir nokugoyokela kuumbangalantu yu uka lwokuGilgal, shoka sha taalela omulondo gwaAdummim handiyaka yolusilu kuumbugantu. Nena otayi tsikile yu uka koothithiya dhaEnshemesh nokuhulila muEnrogel.

⁸Okuza nkoka ongamba otayi londo ya lambalala olusilu lwaGe Ben Hinnom kuumbugantu woshikulundundu, nkoka kwa li Jerusalem shAayebusi. Opo ihe otayi londo komutse gwoshikulundundu kuuninginino wolusilu lwaHinnom, kombinga yokuumbangalantu wolusilu lwaRefaim.

⁹Okuza nkoka otayi uka komaluthithiya gaNeftoak nokiilando yi li popepi nondundu Efron. Nkoka otayi piluka yu uka kuBaala (kokutya Kiriat Jearim),

¹⁰mpoka otayi goyokele kuuninginino yu uka kevi lyokiikulundundu yaSeir, tayi kunkula nondundu yaKiriat Jearim (kokutya Kesalon) kuumbangalantu nokusilukila kuBet Shemesh nokuTimna.

¹¹Opo ihe ongamba tayi tsikile yu uka koshikulundundu kuumbangalantu waEkron, tayi goyokele lwokuShikkaron, tayi pitilile ondundu Baala yu uka kuJamnia. Oya hulile mEfuta lyopokati,

¹²ndyoka tali ningi ongamba yokuuninginino. Meni lyoongamba ndhika aantu yomaludhi gaJuda oya kala mo.

¹³Kaleb kaJefunne, ogwomezimo lyaJuda, okwa pewa okambinga moshitopolwa shaJuda, ngashi Omuwa a lombwele Josua. Okwa pewa Hebron, oshilando shaArba, he yAayanak.

¹⁴Kaleb okwa tidha mo oluvalo lwaAnak — oludhi lwaSheshai, lwaAhiman, nolwaTalmai.

¹⁵Okuza nkoka okwa ka matukila aantu yomuDebir. (Oshilando shika osha li hashi ithanwa Kiriat Sefer.)

¹⁶Kaleb okwa ti: “Omulumentu ngoka ta tompola okusinda Kiriat Sefer, otandi mu pe omumwandje omukadhona Aksa, e mu hokane po.”

¹⁷Otniel yaKenas, omuna gwamumwayina Kaleb, okwe shi sindi; osho ngaaka Kaleb okwe mu pe omwana Aksa, a ninge omukadhi.

¹⁸Mohango Otniel oku ulumike omukadhi, i indile he epya. Aksa okwa londoloka kokasino ke, naKaleb okwe mu pula sho a hala.

¹⁹Okwa yamukula: “Onda hala omithima dhimwe dhomeya. Evi ndyoka we li pe ndje, oli na enota.” Nena Kaleb okwe mu pe omatope gokiiheke noonyombo dhomomadhiya.

²⁰Ndika olyo evi omaludhi gezimo lyaJuda ge li taamba, li ninge eliko lyago.

²¹Iilando yawo mbyoka ya tsa kokule kuumbugantu popepi nongamba yaEdom, oyo Kabzeel, Eder, Jagur,

²²Kina, Dimona, Adada,

²³Kedesh, Hazor, Jitnan,

²⁴Sif, Telem, Bealot,

²⁵Hazor Hadatta, Kerijot-Hezron (kokutya Hazor),

²⁶Amam, Shema, Molada,

²⁷Hazar Gadda, Heshmon, Bet Pelet,

²⁸Hazar Shual, Beersheba, Biziotia nomikunda dhasho,

²⁹Baala, Ijim, Ezem,

³⁰Eltolad, Kesil, Horma,

³¹Ziklag, Madmanna, Sansanna,

³²Bet Lebaot, Shilhim, Ain naRimmon: iilando omilongo mbali nomugoyi nomikunda dhayo.

³³Iilando yoponyonga yoondundu oyo mbika: Eshtaol, Soar, Ashna,

³⁴Sanoa, En-gannim, Tappua, Enam,

³⁵Jarmut, Adullam, Soko, Aseka,

³⁶Shaarajim, Aditajim, Gedera, Gederotajim: iilando omulongo niine nomikunda dhayo.

³⁷Okwa li wo Zenan, Hadasha, Migdal Gad,

³⁸Dilean, Mispe, Jokteel,

³⁹Lakish, Bozkat, Eglon,

⁴⁰Kabbon, Lakmas, Kitlish,

⁴¹Gederot, Bet Dagon, Naama naMakkeda: iilando omulongo niihamano nomikunda dhayo.

⁴²Okwa li wo Libna, Eter, Ashan,

⁴³Jiftak, Ashna, Nezib,

⁴⁴Keila, Aksib, Maresha: iilando omugoyi nomikunda dhayo.

⁴⁵Okwa li Ekron niitayilando yasho nomikunda dhasho,

⁴⁶niilando ayihe nomikunda adhihe popepi naAshdod okuza kuEkron, sigo okEfuta lyopokati.

⁴⁷Okwa li Ashdod naGaza niitayilando yayo nomikunda dhayo dha adha sigo okalonga kongamba yaEgipiti nokomunkulo gwEfuta lyopokati.

⁴⁸Mevi lyokoondundu omwa li Shamir, Jattir, Soko,

⁴⁹Danna, Kirjat Sanna (kokutya Debir),

⁵⁰Anab, Eshtemoa, Anim,

⁵¹Goshen, Holon naGilo: iilando omulongo nashimwe nomikunda dhayo.

⁵²Okwa li Arab, Duma, Eshan,

⁵³Janim, Bet Tappua, Afek,

⁵⁴Humta, Hebron naZior: iilando omugoyi nomikunda dhayo.

⁵⁵Okwa li Maon, Karmel, Sif, Jutta,

⁵⁶Jesreel, Jokdeam, Sanoa,

⁵⁷Kain, Gibea naTimna: iilando omulongo nomikunda dhayo.

⁵⁸Okwa li Halhul, Bet-Sur, Gedor,

⁵⁹Maarat, Bet Anot, naEltekon: iilando ihamano nomikunda dhayo.

⁶⁰Okwa li Kirjat Baal (kokutya Kiriat Jearim) naRabba: iilando iyali nomikunda dhayo.

⁶¹Mombuga omwa li Bet Arab, Middin, Sekaka,

⁶²Nibshan, Oshilando shOmongwa, naEn-gedi: iilando ihamano nomikunda dhayo.

⁶³Ihe oshigwana shaJuda inashi wapa okutidha mo Aayebusi mboka ya kala muJerusalem. Natango tuu Aayebusi omo ya kala pamwe nAajuda.