Read Oshindonga-Ombiimbeli Ondjapuki JOSUA 23 Bible Online

JOSUA 23 - Oshindonga-Ombiimbeli Ondjapuki bible

JOSUA 23

¹Konima yethimbo ele okuza mpoka Omuwa sho a kalekele Aaisraeli nombili mokati kaatondi yawo, Josua, ngoka a li muukulupe uunene,

²okwi ithana Aaisraeli ayehe, aakuluntu, aawiliki, aatokolihapu naambala yoshigwana nokwa ti kuyo: “Ngame onda kulupa ngashingeyi.

³Omwa mono iinima ayihe Omuwa Kalunga keni e yi ningile iigwana mbika omolweni. Omuwa Kalunga keni okwe mu kondjele.

⁴Ngame onda gandja komazimo geni evi lyiigwana ayihe mbyoka ya hupu po natango, li ninge eliko lyeni, ngashika wo evi lyiigwana ayihe mbyoka nda sindi okuza komulonga Jordan kuuzilo, sigo Efuta lyopokati kuuninginino.

⁵Omuwa Kalunga keni ote ya gamuna kune note ya tidha po mokuhuma ko kweni. Otamu ka kwata po evi lyawo, ngaashi Omuwa e li mu uvanekele.

⁶Kotokeni ano, mu vulike kwaayihe mbyoka ya nyolwa membo lyompango yaMoses. Inamu hunutha po nando okantoko kamwe kayo,

⁷mwaa kwatathane naantu mbaka ye li mokati keni nenge mu ithane iikalunga yawo nokugana komadhina gayo nenge okusimaneka iikalunga mbyoka nokwiinyongamena kuyo.

⁸Gameni kOmuwa, ngaashi mwa kala sigo onena.

⁹Omuwa okwa tidha po iigwana iinene niinankondo, ngaashi mwa humu ko nokapwa li shimwe sha vulu oku mu itakeka.

¹⁰Kehe ngoka gwomune ota vulu okukukumitha aalumentu eyuvi, oshoka Omuwa Kalunga keni ote mu kondjele, ngaashi u uvaneke.

¹¹Kotokeni ano, mu kale mu hole Omuwa Kalunga keni.

¹²Ihe ngele tamu ningi aahethi e tamu vundakana niigwana mbika ya hupile mokati keni e tamu hokanathana nayo,

¹³nena kaleni mu shi shi kutya Omuwa ite ke mu tidhila po we iigwana mbika mokuhuma ko kweni. Nena otayi ka ninga emakelo, elulo nekelo lyeni, ongaashi ongola tayi tapata moombunda dheni nenge uuyagaya momeho geni, sigo mwa hulu po amuhe mevi ndika ewanawa Omuwa Kalunga keni e li mu pe.

¹⁴“Ngashingeyi etembu lyandje olya hedha popepi. Kehe gumwe gwomune oku shi shi momutima gwe nomomwenyo gwe kutya Omuwa Kalunga keni okwe mu pe iinima ayihe iiwanawa mbyoka e yi mu uvanekele. Okwa gwanitha euvaneko kehe e li uvaneke; kape na nando olimwe lya gwile pohi.

¹⁵Ihe ngaashi a dhiginine euvaneko kehe ndyoka e li mu uvanekele, osho wo ta ka tsakanitha iihuna ayihe,

¹⁶ngele itamu dhiginine ehangano ndyoka Omuwa Kalunga keni e mu uthile, mu li dhiginine. Nongele tamu longele iikalunga noku yi simaneka, nena ote mu geele muupyundjahi we, nanziya itapu hupu nando ogumwe mevi ndika ewanawa e li mu pe.”