Read Oshindonga-Ombiimbeli Ondjapuki JOSUA 18 Bible Online

JOSUA 18 - Oshindonga-Ombiimbeli Ondjapuki bible

JOSUA 18

¹Konima yokusinda evi, oshigwana ashihe shaIsrael osha gongala muShilo e tashi dhiki etsalihangano lyOmuwa.

²Okwa li kwa hupa omazimo gaheyali goshigwana shaIsrael, ngoka ga li inaaga pewa natango iitopolwa yago yevi.

³Ano Josua okwa ti kAaisraeli: “Sigo uunake tamu ka tegelela, manga inaamu ka kwata po evi ndyoka mwa pewa kOmuwa, Kalunga koohokulu?

⁴Mezimo kehe namu ze aalumentu yatatu, otandi ke ya tuma nevi alihe, ye li koneke mpoka ya hala okupewa omaliko gawo. Konima nge ye shi ningi, naye ye kungame.

⁵Evi nali topolwe miitopolwa iheyali. Juda na kale moshitopolwa she kuumbugantu ngaashika wo Josef mushe kuumbangalantu.

⁶Nyoleni ehokololo lyiitopolwa mbika iheyali, mu li etele ndje. Nena otandi ke mu umbila oshihogololitho koshipala shOmuwa Kalunga ketu.

⁷Ihe Aalevi itaa ka pewa oshitopolwa shevi mokati keni, oshoka uuyambi wOmuwa owo oshitopolwa shawo. Nokuli ezimo lyaGad nolyaRuben netatazimo lyaManasse oga pewa nale kuMoses, omumati gwaKalunga, evi kuuzilo waJordan.”

⁸Aalumentu oya yi nondjila yawo e taa thaneke evi membo, ngaashi Josua e ya lombwele a ti: “Endeni evi alihe noku li thaneka membo e tamu galukile kungame. Nena otandi mu umbile oshihogololitho koshipala shOmuwa muka muShilo.”

⁹Osho aalumentu ya yi noye ende evi alihe nokuthaneka membo, nkene tali topolwa miitopolwa iheyali niilando ayihe yalyo. Opo ihe oya galukile kuJosua pontanda yaShilo.

¹⁰Josua okwe ya umbile oshihogololitho koshipala shOmuwa muShilo nokwa topolele oshihupe shomazimo gaIsrael evi.

¹¹Omaludhi gomezimo lyaBenjamin oge ya tango molufo. Oshitopolwa shago oshi li pokati kezimo lyaJuda nolyaJosef.

¹²Kuumbangalantu ongamba yasho otayi tameke puJordan e tayi londo tayi uka koshikulundundu kuumbangalantu waJeriko nolwokuuninginino ya taakana evi lyokoondundu, sigo okombuga yaBetaven.

¹³Okuza nkoka ongamba otayi uka koshikulundundu kuumbugantu waLus (ohashi ithanwa wo Betel), nena otayi kulukile kuAtarot Addar, kondundu kuumbugantu waBethoron shopohi.

¹⁴Opo ihe ongamba tayi goyokele kuumbugantu okuza kesilukila lyokuuninginino wondundu yaBethoron tayi uka kuKirjat Baal (kokutya Kiriat Jearim), shoka oshezimo lyaJuda. Ndjika oyo ongamba yokuuninginino.

¹⁵Ongamba yokuumbugantu otayi tameke kooha dhaKiriat Jearim nokuuka koothithiya dhaNeftoak.

¹⁶Okuza nkoka otayi kulukile ponyonga yondundu ndjoka ya taalela kolusilu lwaGeben Hinnom kombinga yokuumbangalantu wolusilu lwaRefaim. Opo ihe otayi lambalala olusilu lwaGeben Hinnom kombinga yuumbugantu woshikulundundu shAayebusi nokuuka lwokuEnrogel.

¹⁷Okuza nkoka otayi goyokele lwokuumbangalantu kuEnshemesh nokuGelilot sha taalela omulondo gwaAdummim. Opo ihe ongamba otayi silukile kemanya lyaBohan (omuna gwaRuben)

¹⁸nokupitilila oshikulundundu sha taalela Bet Arab kombinga yuumbangalantu nokusilukila kuBet Arab.

¹⁹Nena ongamba otayi ende kombinga yuumbangalantu woshikulundundu shaBet Hogla e tayi hulile muumbangalantu wEfuta lya sa mpoka Jordan tagu yi mulyo.

²⁰Jordan ogwo ongamba yokuuzilo. Ndhika odho oongamba dhevi ndyoka lya gandjwa, li ninge eliko lyomaludhi gomezimo lyaBenjamin.

²¹Iilando yomaludhi gomezimo lyaBenjamin oyo mbika: Jeriko, Bet Hogla, Emek Keziz,

²²Bet Araba, Semaraim, Betel,

²³Avvim, Para, Ofra,

²⁴Kefar Ammon, Ofni naGeba: iilando omulongo niiyali pamwe nomikunda dhayo.

²⁵Okwa li wo Gibeon, Rama, Beerot,

²⁶Mispe, Kefira, Moza,

²⁷Rekem, Jirpeel, Tarala,

²⁸Zela, Elef, Jebus (kokutya Jerusalem), Gibea naKiriat Jearim: iilando omulongo niine nomikunda dhayo. Ndika olyo evi lya gandjwa, li ninge eliko lyomaludhi gomezimo lyaBenjamin.